កម្ពុជា -

អត្ថបទចុះផ្សាយនៅថ្ងៃ សៅរ៍ 20 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 20 តុលា 2012

មេដឹកនាំប្រទេសអាស៊ាន ៣ទៀតមកគោរពព្រះវិញ្ញាណក្ខន្ធសម្តេចឳ

ប្រជាពលរដ្ឋខ្មែរនៅតែបន្តកាន់ទុក្ខដល់អតីតព្រះមហាក្សត្រខ្មែរ នរោត្តម សីហនុ នៅមុខព្រះបរមរាជវាំង

RFI/Chan Lida

ដោយ ប៉ែន បូណា

ក្រសួងការបរទេសកម្ពុជាបានប្រកាសឲ្យដឹងអំពីកាលវិភាគនៃការចូលមកគោរពវិញ្ញាណក្ខន្ធសម្តេចឳជាបន្តបន្ទាប់ពីសំណាក់មេដឹកនាំបណ្តាប្រទេសអាស៊ាន។ នាយករដ្ឋមន្ត្រីសិង្ហបុរី ប្រធានសភាហ្វីលីពីន និងរដ្ឋមន្ត្រីការបរទេសឥណ្ឌូនេស៊ីនឹងមកដល់កម្ពុជានៅថ្ងៃអាទិត្យទី២១ និងថ្ងៃចន្ទទី២២ តុលានេះដើម្បីគោរពព្រះវិញ្ញាណក្ខន្ធសម្តេចឳនៅក្នុងព្រះបរមរាជវាំង។ ក្រៅពីមេដឹកនាំបរទេស កាលវិភាគនៃការគោរពវិញ្ញាណក្ខន្ធមានសភាពមមាញឹកយ៉ាងខ្លាំងសម្រាប់ស្ថាប័នរដ្ឋក្នុងស្រុក។

សេចក្តីរាយការណ៍របស់ ប៉ែន បូណា ពីទីក្រុងភ្នំពេញ

ស្តាប់ (02:38)

20/10/2012 by ប៉ែន បូណា

យោងតាមកាលវិភាគដែលប្រកាសដោយក្រសួងការបរទេសកម្ពុជានៅចុងសប្តាហ៍នេះ លោក លី សៀនលុង (Lee Hsien Loong ) នាយករដ្ឋមន្ត្រីសិង្ហបុរី និងភរិយានឹងដឹកនាំគណៈប្រតិភូមកគោរពព្រះវិញ្ញាណក្ខន្ធព្រះករុណា ព្រះបាទសម្តេចព្រះនរោត្តមសីហនុនៅក្នុងព្រះបរមរាជវាំង នៅវេលាម៉ោង ១១ ព្រឹកថ្ងៃទី២១ ខែតុលាស្អែកនេះ។ បន្ទាប់មក គឺដល់វេនលោក ហ្វេលីស៊ីអាណូ ប៊ែលម៉ុងតេ ( Felliciano R. Belmonte JR.) ប្រធានរដ្ឋសភាហ្វីលីពីន និងជាបេសកជនពិសេសរបស់ប្រធានាធិបតីហ្វីលីពីនដែលត្រូវអញ្ជើញមកគោរពព្រះវិញ្ញាណក្ខន្ធអតីតព្រះមហាក្សត្រខ្មែរនៅថ្ងៃអាទិត្យស្អែកនេះដែរ វេលាម៉ោង ១១ និង៣០នាទីព្រឹក ពោលគឺកន្លះម៉ោងក្រោយនាយករដ្ឋមន្ត្រីសិង្ហបុរី។ចំណែកលោកម៉ាកទី ណាតាឡេហ្គាវ៉ា ( Marty M. Natalegawa ) រដ្ឋមន្ត្រីការបរទេសឥណ្ឌូណេស៊ីក៏នឹងអញ្ជើញមកគោរពព្រះវិញ្ញាណក្ខន្ធព្រះមហាវីរក្សត្រខ្មែរនៅថ្ងៃចន្ទ ទី២២ ខែតុលាវេលាម៉ោង៣ រសៀល។

បន្ទាប់ពីពិធីគោរពព្រះវិញ្ញាណក្ខន្ធព្រះបរមសពសម្តេចឳ មេដឹកនាំប្រទេសអាស៊ានទាំងនោះក៏គ្រោងជួបជាមួយសមភាគីកម្ពុជាផងដែរ។ ជាក់ស្តែង លោក លី សៀនលុងនឹងជួបជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាព។ ចំណែកលោក ម៉ាទី ណាតាឡេហ្គាវ៉ានឹងជួបពិភាក្សាការងារជាមួយលោក ហោ ណាំហុង រដ្ឋមន្ត្រីការបរទេសកម្ពុជានៅទីស្តីការក្រសួងការបរទេសក្រុងភ្នំពេញ។ ប៉ុន្តែគ្មានព័ត៌មានស្តីពីការជួបពិភាក្សារវាងប្រធានរដ្ឋសភាហ្វីលីពីនជាមួយសមភាគីកម្ពុជាទេ។

កាលពីរសៀលថ្ងៃទី១៩ ខែតុលាម្សិលមិញ នាយករដ្ឋមន្ត្រីវៀតណាម ឡាវ និងថៃ បានធ្វើដំណើរជាបន្តបន្ទាប់ មកកាន់រាជធានីភ្នំពេញដើម្បីចូលគោរពព្រះវិញ្ញាណក្ខន្ធអតីតព្រះមហាក្សត្រខ្មែរនៅក្នុងព្រះបរមរាជវាំងរួចហើយ។ បន្ទាប់ពីគោរពព្រះវិញ្ញាណក្ខន្ធព្រះករុណា លោកនាយករដ្ឋមន្ត្រីវៀតណាម ង្វៀន តាន់យុង លោកនាយករដ្ឋមន្ត្រីឡាវ ថងស៊ីង ថាំម៉ាវង្ស និងលោកស្រីនាយករដ្ឋមន្ត្រីថៃ យ៉ីងឡាក់ ស៊ីណាវ៉ាតបានជួបពិភាក្សាការងារដាច់ដោយឡែកពីគ្នាជាមួយលោកនាយករដ្ឋមន្ត្រី ហ៊ុន សែន នៅវិមានសន្តិភាពក្នុងរាជធានីភ្នំពេញផងដែរ។

ក្រៅពីមេដឹកនាំបរទេស កាលវិភាគនៃការគោរពព្រះវិញ្ញាណក្ខន្ធសម្តេចឳក៏មានសភាពមមាញឹកខ្លាំងណាស់ដែរ សម្រាប់ស្ថាប័នរដ្ឋនៅក្នុងស្រុក។ ជាក់ស្តែងនៅថ្ងៃសៅរ៍នេះ មានមន្ត្រីរដ្ឋាភិបាលមកពី ២៦ ស្ថាប័ន រដ្ឋាភិបាលបានដាក់វេនគ្នាចូលគោរពវិញ្ញាណក្ខន្ធព្រះបរមសពសម្តេចឳជាបន្តបន្ទាប់។ ដោយឡែក ប្រជាពលរដ្ឋដែលមិនទាន់ត្រូវបានគេអនុញ្ញាតឲ្យចូលក្នុងព្រះបរមរាជវាំងនោះ ក៏នៅតែបន្តគោរពព្រះវិញ្ញាណក្ខន្ធព្រះមហាវីរក្សត្រនៅមុខព្រះបរមរាជវាំង និងនៅគ្រប់ទិសទីពេញផ្ទៃប្រទេស៕