អឺរ៉ុបត្រូវត្រៀមប្រយុទ្ធប្រឆាំងនឹងការឡើងថ្លៃឧស្ម័ន ប្រសិនវិបត្តិអ៊ុយក្រែន-រុស្ស៊ីកាន់តែដុនដាប
ចុះផ្សាយនៅថ្ងៃ៖
ស្តាប់ - ០៣:៣២
ការពារប្រសើរជាងព្យាបាល ! ដោយមិនរង់ចាំដល់រដូវត្រជាក់ រដូវធ្លាក់ទឹកកក ភាពតានតឹងជាមួយរុស្ស៊ីដោយហេតុវិបត្តិអ៊ុយក្រែន បានជំរុញឱ្យអឺរ៉ុបត្រៀមខ្លួន និងរៀបចំជើងព្រួលប្រយុទ្ធប្រឆាំងនឹងគ្រោះតម្លៃឧស្ម័នឡើងថ្លៃ ប្រសិនបើរុស្ស៊ីកាច់បិទបំពង់បង្ហូរហ្កាសដែលហូរកាត់តាមប្រទេសអ៊ុយក្រែន។ តើអឺរ៉ុបកំពុងរៀបចំយុទ្ធសាស្ត្រដោះស្រាយបែបណា ចំពោះបញ្ហានេះ ?
បើតាមទិន្នន័យឆ្នាំ២០១៣របស់គណៈកម្មការអឺរ៉ុប សហភាពអឺរ៉ុបនាំចូលឧស្ម័នហ្កាសពីរុស្ស៊ី ចំនួន ១៣៣ពាន់លានម៉ែត្រគូប ដោយមានពាក់កណ្តាល បង្ហូរតាមបំពង់ឆ្លងកាត់ប្រទេសអ៊ុយក្រែន។
ក្នុងករណី រុស្ស៊ីខឹងកាច់បិទបំពង់ឧស្ម័ន ដូចធ្លាប់កើតមានម្តងនៅឆ្នាំ២០០៩ ពេលរុស្ស៊ីនិងអ៊ុយក្រែនមានជម្លោះពាណិជ្ជកម្មនឹងគ្នា គេត្រូវស្វែងរកប្រភពថាមពលផ្សេងមកបំពេញកង្វះខាតនេះ ជាពិសេសបើវិបត្តិធ្លាក់ចំរដូវត្រជាក់ ដែលជាពេលត្រូវការថាមពលខ្លាំង។ វិបត្តិឆ្នាំ២០០៩ ជាមេរៀន ហើយពេលនេះសហភាពអឺរ៉ុបមានសមត្ថភាពទប់ទល់នឹងវិបត្តិហ្កាសបានច្រើនជាងមុន។
សម្រាប់រយៈពេលខ្លី អឺរ៉ុបអាចមានដំណោះស្រាយបី ៖ ងាកទៅប្រើបំពង់បង្ហូរឧស្ម័នផ្សេងទៀត ប្រមូលទិញស្តុកទុក និងទិញឧស្ម័នរាវធម្មជាតិ ដែលអាចដឹកជញ្ជូនបានតាមនាវា។ តាំងពីឆ្នាំ២០១១មក រុស្ស៊ីនិងអាល្លឺម៉ង់ បានតភ្ជាប់ដោយផ្ទាល់បំពង់ឧស្ម័ន ក្រោមសមុទ្ទបាល់ទិក ដែលមានសមត្ថភាពផ្គត់ផ្គង់ឧស្ម័នប្រមាណ៥៥ពាន់លានម៉ែត្រគូប និង៣០ពាន់លានម៉ែត្រគួប តាមបំពង់យ៉ាម៉ាល។ ប៉ុន្តែដើម្បីបង្កើនបរិមាណឧស្ម័នតាមផ្លូវពីរនេះ គេត្រូវតែចរចាជាមួយក្រុមហ៊ុនGazpromរបស់រុស្ស៊ី។ ជាសំណាងល្អ ថ្វីបើសហភាពអឺរ៉ុប មាននយោបាយខ្សោយ តែក្រុមហ៊ុនហ្កាសរុស្ស៊ីដ៏គ្មានប្រៀបខ្លាំងប៉ុន្មានលើអឺរ៉ុបដែរ ព្រោះប្រាក់ចំណូលពាក់កណ្តាលរបស់ក្រុមហ៊ុនយក្សរុស្ស៊ីនេះ បានមកពី ការលក់ឧស្ម័នឱ្យអឺរ៉ុប។ វិបត្តិឆ្នាំ២០០៩ បានធ្វើឱ្យក្រុមហ៊ុនខាតបង់និងខូចរូបភាពច្រើន។
បណ្តាប្រទេសជាសមាជិកសហភាពអឺរ៉ុបមួយចំនួន មានជាអាទិ៍ ប៊ុលហ្ការី ហ្វាំងឡង់ ប៉ូឡូញ ឬស្លូវាគី រស់រំពឹងលើការនាំចូលឧស្ម័នរុស្ស៊ីក្នុងទំហំ៧០% ប៉ុន្តែបែងចែកឧស្ម័នបំរុងទុក ក្នុងក្របខ័ណ្ឌសាមគ្គីភាពអឺរ៉ុប អាចជួយបណ្តោះទ័លបាន។ បើតាមអ្នកវិភាគ ទីផ្សារថាមពល អឺរ៉ុបមានសមត្ថភាពឧបត្ថម្ភឧស្ម័នបាន៧៤ថ្ងៃ។
ម្យ៉ាងវិញទៀត ស្ថាប័នអឺរ៉ុបទទួលបន្ទុកលើកិច្ចសហប្រតិបត្តិកាឧស្ម័ន បានជួបប្រជុំគ្នាធ្វើការសិក្សាលើប្រធានបទនេះ ដោយខិតខំតាក់តែងច្បាប់និងវិធាន ធ្វើយ៉ាងណាឱ្យអឺរ៉ុបអាចបង្វិលប្រើបំពង់បង្ហូរឧស្ម័នមួយណាក៏បានតាមត្រូវការ។ សម្រាប់ក្រុមឧស្សាហកម្ម ចំណាត់ការផ្នែកចាត់ចែងស្តុកឧស្ម័នកំរិតអឺរ៉ុប ជាការចាំបាច់ ទើបអឺរ៉ុបមិនត្រូវការនាំចូលច្រើនឧស្ម័នរាវធម្មជាតិ។ ដូច្នេះជាសរុបមក ដំណោះស្រាយមានតែមួយគឺនយោបាយ និងដែលត្រូវតែត្រៀមរៀបចំជាមុនឱ្យល្អិតល្អន់បំផុត។ ការនាំចូលឧស្ម័នរាវធម្មជាតិ តិចតួចមិនជាថ្វីឡើង តែបើច្រើនវិញ នោះនឹងអាចមានបញ្ហាជាប្រាកដ។ ព្រោះតម្លៃឧស្ម័នប្រភេទនេះថ្លៃខ្ពស់ជាងឧស្ម័នរុស្ស៊ី។ ឧស្ម័ននេះមានចរាចរណ៍លក់ដូរជាពិសេសតែនៅតំបន់អាស៊ី ក្នុងតម្លៃថ្លៃជាង ស្ទើរតែពីរដងនៅ អឺរ៉ុប។
សម្រាប់ក្រុមអ្នកឧស្សាហកម្ម ប្រភពថាមពល ជាបញ្ហាគ្រឹះ ដែលមានលក្ខណៈស៊ីជម្រៅខ្លាំងណាស់ ! ហ្កាសអាចជួបគ្រោះនាពេលអនាគត ព្រោះគណៈកម្មការអឺរ៉ុប កំពុងតាក់តែងផែនការថ្មីស្តីពីថាមពលនិងអាកាសធាតុ សម្រាប់ឆ្នាំ២០៣០ ដោយផ្តល់តម្លៃខ្លាំងដល់ថាមពលមិនចេះរីងស្ងួត។ សព្វថ្ងៃនេះ ហ្កាសត្រូវបានចាត់ទុកជាប្រភពថាមពលអន្តរកាល មិនសូវបំពុលបរិស្ថាន បំពុលតិចជាងធ្យូងថ្ម យកបន្ថែមលើថាមពលមិនចេះរីងស្ងួតបាន។ ប៉ុន្តែបើបញ្ហាផ្នែកចាត់ចែងទុក អ្នកនយោបាយក៏អាចកំរិតការប្រើប្រាស់ ប្រភពថាមពលប្រេង ឬហ្កាសនេះផងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ