កម្ពុជា-ថៃ -

អត្ថបទចុះផ្សាយនៅថ្ងៃ សុក្រ 09 មីនា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 09 មីនា 2012

កម្ពុជាកំពុងសំអាតមីនបើកច្រកព្រំដែនស្ទឹងបត់

ច្រកចេញចូលអន្តរជាតិនៅប៉ោយប៉ែតជិតច្រកព្រំដែនស្ទឹងបត់

RFI/Leang Delux

ដោយ លាង ដឺលុច

ដំណើរការបើកច្រកព្រំដែនអន្តរជាតិស្ទឹងបត់កំពុងដំណើរទៅមុខយ៉ាងល្អ នេះបើតាមការបញ្ជាក់ថាលោក អ៊ុង អឿនអភិបាលខេត្តបន្ទាយមានជ័យ។ នៅពេលនេះ ភាគីកម្ពុជាកំពុងបោសសំអាតមីននៅច្រកព្រំដែនខាងកម្ពុជា។ ប្រតិបត្តិការបើកច្រកព្រំដែនទើបលេចជារូបរាងជាសកម្មភាពជាក់ស្តែងនៅពេលនេះក្រោយពីគណៈកម្មការចម្រុះខណ្ឌសីមាព្រំដែនគោកកម្ពុជាថៃជួបគ្នាកាលពីពាក់កណ្តាលខែកុម្ភៈ។

សេចក្តីរាយការណ៍របស់ លាង ដឺលុច

ស្តាប់ (01:40)

09/03/2012 by លាង ដឺលុច

គ្មានឧបសគ្គរាំងស្ទះ ក្នុងដំណើរការបើកច្រកព្រំដែនអន្តរជាតិស្ទឹងបត់នោះឡើយ។ អភិបាលខេត្តបន្ទាយមានជ័យ លោក អ៊ុង អឿន បានបញ្ជាក់ប្រាប់វិទ្យុបារាំងអន្តរជាតិនៅរសៀលថ្ងៃសុក្រនេះថា ក្រុមបោសសម្អាតមីន កំពុងប្រតិបត្តិការនៅលើទឹកដីខាងកម្ពុជា។ រីឯភាគីថៃក៏កំពុងរៀបចំតំបន់ខាងគេដូចគ្នាដែរ។ អភិបាលខេត្តបន្ទាយមានជ័យបានបន្តពន្យល់អោយដឹងថា តាមគម្រោង ភាគីទាំងពីរត្រូវរៀបចំទីកន្លែងនេះអោយចប់រួចរាល់យ៉ាងយូរក្នុងរយៈ៦០ថ្ងៃប៉ុណ្ណោះ។ បន្ទាប់មកក្រុមការងារសាធារណៈការនឹងមកបន្តការងារសាងសង់ស្ពានដើម្បីភ្ជាប់ទឹកដីទាំងពីរកម្ពុជាថៃ។ សូមបញ្ជាក់ថា ព្រំដែននៃប្រទេសទាំងពីរនៅក្នុងតំបន់នោះខណ្ឌដោយស្ទឹងមួយឈ្មោះស្ទឹងស៊ីសុផុន។

ប្រតិបត្តិការបោសសម្អាតមីនគឺជាការងារបន្ត បន្ទាប់ពីក្រុមការងារកម្ពុជាថៃបានជួបគ្នាតាមការកំណត់នៅថ្ងៃទី៥មិនាដើមសប្តាហ៍នេះ។ ការណាត់ជួបគ្នានេះ ដែលត្រូវបានកំណត់នៅក្នុងកិច្ចប្រជុំគណៈកម្មការចម្រុះខណ្ឌសីមាព្រំដែនគោកកម្ពុជាថៃកាលពីពាក់កណ្តាលខែកុម្ភៈនៅក្នុងប្រទេសថៃ។

តាមពិតគម្រោងបើកច្រកព្រំដែនគោគអន្តរជាតិស្ទឹងបត់ ក្បែរច្រកព្រំដែនប៉ោយប៉ែតក្នុងខេត្តបន្ទាយមានជ័យ កម្ពុជានិងថៃបានលើកឡើងជាច្រើនឆ្នាំមកហើយ។ គឺទើបតែពេលនេះ ដែលភាគីទាំងពីរមានឱកាសអនុវត្តគម្រោងនេះ។ ច្រកព្រំដែនស្ទឹងបត់នេះនឹងត្រូវប្រើជាច្រកផ្លាស់ប្តូរទំនិញជំនួសអោយច្រកព្រំដែនអន្តរជាតិប៉ោយប៉ែតដែលត្រូវផ្តោតជាច្រកសម្រាប់ទេសចរតែមួយគត់។

គួរបញ្ជាក់អោយដឹងផងដែរថា បន្ទាប់ពីការងារបើកច្រកព្រំដែនស្ទឹងបត់នេះហើយ ក្រុមការងាររបស់គណៈកម្មការខណ្ឌសីមាព្រំដែនគោកនេះ នឹងចាប់ផ្តើមការងារស្វែងរកបង្គោលព្រំដែនចាស់សម័យបារាំងនៅច្រកជាំសាង៉ាមក្នុងស្រុកអន្លង់វែង៕