បាតុកម្មនៅ អឺរ៉ុបដើម្បីគាំទ្រប្រជាជនប៉ាឡេស្ទីននៅហ្កាហ្សា
នៅក្នុងទីក្រុងជាច្រើនរបស់អឺរ៉ុប បាតុកម្មដង្ហែក្បួនត្រូវបានរៀបចំឡើងដើម្បីគាំទ្រប្រជាជនប៉ាឡេស្ទីន ដែលរហូតមកដល់ថ្ងៃសៅរ៍ ត្រូវរងគ្រោះដោយការវាយប្រហាររបស់ទ័ពអ៊ីស្រាអែល។ នៅប្រទេសបារាំង បាតុកម្មត្រូវបានធ្វើឡើង នៅក្នុងសង្កាត់សំបូររស់នៅដោយជនជាតិអ៊ីស្លាម បើទោះបីជាមានការហាមឃាត់ពីតុលាការ និងការព្រមានពីលោកប្រធានាធិបតីបារាំង ហ្រ្វង់ស័រ ហូឡង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
តាំងពីប្រទេសឆាត ជាទីដែលលោកធ្វើទស្សនកិច្ច លោកប្រធានាធិបតីបារាំងបានព្រមានរួចហើយមិនឲ្យមានការប្រមូលផ្តុំ ធ្វើបាតុកម្មដើម្បីគាំទ្រប្រជាជនប៉ាឡេស្ទីន។ អ្នកដែលល្មើស ផ្គើនចុះថ្នល់ធ្វើបាតុកម្មនឹងត្រូវទទួលខុសត្រូវលើសកម្មភាពរបស់ខ្លួន។ ទាក់ទងនឹងរឿងបាតុកម្មនេះ លោកហ្រ្វង់ស័រ បានរំលឹកជាថ្មីកុំឲ្យធ្វើបាតុកម្ម ព្រោះវាអាចនឹងប៉ះពាល់ដល់សណ្តាប់ធ្នាប់សាធារណៈ។
កាលពីថ្ងៃសុក្រល្ងាច រដ្ឋអាជ្ញាបារាំងបានរុញច្រានចោល ពាក្យសុំធ្វើបាតុកម្មរបស់ក្រុមប្រជាជនដែលចង់ធ្វើបាតុកម្មគាំទ្របុព្វហេតុរបស់ប្រជាជនប៉ាឡេស្ទីន។ នៅក្នុងលិខិតរបស់តុលាការដែលទីភ្នាក់ងារព័ត៌មានបារាំង AFPបានទទួល អ្នកដែលល្មើសរំលោភបំពានបំរាមរបស់តុលាការ ដោយនៅតែចុះថ្នល់ធ្វើបាតុកម្មនៅថ្ងៃសៅរ៍ នឹងអាចប្រឈមនឹងទោសជាប់ឃុំ៦ខែ និងប្រាក់ពិន័យ ៧៥០០អឺរ៉ូ។ ស្ថាប័នប៉ូលិសនៅប៉ារីសបានព្រមានរួចហើយថា នឹងអាចមានចាប់ត្រួតពិនិត្យ ដែលនឹងអាចឈានទៅដល់ការចាប់ខ្លួន នៅក្នុងពេលធ្វើបាតុកម្មដែលហាមដោយច្បាប់។
នៅប៉ារីស អាជ្ញាធរបារាំងហាមឃាត់មិនឲ្យមានបាតុកម្មគាំទ្រប្រជាជនប៉ាឡេស្ទីន ដោយសារតែបាតុកម្មក្នុងទិសដៅដូចគ្នានេះ កាលពីថ្ងៃទី ១៣កក្កដា បានឈានទៅដល់ការបង្កអំពើហិង្សានៅមុខវិហាររបស់ជនជាតិជ្វីវ។ មនុស្ស៨នាក់បានរងរបួសនៅក្នុងការប្រឈមមុខដាក់គ្នារវាងប៉ូលិស និងបាតុករ។
នៅពីថ្ងៃសៅរ៍ បើទោះបីជាមានការហាមឃាត់ ក្រុមមនុស្សរាប់ពាន់នាក់ នៅក្នុងទីក្រុងមួយចំនួន ក្នុងប្រទេសបារាំង បានចុះថ្នល់ធ្វើបាតុកម្មដើម្បីបង្ហាញសាមគ្គីភាពជាមួយប្រជាជនប៉ាឡេស្ទីន និងដើម្បីបរិហារអំពើហិង្សារបស់អ៊ីស្រាអែលទៅលើប្រជាជនស៊ីវិល នៅតំបន់ហ្កាហ្សា។ នៅទីក្រុងឡុងដ៍ ការប្រមូលផ្តុំមានភាពហ៊ឹកហ៊ាក់ ដោយប្រជាជនរាប់ពាន់នាក់ប្រមូលផ្តុំគ្នានៅមុខការិយាល័យនាយករដ្ឋមន្រ្តី។ នៅតំបន់ហ្កាហ្សាវិញ កាណុងកាំភ្លើងរបស់អ៊ីស្រាអែលដែលចេះតែរំកិលចូលទៅក្នុងតំបន់ហ្កាហ្សា នៅមិនឈប់បាញ់សម្លាប់ប្រជាជនប៉ាឡេស្ទីន។ គិតត្រឹមថ្ងៃសៅរ៍ល្ងាច មានមនុស្ស៤១នាក់បន្ថែមទៀតត្រូវស្លាប់នៅក្នុងការវាយប្រហាររបស់យន្តហោះអ៊ីស្រាអែល។ ជាសរុប គិតរហូតមកល្ងាចថ្ងៃសៅរ៍ មានប្រជាជនប៉ាឡេស្ទីន៣៣៧បាត់បង់ជីវិត ដោយសារការវាយប្រហាររបស់អ៊ីស្រាអែល ចំណែក ប្រទេសអន្តរជាតិរួមទាំងអង្គការសហប្រជាជាតិនៅតែគ្មានឥទ្ធិពល អំណាចអ្វីដើម្បីអាចបញ្ឈប់ការវាយប្រហាររបស់ទាហានអ៊ីស្រាអែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ