ហេតុអ្វី អាមេរិកពិបាកយកប្រៀបលើអង្គការរដ្ឋអ៊ីស្លាម នៅស៊ីរីនិងអ៊ីរ៉ាក់ ?
ចុះផ្សាយនៅថ្ងៃ៖
ស្តាប់ - ០៤:០៤
ជាងពីរខែក្រោយការបើកយុទ្ធនាការផ្លូវអាកាសនៅអ៊ីរ៉ាក់និងស៊ីរី សម្ព័ន្ធអន្តរជាតិដឹកនាំដោយសហរដ្ឋអាមេរិក បានទប់ស្កាត់ និងស្រោចស្រង់ក្រុងកូបាណេ នៅស៊ីរី មិនឱ្យធ្លាក់ក្នុងកណ្តាប់ដៃពួកអង្គការរដ្ឋអ៊ីស្លាមមែន ប៉ុន្តែប្រតិបត្តិការនេះមិនអាចបញ្ឈប់ពួកជីហាតកុំឱ្យរុលទៅមុខនៅតាមទិសដៅផ្សេងៗបានទេ។ តើនេះមកពីពួកជីហាតមានកម្លាំងខ្លាំង ឬក៏មកពីយុទ្ធសាស្ត្រសហរដ្ឋអាមេរិកមានចំណុចខ្សោយច្រើន ?
តុល្យការនៃប្រតិបត្តិការវាយប្រហារផ្លូវអាកាស ចាប់ផ្តើមតាំងពីថ្ងៃទី ៨ សីហា ដោយសហរដ្ឋអាមេរិក និងសម្ព័ន្ធមិត្តជាបន្តបន្ទាប់ គ្មានលទ្ធផលត្រចះត្រចង់សោះ។ អង្គការរដ្ឋអ៊ីស្លាម នៅតែបន្តរុលទៅមុខ ដណ្តើមកាន់កាប់ ពង្រឹងការត្រួតត្រា លើទឹកដីនៅភាគខាងលិចអ៊ីរ៉ាក់។
ប៉ុន្តែអ្នកទទួលខុសត្រូវអាមេរិក នៅតែអះអាងការពារខ្លួន កុំឱ្យឆាប់ធ្វើសេចក្តីសន្និដ្ឋាននៅពេលនេះពេក ដោយសំអាងថាកងកម្លាំងអ៊ីរ៉ាក់និងគួដមិនទាន់បានបញ្ចេញសមត្ថភាពរួមគ្នានៅឡើយ សម្រាប់ប្រយុទ្ធប្រឆាំងនឹងអង្គការជីហាតរដ្ឋអ៊ីស្លាម។ បើតាមអ្នកទទួលខុសត្រូវជាន់ខ្ពស់នៃរដ្ឋបាលនិងយោធាអាមេរិក កងទ័ពអ៊ីរ៉ាក់ ត្រូវការពេលវេលាជាច្រើនខែទៀត ទើបអាចមានសមត្ថភាពតតាំងជាមួយពួកជីហាតនៅភាគខាងលិច និងខាងជើងប្រទេសបាន។ ម្យ៉ាងវិញទៀតកងកម្លាំងយោធានៅតាមតំបន់កុលសម្ព័ន្ធ ក៏មិនទាន់ត្រូវបានគៀងគ ឱ្យមកបង្រួបបង្រួមកម្លាំងធ្វើសង្គ្រាមដែរ ព្រោះមេដឹកនាំរង់ចាំមើលនយោបាយបើកចំហរបស់នាយករដ្ឋមន្ត្រីអ៊ីរ៉ាក់ថ្មីសិន។
នៅកូប៉ាណេ ក្រុងស៊ីរីជាប់ព្រំដែនប្រទេសតួកគីវិញ កងកម្លាំងគួដ មិនត្រឹមតែទប់ទល់ទេ តែថែមទាំងបានរុញច្រានពួកជីហាតរដ្ឋអ៊ីស្លាម ឱ្យថយក្រោយវិញបាន។ សម្រាប់វ៉ាស៊ីនតោនជោគជ័យនេះ គឺដោយសារតែអាមេរិកធ្វើការទម្លាក់គ្រាប់បែកច្រើន តាមផ្លូវអាកាស។
ជាការពិតដែលថាអាមេរិក អាចបង្អាក់ពួកអង្គការរដ្ឋអ៊ីស្លាម មិនឱ្យស្រែកជយោ ដណ្តើមយកក្រុងកូបាណេបានមែន ប៉ុន្តែនៅលើសមរភូមិ ស្ថានភាពកំពុងទ័លច្រកខ្លាំង សម្រែកដង្ហើយសុំជំនួយយ៉ាងអស់សង្ឃឹមរបស់ពលរដ្ឋគួដ និងចម្លើយត្រជាក់ល្អឹមរបស់តួកគី បញ្ជាក់យ៉ាងច្បាស់អំពីភាពប្រេះឆាក្នុងរង្វង់សម្ព័ន្ធអន្តរជាតិប្រឆាំងនឹងរដ្ឋអ៊ីស្លាម។
ហេតុអ្វីបានជាដូច្នេះ ?! កម្មវត្ថុរបស់សហរដ្ឋអាមេរិកមិនអាចសម្រេចបាន ក៏ព្រោះតែផលប្រយោជន៍របស់ដៃគូ ផ្ទុយគ្នាស្រលះ។ សម្ព័ន្ធអន្តរជាតិប្រឆាំងនឹងពួកជីហាត មានលក្ខណៈផុយស្រួយ បើប្រៀបទៅសម្ព័ន្ធភាពក្នុងពេលធ្វើសង្គ្រាមនៅ ឈូងសមុទ្ធពែរ្ស កាលពីឆ្នាំ១៩៩១ ដែលមាន សហរដ្ឋអាមេរិក បានចាប់ដៃជាធ្លុងមួយជាមួយរដ្ឋក្នុងតំបន់ រហូតបានទទួលជ័យជំនះ។
តួនាទីរបស់តួកគី សម្ព័ន្ធមិត្តដ៏សំខាន់របស់អាមេរិកប្រចាំតំបន់ បានក្លាយជាប្រភពនៃភាពតានតឹងអត់ដាច់។ អាមេរិកមិននឹងស្មានដល់ថាក្រុងអង់ការ៉ា មានចិត្តមានៈដាច់ខាតខ្លាំងឈរមើលពលរដ្ឋគួដតស៊ូលើសមរភូមិប្រយុទ្ធប្រឆាំងនឹងពួកជីហាតម្នាក់ឯងដូច្នេះសោះ។ ឥលូវប្រហែលដល់ពេលដែលអាមេរិកត្រូវសងជំងឺចិត្តនូវអ្វីដែលខ្លួនបានធ្វើហើយ ! តួកគី និងបណ្តាប្រទេសអារ៉ាបមួយចំនួន ខឹងសម្បារខ្លាំងនឹងវ៉ាស៊ីនតោនដែលបដិសេធមិនព្រមចូលធ្វើអន្តរាគមន៍ទម្លាក់របបដឹកនាំស៊ីរី របស់លោក បាស្ហារ អាល់អាសាដ បើទោះបីជាដាម៉ាសហ៊ានល្មើសនឹងបម្រាមអាមេរិកទៅហើយ។
ចំណែកខាងសម្ព័ន្ធភាពអឺរ៉ុបវិញ អឺរ៉ុបចែករំលែកយុទ្ធនាការនៅអ៊ីរ៉ាក់ តែបដិសេធមិនបញ្ជូនយន្តហោះទៅស៊ីរីទេ។ កម្មវត្ថុនៃសង្គ្រាមមិនត្រូវបានកំណត់ដោយច្បាស់លាស់ សម្រាប់ដៃគូជាសម្ព័ន្ធមិត្តសោះ ! បញ្ហានយោបាយប៉ះពាល់យ៉ាងខ្លាំងដល់យុទ្ធសាស្ត្រយោធា។ នេះបើតាមអ្នកទទួលបារាំងសុំមិនបញ្ចេញឈ្មោះ។
ដំបូងឡើយ សម្ព័ន្ធអន្តរជាតិចង់បញ្ឈប់ការរុលទៅមុខរបស់ពួកជីហាត ដោយប្រើរនាំងគ្រាប់ ទម្លាក់ពីលើមេឃ ដើម្បីទុកឱកាសឱ្យកម្លាំងយោធាអ៊ីរ៉ាក់មានពេលសមហាត់បង្កើនសមត្ថភាពវាយបក។ ប៉ុន្តែជាមួយប្រតិបត្តិការបាញ់តាមផ្លូវអាកាស៦៣០ដងនៅស៊ីរីនិងអ៊ីរ៉ាក់ហើយ ពួកអង្គការរដ្ឋអ៊ីស្លាមនៅតែតែងអាចរុលទៅមុខបានទៀត ទើបមជ្ឈមណ្ឌលយុទ្ធសាស្ត្រអាមេរិកភ្ញាក់ខ្លួនដឹងថាកងទ័ពអ៊ីរ៉ាក់ខ្សោយជាងការគិតទុកពីមុន។
ដោយឡែក យុទ្ធនាការផ្លូវអាកាស មានសន្ធឹកស្រាលជាងប្រតិបត្តិការអូតង់នៅលីប៊ី កាលពីឆ្នាំ២០១១ឆ្ងាយណាស់។ ការកំរិត ដើម្បីបង្ការកុំឱ្យមានជនស៊ីវិលរងគ្រោះច្រើននេះបានក្លាយជាប្រភពនៃការព្រួយបារម្ភសម្រាប់អ្នកវិភាគយោធាទៅវិញ។ អ្នកខ្លះយល់ថា អាមេរិកមានកំហុសយុទ្ធសាស្ត្រ ព្រោះក្នុងពេលដែលគេត្រូវការព្យុះភ្លៀង អាមេរិកបែរជាគ្រាន់តែបោះទឹកទៅវិញ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ