ការបោះឆ្នោតនៅបារាំងនិងវិបត្តិនយោបាយនៅហូឡង់ធ្វើឲ្យទីផ្សារហិរញ្ញវត្ថុស្លន់ស្លោ
ការលាឈប់ពីមុខតំណែងដោយប្រមុខរដ្ឋាភិបាលហូឡង់ និងលទ្ធផលនៃការបោះឆ្នោតជ្រើសតាំងប្រធានាធិបតីបារាំងនៅជុំទីមួយ ហើយនិងតួលេខពុំល្អនៃសកម្មភាពសេដ្ឋកិច្ចនៃតំបន់អឺរ៉ូបានធ្វើឲ្យទីផ្សារហិរញ្ញវត្ថុបារម្ភយ៉ាងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០៤
នៅក្នុងបរិបទមួយដ៏សែនផុយស្រួយស្រាប់ដែលគេបារម្ភពីសមត្ថភាពរបស់ប្រទេសអឺរ៉ុបមួយចំនួនក្នុងការប្រយុទ្ធកាត់បន្ថយឧនភាពសាធារណៈ លទ្ធផលនៃការបោះឆ្នោតជ្រើសតាំងប្រធានាធិបតីបារាំងនៅជុំទីមួយដែលបង្ហាញឲ្យឃើញពីជោគជ័យរបស់បេក្ខជននៃបក្សសង្គមនិយម François Hollande បានធ្វើឲ្យវិនិយោគិននិងទីផ្សារហិរញ្ញវត្ថុកើតមានក្តីបារម្ភយ៉ាងខ្លាំង។
ដូច្នេះ លទ្ធផលនៃការបោះឆ្នោតជ្រើសតាំងប្រធានាធិបតីបារាំងនៅជុំទីមួយ ហើយនិងការបាត់បង់ទំនុកចិត្តទៅលើសមត្ថភាពនៃប្រទេសក្នុងតំបន់អឺរ៉ូគឺពិតជាកត្តាដ៏អវិជ្ជមានមកគាបសង្កត់ទៅលើទីផ្សារហិរញ្ញវត្ថុ។
ភាពពុំជាក់ច្បាស់នៃការបោះឆ្នោតជ្រើសតាំងប្រធានាធិបតីបារាំងនៅជុំទីពីរ បូកបន្ថែមនឹងបញ្ហាទំនាក់ទំនងបារាំង-អាល្លឺម៉ង់ ហើយនិងការចចារជាយថាហេតុពាក់ព័ន្ធនឹងសន្ធិសញ្ញាអឺរ៉ុបក៏ជាកត្តាដ៏អវិជ្ជមានមកដាក់សម្ពាធបន្ថែមទៅលើទីផ្សារ។ ហើយជោគជ័យរបស់បេក្ខជននៃបក្សសង្គមនិយម François Hollande នៅថ្ងៃទី៦ឧសភាខាងមុខក៏អាចធ្វើឲ្យលោកស្រីនាយករដ្ឋមន្ត្រីអាល្លឺម៉ង់ Angela Merkel បាត់បង់ដៃគូដ៏សំខាន់មួយរូបដូចជាលោកនីកូឡាសាកូហ្ស៊ីក្នុងការប្រយុទ្ធទប់ទល់នឹងវិបត្តិសេដ្ឋកិច្ចនិងវិបត្តិហិរញ្ញវត្ថុនារយៈប៉ុន្មានឆ្នាំចុងក្រោយនេះ។
វិបត្តិនយោបាយនៅប្រទេសហូឡង់ក៏ជាកត្តាមួយទៀតមកធ្វើឲ្យស្ថានភាពទីផ្សារហិរញ្ញវត្ថុធ្លាក់ស្រុតចុះមួយកម្រិត។ លោកនាយករដ្ឋមន្ត្រីហូឡង់ Mark Rutte នៃរដ្ឋាភិបាលកណ្តាលនិយមលំអៀងស្ដាំបានលាឈប់ពីមុខតំណែងកាលពីថ្ងៃចន្ទម្សិលមិញ ក្រោយពីមានបរាជ័យកាលពីថ្ងៃសៅរ៍កន្លងទៅក្នុងកិច្ចចចារដើម្បីធ្វើការកាត់បន្ថយឧនភាពសាធារណៈ។
គួរកត់សម្គាល់ថា ក្រោយពីមានបរាជ័យក្នុងកិច្ចចចារអស់រយៈ៧សប្តាហ៍ ជាមួយសមាជិកនៃរដ្ឋាភិបាលចម្រុះហូឡង់ ស្ដីពីវិធានការសម្រាប់សំចៃឲ្យបានប្រាក់ប្រមាណ១៦ពាន់លានអឺរ៉ូដើម្បីធ្វើការកាត់បន្ថយឧនភាពសាធារណៈរបស់ប្រទេសហូឡង់ដែលបានកើនឡើងដល់៤,៧%នៃផលិតផលដុលសរុបនៅឆ្នាំ២០១១ ដែលជាកម្រិតមួយខ្ពស់ជាងកំណត់ប្រក្រតី៣%សម្រាប់តំបន់អឺរ៉ូ។
ក្រៅពីនេះ សកម្មភាពនៃឧស្សាហកម្មកម្មន្តសាលរបស់ប្រទេសចិនដែលធ្លាក់ស្រុតចុះនៅខែមេសានេះក៏ជាសញ្ញាមួយបង្ហាញឲ្យឃើញពីការធ្លាក់ស្រុតនៃសកម្មភាពសេដ្ឋកិច្ចពិភពលោកផងដែរ។ ហើយសកម្មភាពធ្លាក់ស្រុតចុះក្នុងវិស័យឯកជននៅក្នុងតំបន់អឺរ៉ូ ក៏បានបណ្តាលឲ្យគេគិតថា ប្រទេសក្នុងតំបន់ចាយប្រាក់អឺរ៉ូអាចស្គាល់ដំណើរសេដ្ឋកិច្ចដើរថយក្រោយយូរជាងការប្រមាណទុកពីពេលមុន។
ដំណឹងពុំល្អមួយទៀតសម្រាប់ប្រទេសអាល្លឺម៉ង់គឺសកម្មភាពក្នុងវិស័យឯកជនដែលបានធ្លាក់ចុះខ្លាំង។ ហើយសម្រាប់ប្រទេសបារាំងក៏ដូចគ្នាអ៊ីចឹងដែរ សកម្មភាពក្នុងវិស័យឯកជននៅខែមេសានេះបានស្គាល់ការធ្លាក់ស្រុតចុះយ៉ាងខ្លាំង។
ដូច្នេះ ទាំងនេះសុទ្ធសឹងជាដំណឹងពុំល្អឡើយសម្រាប់ទីផ្សារហិរញ្ញវត្ថុ ថ្វីដ្បិតតែនៅថ្ងៃអង្គារទី២៤មេសានេះ ទីផ្សារហិរញ្ញវត្ថុបានស្គាល់ភាពធូរស្បើយបន្តិចវិញ ក្រោយពីមានការបារម្ភស្លន់ស្លោកាលពីថ្ងៃចន្ទម្សិលមិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ