គណបក្សនយោបាយហែក្បួនទ្រង់ទ្រាយធំនៅថ្ងៃបិទបញ្ចប់យុទ្ធនាការឃោសនាបោះឆ្នោត
គណបក្សប្រជាជនកម្ពុជា គណបក្សសមរង្ស៊ី គណបក្សសិទ្ធិមនុស្ស និង គណបក្សហ្វ៊ុនស៊ិនប៉ិច បានបង្ហាញកម្លាំងតាមរយៈការហែក្បួនឃោសនាផ្តាច់ព្រ័ត្រនៅថ្ងៃចុងក្រោយនៃយុទ្ធនាការឃោសនាបោះឆ្នោតឃុំសង្កាត់នៅថ្ងៃទី១មិថុនានេះ។ ចំណែកសង្គមស៊ីវិលឃ្លាំមើលការបោះឆ្នោតនិង គ.ជ.ប. មើលឃើញថា ការបំភិតបំភ័យ ភាពមិនប្រក្រតី និងការរារាំងសកម្មភាពឃោសនាថយចុះបើធៀបនឹងការបោះឆ្នោតលើកមុនៗ។
ចុះផ្សាយនៅថ្ងៃ៖
ស្តាប់ - ០២:៥៤
ថ្ងៃ១មិថុនានេះ ជាថ្ងៃចុងក្រោយ នៃយុទ្ធនាការឃោសនាបោះឆ្នោតឃុំសង្កាត់ ដែលបានចាប់ផ្តើម កាលពីថ្ងៃទី១៨ឧសភា។ គណបក្សប្រជាជនកម្ពុជា នៅភ្នំពេញ បានជួបជុំដង្ហែក្បួនឃោសនាផ្តាច់ព្រ័ត្រធំជាងគេ ដោយប្រើប្រាស់កម្លាំងយុវជនប្រមាណ ២ ម៉ឺននាក់ ឡានម៉តូ និងរ៉ឺម៉កកង់បីរាប់រយគ្រឿង ចាប់តាំងពីព្រឹកព្រលឹម។
ចំណែកនៅតាមបណ្តាខេត្តទូទាំងប្រទេស គណបក្សប្រជាជនកម្ពុជា ក៏បានហែក្បួនឃោសនាផ្តាច់ព្រ័ត្រផងដែរ។ ថ្ងៃ៧មករានិងការអភិវឌ្ឍប្រទេស ជាប្រធានបទសំខាន់សម្រាប់គណបក្សកាន់អំណាច។
រីឯគណបក្សសមរង្ស៊ី ក៏បានបង្ហាញកម្លាំងនៅថ្ងៃចុងក្រោយ ដោយការជួបជុំហែក្បួន នាពេលរសៀល ហើយនៅពេលព្រលប់ លោកសមរង្ស៊ី ក៏បានថ្លែងតាមវីដេអូខន់ហ្វេរិន ពីក្រៅប្រទេស ចូលមកកាន់ក្បួនឃោសនា នៅទីក្រុងភ្នំពេញ។
គណបក្សហ្វ៊ុនស៊ិនប៉ិចដែលស្ងាត់ស្ងៀមយូរថ្ងៃមកហើយ នៅថ្ងៃឃោសនាបោះឆ្នោតចុងក្រោយថ្ងៃនេះ ក៏បានរៀបចំឡានម៉ូតូ រ៉ឺម៉កកង់បី និងចាក់មេក្រូ ហែក្បួនផ្តាច់ព្រ័ត្រផងដែរ នៅភ្នំពេញ។
ដោយឡែកគណបក្សសិទ្ធិមនុស្សរបស់លោកកឹមសុខា ក៏បានបើកយុទ្ធនាការហែក្បួនឃោសនាទ្រង់ទ្រាយធំ ដឹកនាំដោយលោកកឹមសុខា នៅឯខេត្តកំពង់ចាម។
ដោយឡែកគណបក្សនយោបាយ៦ផ្សេងទៀតទោះជាមិនហែក្បួនឃោសនា នៅថ្ងៃចុងក្រោយនេះ តែគណបក្សទាំងនោះ ក៏បន្តសកម្មភាពឃោសនានៅមូលដ្ឋានដោយចាក់មេក្រូផ្សព្វផ្សាយពីគោលនយោបាយ ដើម្បីទាក់ទាញសំឡេងឆ្នោត នៅថ្ងៃបោះឆ្នោតឃុំសង្កាត់ ថ្ងៃ៣មិថុនាខាងមុខ។
ក្នុងពេលឃោសនាបោះឆ្នោតឃុំសង្កាត់ ចាប់ពីថ្ងៃទី១៨ ខែឧសភា ឆ្នាំ២០១២ មកដល់ថ្ងៃបញ្ចប់យុទ្ធនាការ នាថ្ងៃទី១ ខែមិថុនា ឆ្នាំ២០១២ ខុមហ្វ្រែល រកឃើញថា ការបំភិតបំភ័យ ភាពមិនប្រក្រតី និងការរារាំងសកម្មភាពឃោសនារបស់គណបក្សនយោបាយនានា ដែលកើតឡើងទៅលើសកម្មជនគណបក្សនយោបាយ និងប្រជាពលរដ្ឋ បើគិតជាចំនួនមធ្យមក្នុងមួយថ្ងៃមានការថយចុះ បើប្រៀបធៀបនឹងការបោះឆ្នោតមុនៗ។ ចំណែកអំពើហិង្សាក៏ថយចុះ។ រីឯការសម្លាប់សកម្មជននយោបាយ មិនកើតមានទេ។
យ៉ាងណាក៏ដោយ ខុមហ្វ្រែល រកឃើញថា ករណីទិញសន្លឹកឆ្នោត ក្នុងអំឡុងពេលឃោសនាបោះឆ្នោត មានចំនួន ១០ ករណី។ រីឯគ.ជ.ប. នៅមុននេះបន្តិចក៏បានប្រកាសពីដំណើរការរលូននៃយុទ្ធនាការឃោសនាបោះឆ្នោតរយៈពេល ១៥ ថ្ងៃ ដែលបានបិទបញ្ចប់នៅថ្ងៃ១មិថុនានេះ។ ប៉ុន្តែគ.ជ.ប. ទទួលពាក្យបណ្តឹងសរុប ៧៨ ករណី ក្នុងពេលឃោសនាបោះឆ្នោត។
បណ្តឹងភាគច្រើន គឺទាក់ទងទៅនឹងការហែកខិត្តប័ណ្ណការរំខានសកម្មភាពឃោសនាបោះឆ្នោតនិងការទម្លាក់ស្លាកគណបក្សនយោបាយ។ បណ្តឹងទាំងនោះ ភាគច្រើនប្តឹងដោយគណបក្សសមរង្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ