ក្រុមអ្នកវិទ្យាសាស្ត្របានរកឃើញប្រភេទសត្វ និងរុក្ខជាតិថ្មី ១២៦ប្រភេទនៅជុំវិញទន្លេមេគង្គ
អង្គការការពារសត្វព្រៃ និងរុក្ខជាតិ WWF បានផ្តល់ដំណឹង នៅថ្ងៃអង្គារនេះថា ក្រុមអ្នកវិទ្យាសាស្ត្របានរកឃើញប្រភេទសត្វ និងរុក្ខជាតិថ្មីៗ ចំនួន១២៦ប្រភេទ នៅតំបន់ទន្លមេគង្គធំ កាលពីឆ្នាំ ២០១១កន្លងមក។ ប៉ុន្តែ WWF សំដែងការព្រួយបារម្ភ អំពីភាពគង់វង្ស នៃជីវៈចំរុះទាំងនេះ ដោយសារប្រភេទសត្វនិងរុក្ខជាតិ នៅតែទទួលនូវការគំរាមកំហែងអំពី មនុស្ស និងគំរោងសាងសង់នានា ក្នុងតំបន់។ ប្រជាជន ៦០លាននាក់ នៅកម្ពុជា ឡាវ វៀតណាម ថៃ ភូមា និងចិន មានកំពុងរស់នៅ ប្រកបរបរចិញ្ចឹមជីវិតក្នុងតំបន់នេះ។
ចុះផ្សាយនៅថ្ងៃ៖
ស្តាប់ - ០១:៣៣
នៅក្នុងបញ្ជីប្រភេទសត្វនិងរុក្ខជាតិ ទាំង១២៦ប្រទេស ដែលរកឃើញដោយក្រុមអ្នកវិទ្យាសាស្ត្រ ភាគច្រើនជាប្រភេទរុក្ខជាតិ។ ក្នុងពពួកសត្វ មានប្រភេទល្មូន ២១ប្រភេទ និងបណ្តាសត្វដែលរស់បាន ទាំងលើគោកនិងក្នុងទឹក ៥ប្រភេទ។
គេឃើញមាន សត្វកង្កែបចេះច្រៀង ដូចជាសត្វស្លាបដែរ ហើយមានសត្វកង្កែបមួយប្រភេទទៀត មានភ្នែកពណ៌ ខ្មៅ-ស រួមគ្នា។
នៅតំបន់ព្រៃត្រូពិច ក្រុមអ្នកវិទ្យាសាស្ត្រ រកឃើញសត្វប្រចៀវម្យ៉ាង មានច្រមុះ រាងជាបំពង់។ អ្នកវិទ្យាសាស្ត្រដាក់ឈ្មោះ អោយប្រចៀវនេះថា Belzébuth។ នៅភូមាវិញ គេរកឃើញ ប្រភេទពស់ថ្លាន់ម្យ៉ាង មានកន្ទុយខ្លី។
ការរកឃើញនេះ ជាដំណឹងល្អសំរាប់ អង្គការអង្គការការពារសត្វព្រៃ WWF ព្រោះជាការបង្ហាញនូវ ភាពសំបូរបែបនៃ ជីវៈចំរុះ នៅក្នុងតំបន់ទន្លេមេគង្គ។ ប៉ុន្តែ WWF មានការព្រួយបារម្ភអំពីស្ថិរភាពនៃ ប្រភេទសត្វ និងរុក្ខជាតិទាំងអស់នេះ។
ពីមួយថ្ងៃទៅមួយថ្ងៃ ប្រភេទសត្វនិងរុក្ខជាតិទាំងអស់នេះ ទទួលរងនូវការគំរាមកំហែង ដូចជាការប្រមាញ់ នេសាទ រឺក៏ គំរោងសំណង់នានា នៅតាមតំបន់ទន្លេមេគង្គ។
តែក្នុងរយៈពេល ៤០ឆ្នាំប៉ុណ្ណោះ តំបន់ព្រៃត្រូពិច នៅទន្លេមេគង្គ បានបាត់បង់ធនធានព្រៃឈើរបស់ខ្លួន អស់៣០ភាគរយ។ អង្គការ WWF ជំទាស់នឹងគំរោងទំនប់ សាយ៉ាប៊ូរី នៅប្រទេសឡាវ ដែលទើបនឹងអនុវត្តន៍ធ្វើ កាលពីខែមុន។ យោងតាម WWF ទំនប់នេះ នឹងបង្កមហន្តរាយ ដល់ជីវៈចំរុះនៅទន្លេមេគង្គ។ បច្ចុប្បន្ននេះ ប្រជាជន៦០លាននាក់ ប្រកបរបរចិញ្ចឹមជីវិត ដោយពឹងផ្អែកលើធនធានធម្មជាតិនៅទន្លេមេគង្គ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ