ក្រោយបាញ់ទំលាក់យន្តហោះដ្រូនអ៊ីស្រាអែល អ៊ីរ៉ង់ប្រកាសថានឹងបំពាក់អាវុធដល់ប៉ាឡេស្ទីន
នៅថ្ងៃចន្ទនេះ អ៊ីរ៉ង់បានប្រកាសថា នឹងបំពាក់អាវុធដល់សកម្មជនប្រយុទ្ធប៉ាឡេស្ទីន ដើម្បីសងសឹកអ៊ីស្រាអែលដែលបានបញ្ជូនយន្តហោះដ្រូនមកស៊ើបការណ៍មជ្ឈមណ្ឌលនុយក្លេអ៊ែរអ៊ីរ៉ង់។ ថ្ងៃអាទិត្យម្សិលមិញ យន្តហោះដ្រូនអ៊ីស្រាអែលត្រូវបានអ៊ីរ៉ង់កំទេចចោល។ ទាក់ទងរឿងរ៉ាវដ្រូនជាមួយអ៊ីរ៉ង់ អ៊ីស្រាអែលប្រាប់ថា មិនអត្ថាធិប្បាយចំពោះព័ត៌មានដែលកាសែតចុះផ្សាយទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៧
ប៉ុន្មានសប្តាហ៍ចុងក្រោយនេះ អ៊ីរ៉ង់បានប្រកាសថា បានផ្តល់បច្ចេកវិទ្យាចាំបាច់ជាច្រើន ដល់ក្រុមហាម៉ាស និងក្រុមជីហាតអ៊ីស្លាម នៅប៉ាឡេស្ទីន។ ជាបច្ចេកវិទ្យាប្រើសម្រាប់ផលិតមីស៊ីល ដើម្បីវាយប្រហារទីក្រុងនានានៅអ៊ីស្រាអែល។
នៅថ្ងៃចន្ទនេះ មេបញ្ជាការកងទ័ពអាកាសអ៊ីរ៉ង់ លោក Amir-Ali Hajizadeh អាមៀ អាលី ហាជីហ្សាដេ បានប្រកាសថា អ៊ីរ៉ង់នឹងបំពាក់អាវុធសកម្មជនប្រយុទ្ធប៉ាឡេស្ទីន នៅតំបន់ស៊ីហ្សកដានី អោយបានកាន់តែឆាប់រហ័ស ហើយអ៊ីរ៉ង់ត្រៀមខ្លួនតបតទៅនឹងដ្រូនស៊ើបការណ៍ប្រភេទ Hermes ដែលអ៊ីរ៉ង់ទើបបានកំទេចចោល។ យោងតាមមេទ័ពអាកាសអ៊ីរ៉ង់ ដ្រូនស៊ើបការណ៍ប្រភេទ Hermes ជាដ្រូនផលិតដោយអ៊ីស្រាអែល។ ដ្រូននេះត្រូវបានគេបញ្ជូនមកក្នុងទឹកដីអ៊ីរ៉ង់។ ដ្រូន Hermes មានកាមេរ៉ាថតរូបប្រកបដោយគុណភាពចំនួន២គ្រឿង ជាដ្រូនមានលទ្ធភាពអាចគេចចេញពីរ៉ាដាបាន។
អ៊ីរ៉ង់បានប្រើមីស៊ីលបាញ់ទំលាក់ដ្រូននេះចោល ពេលយន្តហោះដ្រូននេះ ព្យាយាមចូលមកក្បែរមជ្ឈមណ្ឌលនុយក្លេអ៊ែរ ណាតាន់ Natanz នៅភាគកណ្តាលប្រទេស។ ពេលនេះ អាជ្ញាធរអ៊ីរ៉ង់កំពុងវិភាគកំទេចកំទីយន្តហោះដ្រូននេះ។
គួររំលឹកថា ទីតាំងនុយក្លេអ៊ែរណាតាន់ ជារោងចក្រចំបងរបស់អ៊ីរ៉ង់ ធ្វើសកម្មភាពចម្រើនធាតុអ៊ុយរ៉ានីញ៉ូម។ នៅទីនោះ មានបំពង់ចម្រើនធាតុអ៊ុយរ៉ានីញ៉ូម ជាង១៦០០០គ្រឿង។ បំពង់៣០០០គ្រឿងទៀត ស្ថិតនៅមជ្ឈមណ្ឌលនុយក្លេអ៊ែរ Fordoo។ មជ្ឈមណ្ឌលFordoo មានទីតាំងនៅក្រោមភ្នំ ពិបាកនឹងត្រូវគេកំទេចបាន។ កន្លងមក អ៊ីស្រាអែលធ្លាប់បានគំរាមវាយប្រហារទីតាំងនុយក្លេអ៊ែរអ៊ីរ៉ង់ ជាច្រើនលើកហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ