ឆ្មំាព្រំដែនកូរ៉េខាងជើង និងកូរ៉េខាងត្បូងបាញ់គ្នាមួយប៉្រាវនៅតំបន់គ្មានកងទ័ព
ការប៉ះទង្គិចគ្នាផ្លូវអាវុធបានកើតមានជាថ្មីរវាងបងប្អូនបង្កើតគូសត្រូវទំាងពីរ កូរ៉េខាងជើង និងកូរ៉េខាងត្បូង។ នៅរសៀលថ្ងៃអាទិត្យ ទី១៩ តុលា ឆ្មំាព្រំដែនកូរ៉េទំាងពីរបានបាញ់គ្នាមួយប៉្រាវនៅតំបន់គ្មានកងទ័ពដែលខ័ណ្ឌចែកទឹកដីកូរ៉េតំាងពីក្រោយការបិទបញ្ចប់សង្រ្គាមក្នុងទសវត្សឆ្នំា ៥៣។ នេះជាការប៉ះទង្គិចផ្លូវអាវុធលើកទី២ នៅតាមព្រំដែនដីគោករវាងគ្នាក្នុងរយៈពេលជិតមួយខែកន្លងទៅ។ អ្វីដែលគួរឲ្យកត់សម្គាល់ ឧប្បត្តិហេតុនោះមិនបានបណ្តាលឲ្យបាត់បង់ជីវិតមនុស្សទេ។
ចុះផ្សាយនៅថ្ងៃ៖
ស្តាប់ - ០១:៥៧
យោងតាមអ្នកទទួលខុសត្រូវម្នាក់របស់ក្រសួងការពារជាតិកូរ៉េខាងត្បូងឲ្យដឹងថា ឆ្មំាព្រំដែនកូរ៉េខាងត្បូងបានបើកការបាញ់គំរាមមុនគេ នៅពេលដែលគេប្រទះឃើញឆ្មំាព្រំដែនកូរ៉េខាងជើងបានដើរល្បាតដោយឆ្លងចូលក្នុងតំបន់គ្មានកងទ័ពដែលខ័ណ្ឌចែកទឹកដីកូរ៉េជាពីរនៅក្រោយការបិទបញ្ចប់សង្រ្គាមកូរ៉េក្នុងទសវត្សឆ្នំា ៥៣។ អ្នកទទួលខុសត្រូវកូរ៉េខាងត្បូងរូបនេះដដែលបានបន្ថែមថា ឆ្មំាព្រំដែនកូរ៉េខាងត្បូងបានស្រែកព្រមានតាមប្រដាប់បំពងសំឡេងជាច្រើនដង មុននឹងធ្វើការបាញ់ព្រមាន។ គឺនៅពេលនោះហើយដែលឆ្នំាព្រំដែនកូរ៉េខាងជើងបានធ្វើការបាញ់តបវិញ។ ការបាញ់ដាក់គ្នារវាងបងប្អូនបង្កើតគូសត្រូវទំាងពីរមានរយៈពេលយ៉ាងតិច ១០នាទី។ គួរជម្រាបជូនថា តំបន់គ្មានកងទ័ព គឺជាដែនដីមួយដែលមានទទឹង ៤គីឡូម៉ែត្រ និងបណ្តោយ ២៤៨គីឡូម៉ែត្រខ័ណ្ឌចែកទឹកដីកូរ៉េជាពីរ។ តែក៏ជាតំបន់មួយដែលមានដាក់ពង្រាយដោយបន្លាលួសយ៉ាងស្អេកស្កះ មានបង្កប់គ្រាប់មីនរាប់លានគ្រាប់ និងមានសង់ជញ្ជំាងសម្រាប់ប្រឆំាងនឹងរថក្រោះ។
កាលពីថ្ងៃទី១០ តុលាកន្លងទៅ ទាហានទំាងសងខាងក៏បានបាញ់ដាក់គ្នាដោយប្រើកំាភ្លើងស្វ័យប្រវត្តិនៅតាមព្រំដែនគោក និងចំពេលដែលទាហានកូរ៉េខាងជើងបានបាញ់ទម្លាក់ប៉េងប៉ោងមានផ្ទុកដោយខិតប័ណ្ណជេរប្រមាជរបបក្រុងព្យុងយ៉ាងពីសំណាក់សកម្មជននៅកូរ៉េខាងត្បូង។ អ្វីជាការកត់សម្គាល់ ការប៉ះទង្គិចគ្នាផ្លូវអាវុធនៅតាមព្រំដែនគោក គឺមិនសូវកើតមានញឹកញាប់ដូចនៅតាមព្រំដែនសមុទ្រទេ។ សូមរម្លឹកឡើងវិញថា ពិតមែនតែសង្រ្គាមកូរ៉េបានបិទបញ្ចប់តំាងពីឆ្នំា ១៩៥៣ ក៏ដោយ ក៏បងប្អូនបង្កើតទំាងពីរនៅមិនទាន់បានចុះកិច្ចព្រមព្រៀងសន្តិភាពរវាងគ្នាដែរ។ ដូច្នេះជាលក្ខណៈបច្ចេកទេស អ្នកទំាងពីរនៅតែស្ថិតក្នុងសង្រ្គាមដដែល។ យ៉ាងណាក៏ដោយ លោកយ៉ាង មូជីង គ្រូបង្រៀននៅសាកលវិទ្យាល័យក្នុងក្រុងសេអ៊ូលបានព្រមានថា ពិតមែនតែការប៉ះទង្គិចគ្នាផ្លូវអាវុធនៅមានកម្រិតតូចតាចមែន តែវានឹងអាចធ្លាក់ក្នុងស្ថានការណ៍ដុនដាបមិនអាចគ្រប់គ្រងបាន បើគេចេះតែទុកបណ្តោយមិនព្រមដោះស្រាយនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ