ដំណើរផ្លូវដ៏វែងឆ្ងាយនៃការបង្កើតសហភាពធនាគារអឺរ៉ុប
ចុះផ្សាយនៅថ្ងៃ៖
ស្តាប់ - ០៣:៥៨
តាំងពីថ្ងៃចន្ទមក មានបើកសប្តាហ៍ហិរញ្ញវត្ថុអឺរ៉ុប នៅ Francfort ដោយមានអ្នកឯកទេស ៥៥០នាក់ និងភ្ញៀវចូលរួមប្រមាណមួយម៉ឺននាក់។ ជាការជួបជុំគ្នាដ៏សំខាន់មួយនៅអឺរ៉ុង ក្នុងវិស័យហិរញ្ញវត្ថុ និងធានារ៉ាប់រង។ កម្មវត្ថុនេះជំនួបនេះ គឺពិភាក្សាអំពីទីផ្សារហិរញ្ញវត្ថុ ប៉ុន្តែជាឱកាសមួយសម្រាប់បូកសរុបនយោបាយសេដ្ឋកិច្ចនៅអឺរ៉ុប។
កាលពីថ្ងៃទី ១៥ វិច្ឆិកា សប្តាហ៍មុន ជាលើកទីមួយ ក្នុងប្រវត្តិតំបន់ចាយប្រាក់អឺរ៉ូ ដែលគណៈកម្មការអឺរ៉ុប បានចេញរបាយការណ៍វាយតម្លៃគម្រោងថវិកា និងការចាយវាយសាធារណៈ ប្រចាំឆ្នាំ២០១៤របស់ប្រទេសជាសមាជិក។ ថ្វីបើជាទូទៅ គណៈកម្មការឯកភាពថាប្រទេសក្នុងតំបន់អឺរ៉ូ បានឆ្លើយតបទៅនឹងពាក្យសន្យាកាត់បន្ថយឱនភាពជាតិមែន ប៉ុន្តែការរិះគន់ក៏មានច្រើន។ ប្រទេសបែលហ្សិក និងហូឡង់ មានសុខភាពសេដ្ឋកិច្ចល្អ ដោយសារតែចេះកាត់បន្ថយចំណាយសាធារណៈ ហើយអៀឡង់ អាចនឹងលែងពឹងពាក់ជំនួយហិរញ្ញវត្ថុអឺរ៉ុប ក៏ព្រោះតែការខិតខំប្រឹងប្រែង កំពុងផ្តល់ផ្លែផ្កាជាបណ្តើរៗ។
គឺប្រទេសនៅតំបន់ភាគខាងត្បូងទេ ដែលត្រូវព្រួយបារម្ភខ្លាំង ខ្លាចដើរខុសផ្លូវនោះ។ នៅ អ៊ីតាលី ប្រាក់បំណុលអាចនឹងកើនឡើងដល់ទៅ ១៣៤%នៃផលិតផលសរុបក្នុងស្រុក នាឆ្នាំក្រោយ។ អេស្ប៉ាញវិញ សង្ឃឹមដើរចេញពីកម្មវិធីជំនួយអន្តរជាតិបាន ប៉ុន្តែត្រូវប្រឈមខ្លាំងនឹងបញ្ហាអត់ការងារធ្វើ។ អត្រានៅខ្ពស់មិនធ្លាប់មានដដែល។
ចុះប្រទេសបារាំង ?! គណៈកម្មការបានផ្តល់ភ្លើងខៀវ ព្រមព្រៀងទទួលយកគម្រោងថវិកាបារាំងប្រចាំឆ្នាំ២០១៤ ប៉ុន្តែសម្រាប់អំណាចប្រតិបត្តិអឺរ៉ុបមួយនេះ ក្រុងប៉ារីសអស់ផ្លូវដើររលីង គ្មានមធ្យោបាយអ្វីផ្សេងសម្រាប់ជួយសង្គ្រោះ និងស្រោចស្រង់ ឱនភាពថវិកាឡើយ ដូច្នេះបើមានបញ្ហាអ្វីបន្តិច គឺពិតជាវីវរ មិនអាចសម្រេចកម្មវត្ថុដែលបានចែងក្នុងគម្រោងថវិកាឡើយ។
ដូច្នេះសួរថាមានគំរូសេដ្ឋកិច្ចណាដែលអឺរ៉ុបគួរយកប្រើបាន នាពេលនេះ ?
ប្រទេសអាល្លឺម៉ង់ លែងជាគំរូល្អ សម្រាប់គ្រប់គ្នាគួរឱ្យយកតម្រាប់តាម ទៀតហើយ។ អឺរ៉ុប និងប្រទេសជាប់មហាសមុទ្ទអាត្លង់ទិចដទែទៀត សុទ្ធតែបានបញ្ចេញសំឡេងរិះគន់ ភាពរឹងឆ្កើតផ្នែកថវិកា និងសល់ផលពាណិជ្ជកម្មអាល្លឺម៉ង់ខ្លាំងណាស់។ គណៈកម្មការអឺរ៉ុប ថែមទាំងបានប្រកាសបើកអង្កេតលើនយោបាយសេដ្ឋកិច្ចអាល្លឺម៉ង់ទៀតផង កាលពីថ្ងៃទី ១២វិច្ឆិកា។
« មានការអំពាវនាវឱ្យអាល្លឺម៉ង់ប្រកាន់ឥរិយាបថសហការជាងមុនបន្តិច និងផ្តល់សន្ទុះដល់វិស័យណាដែលអាចគាំទ្រឱ្យមានសេចក្តីត្រូវការក្នុងស្រុក និងការនាំចូល។ ព្រោះប្រការទាំងពីរនេះ នឹងអាចជួយដៃគូសំខាន់ៗនៅអឺរ៉ុបបាន។ នេះជាទស្សនៈរបស់អ្នកឯកទេសសេដ្ឋកិច្ចម្នាក់។
យ៉ាងណាមិញ អាល្លឺម៉ង់ មិនមែនត្រូវជាប្រទេសតែមួយ ដែលជាអ្នកកំណត់បង្ខំផ្នែកថវិកាទេ។ សម្ពាធនេះ ត្រូវធ្លាក់មកពីខាងទីផ្សារ ដែលម្ចាស់បំណុលរបស់ប្រទេសនោះ។ ចំណែកឯនយោបាយរូបិយវត្ថុ ដែលអាល្លឺម៉ង លើកផែនការឡើងវិញ ធនាគារកណ្តាលអឺរ៉ុប បានដកខ្លួនមិននៅបៀបទេ ដោយបានសម្រេចបញ្ចុះអត្រាការប្រាក់ផង។
អធិការកិច្ចរួម
គម្រោងបង្កើតសហភាពធនាគារអឺរ៉ុប ដែលកំពុងសិក្សាតាំងពីចុងខែមិថុនាឆ្នាំ២០១២មក មានកម្មវត្ថុចង់បង្កើតឱ្យមានគណៈកម្មការត្រួតពិនិត្យរួមតែមួយ។ សហភាពធនាគារដែលនឹងមាននាទីមកកាត់ផ្តាច់ ដំណើរវិលវល់គ្មានច្រកចេញនៃវិបត្តិធនាគារនិងបំណុលសាធារណៈ ដោយបង្កើតជាយន្តការសាមគ្គីភាពអន្តរធនាគារ។ ប៉ុន្តែដើម្បីឱ្យយន្តការទាំងអស់នេះអាចចេញជារូបរាង និងមានដំណើរបាន ប្រទេសជាសមាជិកទាំងអស់ ចាំបាច់ត្រូវតែព្រមព្រៀងផ្ទេរព័ត៌មាន (មិនថាជានយោបាយក្នុងវិស័យធនាគារ នយោបាយត្រួតពិនិត្យ ឬជំនួយការធនាគារពេលមានវិបត្តិ) ក្នុងកំរិតថ្នាក់ជាតិ ឱ្យទៅជាថ្នាក់អឺរ៉ុប។ ដូច្នេះឃើញថា ជាការដ្ឋានដ៏ធំសម្បើម ទាំងផ្នែកនយោបាយនិងច្បាប់។
ប្រទេសចាយប្រាក់អឺរ៉ូ បានបង្កើតយន្តការត្រួតពិនិត្យរួមតែមួយ ដែលមានធនាគារកណ្តាលអឺរ៉ុបជាតាមដានឃ្លាំមើលសកម្មភាពធនាគារ ក្នុងកំរិតតំបន់អឺរ៉ូ។ ធនាគារកណ្តាលអឺរ៉ុបនេះ មានបេសកកម្មទទួលបន្ទុកធ្វើអធិការកិច្ច ចាប់ពីថ្ងៃទី៤ វិច្ឆិកា២០១៤ទៅ ពោលគឺ១២ខែក្រោយ ការចូលជាធរមាននៃច្បាប់។ ប៉ុន្តែចំណោទនៅត្រង់ថា ក្នុងដំណាក់កាលបន្ត តើគេត្រូវដោះស្រាយវិបត្តិធនាគារតាមវិធីណា ?! បើប្រទេសនីមួយៗសុទ្ធតែអាត្មានិយម មិនចង់ចំណាយប្រាក់ជួយអ្នកជិតខាងនោះ ?! តើគណៈកម្មការអឺរ៉ុប ត្រូវជួយសង្គ្រោះ ឬអត់ធនាគារក្ស័យធន ? ចម្លើយគឺចម្រូងចម្រាសគ្នាខ្លាំងណាស់។ អឺរ៉ុបសន្យារកឱ្យឃើញកិច្ចព្រមព្រៀងនៅចុងឆ្នាំនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ