សហភាពអឺរ៉ុបព្រមានចាត់វិធានការប្រឆាំងរដ្ឋាភិបាលអ៊ុយក្រែនក្រោយពីមានអំពើហិង្សាបង្រ្កាបបាតុកម្ម
នៅល្ងាចថ្ងៃពុធ ប្រធានគណៈកម្មការអឺរ៉ុបបានអំពាវនាវឲ្យបញ្ឈប់អំពើហិង្សា នៅក្នុងប្រទេសអ៊ុយក្រែន ព្រមទាំងបានព្រមានអាជ្ញាធរអ៊ុយក្រែនថា អឺរ៉ុបអាចនឹងចាត់វិធានការទៅលើអ៊ុយក្រែន ប្រសិនបើអំពើហិង្សានៅតែបន្តកើតមាន។ ការព្រមានរបស់សហភាពអឺរ៉ុបបានកើតមានឡើង ក្រោយពីប៉ូលិសអ៊ុយក្រែនបានប្រើកម្លាំងបង្រ្កាបទៅលើបាតុករប្រឆាំង បណ្តាលឲ្យមនុស្សយ៉ាងតិច ២នាក់ត្រូវបាត់បង់ជីវិត នៅព្រឹកថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤១
“យើងមានក្តីរន្ធត់ដែលបានឮអំពីការស្លាប់បាតុករ នៅក្នុងប្រទេសអ៊ុយក្រែន ហើយយើងសូមធ្វើការថ្កោលទោសយ៉ាងខ្លាំងក្លាបំផុត ចំពោះការប្រើកម្លាំង និងអំពើហិង្សា” នេះគឺជាការថ្លែងរបស់លោក José Manuel Barroso ប្រធានគណៈកម្មការអឺរ៉ុប នៅថ្ងៃពុធនេះ។
កាលពីព្រឹកថ្ងៃពុធ បាតុករ ២នាក់ត្រូវស្លាប់ដោយគ្រាប់កាំភ្លើង នៅក្នុងពេលដែលប៉ូលិសអ៊ុយក្រែនបានប្រើកម្លាំងបង្រ្កាបបាតុកម្មប្រឆាំងរដ្ឋាភិបាល ដែលបានអូសបន្លាយពេលជាច្រើនសប្តាហ៍មកហើយ។
លោក José Manuel Barroso បានប្រាប់អ្នកសារព័ត៌មានថា លោកមានក្តីព្រួយបារម្ភ ចំពោះស្ថានភាពកាន់តែដុនដាប នៃវិបត្តិនៅអ៊ុយក្រែន ហើយថា សហភាពអឺរ៉ុបកំពុងតាមដានយ៉ាងដិតដល់នូវស្ថានការណ៍នៅអ៊ុយក្រែន ហើយកំពុងតែសិក្សាអំពីវិធានការមួយចំនួន ដែលសហភាពអឺរ៉ុបអាចដាក់ចេញ ចំពោះអាជ្ញាធរអ៊ុយក្រែន។
លោកប្រធានគណៈកម្មការអឺរ៉ុបមិនបានបញ្ជាក់លម្អិតថាតើវិធានការទាំងនេះជាអ្វីនោះទេ ក៏ប៉ុន្តែ មន្រ្តីសហភាពអឺរ៉ុបបានឲ្យដឹងថា ស្នងការអឺរ៉ុបទទួលបន្ទុកការទទួលសមាជិកថ្មី គ្រោងនឹងធ្វើដំណើរទៅប្រទេសអ៊ុយក្រែន នៅថ្ងៃសុក្រខាងមុខ ដើម្បីជួបជាមួយតំណាងរដ្ឋាភិបាល និងតំណាងក្រុមប្រឆាំង ក៏ដូចជា សង្គមស៊ីវិល អ៊ុយក្រែន។
ក្រៅពីសហភាពអឺរ៉ុប ការថ្កោលទោសចំពោះការប្រើកម្លាំងបង្រ្កាបបាតុកម្ម នៅអ៊ុយក្រែន ក៏បានកើតមានផងដែរ ពីសំណាក់សហរដ្ឋអាមេរិក និងពីអង្គការអូតង់។ មន្រ្តីសេតវិមានក៏បានព្រមានថានឹងដាក់ទណ្ឌកម្មទៅលើអ៊ុយក្រែនដែរ ប្រសិនបើការប្រើកម្លាំងបង្រ្កាបបាតុកម្មនៅតែបន្តកើតមាន។
ផ្ទុយពីប្រទេសលោកខាងលិច រុស្ស៊ីវិញបានចេញមុខការពារចំណាត់ការរបស់អាជ្ញាធរអ៊ុយក្រែន ព្រមទាំងបានរិះគន់ក្រុមប្រឆាំងថាបានរំលោភរដ្ឋធម្មនុញ្ញរបស់អ៊ុយក្រែន។ អនុរដ្ឋមន្រ្តីក្រសួងការបរទេសរុស្ស៊ីបានរិះគន់ការបញ្ចេញប្រតិកម្មពីសំណាក់សហភាពអឺរ៉ុប និងសហរដ្ឋអាមេរិក ថាជាការជ្រៀតជ្រែកចូលក្នុងកិច្ចការផ្ទៃក្នុងរបស់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ