ទីតាំងធ្លាក់យន្តហោះត្រូវបានធានាការពារសុវត្ថិភាពដោយប៉ូលិសហូឡង់ និងអូស្ត្រាលី
កងកម្លាំងប្រដាប់អាវុធអន្តរជាតិដឹកនាំដោយប្រទេសហូឡង់ត្រូវចាប់ផ្តើមពង្រាយនៅថ្ងៃសុក្រទី១ សីហា ទៅក្នុងទីតាំងដែលមានផ្ទុះធ្លាក់យន្តហោះម៉ាឡេស៊ីនៅភាគខាងកើតអ៊ុយក្រែន ដែលបច្ចុប្បន្ននេះកំពុងស្ថិតនៅក្រោមការកាន់កាប់របស់ពួកឧទ្ទាមបំបែកទឹកដីអ៊ុយក្រែន។ ទិសដៅរបស់បេសកកម្មប៉ូលិសហូឡង់ អូស្ត្រាលី គឺធានាសន្តិសុខដល់ក្រុមអ្នកជំនាញ និងអ្នកស៊ើបអង្កេតអន្តរជាតិដែលត្រូវចូលទៅស្រាវជ្រាវរកភស្តុតាងពីគំនរបាក់បែកយន្តហោះ ដែលធ្លាក់កាលពីពីរសប្តាហ៍មុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
ជាលើកដំបូង ប៉ូលិសហូឡង់ និងអូស្ត្រាលីដែលធ្លាប់អាក់ខានមិនអាចបំពេញបេសកកម្មរបស់ខ្លួនដោយសារការប្រយុទ្ធគ្នាខ្លាំងរវាងកងទ័ពអ៊ុយក្រែន និងពួកឧទ្ទាម នៅទីបំផុតអាចចូលទៅការពារសុវត្ថិភាព នៅក្នុងទីតាំងធ្លាក់យន្តហោះម៉ាឡេស៊ី MH ១៧ ចាប់ពីថ្ងៃសុក្រនេះ។ ក្រុមអ្នកស៊ើបអង្កេតអន្តរជាតិដែលមានដឹកនាំដោយប្រទេសហូឡង់ អាចចាប់ផ្តើមការងាររបស់ខ្លួនពេញដៃ ពេញជើង នៅក្រោមការយាមសន្តិសុខរបស់ប៉ូលិសហូឡង់។ អ្នកស៊ើបអង្កេតរុស្ស៊ីដែលត្រូវចូលរួមនៅក្នុងបេសកកម្មអន្តរជាតិ នឹងត្រូវទៅដល់ទីក្រុងគៀវនៅថ្ងៃសុក្រនេះ មុននឹងធ្វើដំណើរទៅភាគខាងកើតអ៊ុយក្រែន។
ប៉ូលិសហូឡង់អាចចូលទៅពង្រាយនៅក្នុងទីតាំងផ្ទុះធ្លាក់យន្តហោះ បន្ទាប់ពីអន្តរការីរុស្ស៊ី និងអ៊ុយក្រែន ដែលជួបប្រជុំគ្នាកាលពីថ្ងៃម្សិលមិញ នៅក្នុងប្រទេសបេឡារុស បានយល់ព្រមព្រៀងគ្នាឲ្យក្រុមអ្នកជំនាញអន្តរជាតិអាចចូលទៅក្នុងទីតាំងធ្លាក់យន្តហោះ។ កិច្ចព្រមព្រៀងតម្រូវឲ្យមានបទឈប់បាញ់គ្នាមួយរយៈរវាងកងទ័ពអ៊ុយក្រែន ជាមួយពួកឧទ្ទាមក្នុងរង្វង់២០គីឡូម៉ែត្រពីទីតាំងធ្លាក់យន្តហោះ ពោលគឺដើម្បីធានាសុវត្ថិភាពដល់អ្នកស៊ើបអង្កេតអន្តរជាតិ ដែលត្រូវចូលទៅធ្វើការស៊ើបអង្កេតរកមូលហេតុដែលធ្វើឲ្យយន្តហោះម៉ាឡេស៊ីផ្ទុះធ្លាក់។
ពីរសប្តាហ៍មកហើយ ដែលយន្តហោះម៉ាឡេស៊ីផ្ទុះធ្លាក់នៅ ភាគខាងកើតអ៊ុយក្រែន។ បើទោះបីជាគេបានចូលទៅយកសាកសពបានជាង២០០នាក់ ប៉ុន្តែ នៅមានសាកសពជាច្រើនទៀត ដែលនៅបាត់ ឬដាច់រប៉ាត់រប៉ាយនៅក្រោមគំនររបស់បំណែកយន្តហោះ ដែលគេមិនទាន់អាចចូលទៅយកមកបាន ដោយសារតែបញ្ហាអសន្តិសុខ។ កាលពីថ្ងៃព្រហស្បតិ៍ម្សិលមិញ បើទោះជាមានគ្រាប់ផ្លោងផ្ទុះនៅក្បែរកន្លែងធ្លាក់យន្តហោះ ក្រុមអ្នកជំនាញអន្តរជាតិរបស់ប្រទេសហូឡង់នៅតែតស៊ូចូលបានសម្រេចទៅកន្លែងធ្លាក់យន្តហោះ។
លោកប្រធានាធិបតីអ៊ុយក្រែនបានបញ្ជាក់ព័ត៌មាននេះទៅនាយករដ្ឋមន្រ្តីហូឡង់ និងអូស្ត្រាលី កាលពីល្ងាចថ្ងៃម្សិលមិញ។ លោកបានបញ្ជាក់ផងដែរ ទៅសមភាគីទាំងពីរពីការសម្រេចរបស់សភាអ៊ុយក្រែនដែលបានបោះឆ្នោតច្បាប់អនុញ្ញាតឲ្យក្រុមប្រដាប់អាវុធ ហូឡង់ និងអូស្ត្រាលី ប្រមាណ៩៥០នាក់ ចូលទៅរក្សាសន្តិសុខនៅកន្លែងធ្លាក់យន្តហោះ ដែលរហូតមកដល់ពេលនេះ ស្ថិតនៅក្នុងតំបន់គ្រប់គ្រងដោយពួកឧទ្ទាមប្រឆាំងរដ្ឋាភិបាលអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ