ប្រទេសអ៊ុយក្រែនសម្រេចរត់ចោលសហភាពអឺរ៉ុប ទៅឱបរុស្ស៊ី
ចុះផ្សាយនៅថ្ងៃ៖
ស្តាប់ - ០៦:៣០
ទីបំផុត នៅថ្ងៃព្រហស្បតិ៍ ទី២១ វិច្ឆិកា ប្រទេសអ៊ុយក្រែនបានសម្រេចកប់ចោលនូវកិច្ចព្រមព្រៀងដែលទីក្រុងគៀវគ្រោងនឹងចុះហត្ថលេខាជាមួយសហភាពអឺរ៉ុបនៅថ្ងៃទី២៨ និង២៩ វិច្ឆិកាសប្តាហ៍ក្រោយ នាឱកាសជំនួបកំពូលក្នុងទីក្រុងវីលនីញូស ប្រទេសលីទុយអានី។ ទន្ទឹមគ្នានេះ សភាអ៊ុយក្រែនក៏បានច្រានចោលនូវសំណើច្បាប់មួយដែលអនុញ្ញាតឲ្យលោកស្រីអតីតនាយករដ្ឋមន្រ្តីអ៊ុយក្រែន យ៉ូលីយា ទីម៉ូឆេនកូដែលបច្ចុប្បន្នកំពុងជាប់ក្នុងពន្ធនាគារ និងដែលកំពុងមានជម្ងឺអាចធ្វើដំណើរទៅព្យាបាលនៅបរទេសបាន។
បើគេពិនិត្យមើលមួយភ្លែតទៅឃើញថា ជម្រើសចុងក្រោយរបស់ប្រទេសអ៊ុយក្រែន មកពីរដ្ឋាភិបាលទីក្រុងគៀវគិតថា រកស៊ីជាមួយរុស្ស៊ីនឹងអាចទទួលបានផលចំណេញច្រើន ជាងរកស៊ីជាមួយសហភាពអឺរ៉ុប។ តែបើគេពិនិត្យឲ្យបានស៊ីជ្រៅបន្តិចទៅឃើញថា បញ្ហាចម្បងមិនមែនស្ថិតតែនៅលើរឿងសេដ្ឋកិច្ចប៉ុណ្ណោះទេ តែក៏មានបង្កប់ដោយរឿងនយោបាយ និងភូមិសាស្រ្តនយោបាយដែរ។ ចូរកុំភ្លេចថា ប្រទេសអ៊ុយក្រែន គឺជាអតីតសាធារណរដ្ឋក្នុងជំនាន់សហភាពសូវៀត មានន័យថា ធ្លាប់ជាអតីតកូនចៅរបស់រុស្ស៊ីបច្ចុប្បន្ន។ ចំណែកឯរុស្ស៊ីឯណោះវិញ ក៏មិនចង់ឃើញអតីតកូនចៅរបស់ខ្លួនរត់ទៅភ្ជាប់ស្នេហ៍ល្អូតល្អឺនជាមួយអ្នកផ្សេងដែរ ពិសេសគឺជាមួយសហភាពអឺរ៉ុបដែលរុស្ស៊ីខ្លួនឯងក៏ពិបាកនឹងនិយាយចុះសម្រុងគ្នាដែរ។
ជារៀងរាល់ឆ្នំា ទឹកប្រាក់នៃការដោះដូរពាណិជ្ជកម្មរវាងរុស្ស៊ី និងអ៊ុយក្រែន គឺមានរាប់សិបពាន់លានដុល្លារ។ តែយ៉ាងណាក៏ដោយ លោកប្រធានាធិបតីអ៊ុយក្រែនបានប្រកាសធានាថា នឹងបន្តធ្វើការជាមួយអឺរ៉ុបក្នុងគោលដៅឆ្ពោះទៅបញ្ចូលអ៊ុយក្រែនជាសមាជិកសហភាពអឺរ៉ុប។ ស្របគ្នានេះ ទីក្រុងគៀវក៏បានស្នើឲ្យបង្កើតគណៈកម្មការត្រីភាគី អ៊ុយក្រែន រុស្ស៊ី និងសហភាពអឺរ៉ុបស្តីពីពាណិជ្ជកម្ម។ កម្មវត្ថុ គឺដើម្បីធានាសន្តិសុខអ៊ុយក្រែន ផ្តល់សន្ទុះសេដ្ឋកិច្ចជាមួយរុស្ស៊ី និងការរៀបចំបង្កើនទំនាក់ទំនងទីផ្សារផ្ទៃក្នុងស្មើភាពគ្នាជាមួយសហភាពអឺរ៉ុប។
លោកស្រី Catherine Ashton៖ « អនាគតអ៊ុយក្រែនត្រូវឆ្លងកាត់តាមទំនាក់ទំនងជាមួយអឺរ៉ុប »
សហភាពអឺរ៉ុបបានសម្តែងការខកចិត្ត និងសោកស្តាយខ្លំាងណាស់ចំពោះសេចក្តីសម្រេចចិត្តរបស់ប្រទេសអ៊ុយក្រែន។ សូមបញ្ជាក់ជូនថា ក្នុងប៉ុន្មានសប្តាហ៍ចុងក្រោយនេះ កិច្ចព្រមព្រៀងសហការរវាងសហភាពអឺរ៉ុប និងប្រទេសអ៊ុយក្រែនបានក្លាយជាប្រធានបទប្រទាញប្រទង់គ្នាយ៉ាងសកម្ម និងក្តៅគគុករវាងសហភាពអឺរ៉ុប និងប្រទេសរុស្ស៊ី។ អឺរ៉ុបបានធ្វើអ្វីៗគ្រប់យ៉ាងទំាងអស់ដើម្បីអូសទាញអ៊ុយក្រែនឲ្យចុះហត្ថលេខាសហការជាមួយខ្លួន។ រីឯរុស្ស៊ីក៏បានព្យាយាមទាញអ៊ុយក្រែនឲ្យមកនៅខាងខ្លួន ដោយបានគំរាមកាត់ផ្តាច់ទំនាក់ទំនងពាណិជ្ជកម្ម និងសេដ្ឋកិច្ច។
នៅមួយខែមុននេះ និងបើទោះបីជាមានការដាក់គំនាបខ្លំាងពីរុស្ស៊ីក៏ដោយ ក៏គ្រប់គ្នានៅតែមានជំនឿថា នឹងមានការចុះហត្ថលេខារវាងអឺរ៉ុប និងអ៊ុយក្រែននៅថ្ងៃខាងមុខ។ គឺទើបតែនៅក្រោយជំនួបរវាងលោកប្រធានាធិបតីរុស្ស៊ីពូទីន និងលោកប្រធានាធិបតីអ៊ុយក្រែន វ៉ិចទ័រ អ៊ីយ៉ានូកូវ៉ិចកាលពីពាក់កណ្តាលខែវិច្ចិការកន្លងទៅថ្មីៗនេះទេ ដែលទីក្រុងគៀវបានផ្លាស់ប្តូរជំហរ ១៨០អង្សារនៅនាទីចុងក្រោយរបៀបនេះ។
សម្រាប់លោកស្រីប្រមុខការទូតអឺរ៉ុប Catherine Ashton ការខកចិត្ត មិនមែនមានតែអឺរ៉ុបប៉ុណ្ណោះទេ តែក៏មានសម្រាប់ប្រជាជនអ៊ុយក្រែនដែរ។ យោងតាមលោកស្រី Ashton ជោគវាសនាអនាគតរបស់ប្រទេសអ៊ុយក្រែននឹងត្រូវឆ្លងកាត់តាមទំនាក់ទំនងជាមួយសហភាពអឺរ៉ុប គឺមិនមែនជាមួយប្រទេសរុស្ស៊ីទេ។
ក្រៅពីសហភាពអឺរ៉ុប អ្នកដែលខកចិត្តបន្ទាប់ គឺគណបក្សប្រឆំាងនៅអ៊ុយក្រែន។ ថ្នាក់ដឹកនំាគណបក្សប្រឆំាងម្នាក់បានចាត់ទុកការសម្រេចចិត្តយ៉ាងទាន់ហន់របស់លោកប្រធានាធិបតីវ៉ិចទ័រ អ៊ីយ៉ានូកូវ៉ិចថា ជាទង្វើក្បត់ជាតិ និងបានទាមទារឲ្យលោកវ៉ិចទ័រ អ៊ីយ៉ានូកូវ៉ិចចុះចេញពីតំណែងទៀតផង។ ទន្ទឹមគ្នានេះ ថ្នាក់ដឹកនំាគណបក្សប្រឆំាងរូបនោះក៏បានអំពាវនាវឲ្យរៀបចំមហាបាតុកម្មមួយនៅថ្ងៃអាទិត្យចុងសប្តាហ៍នេះ។
លោកវ៉ិចទ័រ អ៊ីយ៉ានូកូវ៉ិចកំពុងយក ក ល អន្ទាក់ !
គេអាចនិយាយបានថា ទីមួយ អ្វីដែលលោកប្រធានាធិបតីអ៊ុយក្រែនវ៉ិចទ័រ អ៊ីយ៉ានូកូវ៉ិចបានសម្រេចពេលនេះ គឺជាហានិភ័យដល់ប្រទេសជាតិសម្រាប់រយៈពេលយូរអង្វែង និងទីពីរ គេអាចនិយាយបានថា វាជាការសម្រេចចិត្តមួយសម្រាប់ភាពសុខក្សេមក្សាន្តនៃអនាគតជីវិតនយោបាយរបស់ខ្លួនក្នុងនាមជាប្រមុខរដ្ឋ។ ការហ៊ាននិយាយយ៉ាងដូចនេះ ព្រោះថា សហភាពអឹរ៉ុបបានទាមទារឲ្យលោកវ៉ិចទ័រ អ៊ីយ៉ានូកូវ៉ិចដោះលែងលោកស្រីអតីតនាយករដ្ឋមន្រ្តីអ៊ុយក្រែន យ៉ូលីយា ទីម៉ូឆេនកូដែលបច្ចុប្បន្នកំពុងជាប់ក្នុងពន្ធនាគារ និងកំពុងមានជម្ងឺធ្ងន់ រួចបញ្ជូនលោកស្រីឲ្យទៅព្យាបាលក្នុងប្រទេសអាល្លឺម៉ង់។ នេះ គឺជាលក្ខខណ្ឌមួយដែលអឺរ៉ុបបានដាក់លើអ៊ុយក្រែន មុននឹងចុះហត្ថលេខាសហការគ្នា។ តែលោកវ៉ិចទ័រ អ៊ីយ៉ានូកូវ៉ិចមិនយល់ព្រម ដោយខ្លាចការដោះលែងលោកស្រីយ៉ូលីយា ទីម៉ូឆេនកូ ជាការដោះលែងសត្វខ្លាមួយដែលនឹងអាចវិលត្រឡប់មកខំាលោកវិញនៅថ្ងៃណាមួយមិនខាន ពិសេសវិលមកឆាឆៅលោកនៅក្នុងការបោះឆ្នោតប្រធានាធិបតីថ្មីនាឆ្នំា ២០១៥ ខាងមុខ។
តែយ៉ាងណាក៏ដោយ លោកវ៉ិចទ័រ អ៊ីយ៉ានូកូវ៉ិចក៏មិនជំទាស់នឹងការបញ្ជូនលោកស្រីយ៉ូលីយា ទីម៉ូឆេនកូឲ្យទៅព្យាបាលនៅបរទេសទេ តែត្រូវគោរពលក្ខខណ្ឌមួយ នោះគឺនៅពេលព្យាបាលជា ហើយ លោកស្រីត្រូវតែវិលត្រឡប់មកស្រុកកំណើតវិញដើម្បីបញ្ចប់ទោសរបស់ខ្លួន។ តែអ្វីដែលលោកវ៉ិចទ័រ អ៊ីយ៉ានូកូវ៉ិចហាក់ដូចជាបានមើលរំលងនោះគឺថា អនាគតនយោបាយរបស់លោកក៏វាអាស្រ័យលើជំហររបស់ប្រទេសរស្ស៊ីរបស់លោកប្រធានាធិបតីពូទីនផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ