រកឃើញភពថ្មីជាកូនភ្លោះនឹងភពផែនដី
ក្រុមតារាវិទូអន្តរជាតិ ទំនងជាបានរកឃើញផ្កាយព្រះគ្រោះ ឬភពថ្មីមួយ នៅចម្ងាយប្រមាណ ៤៩០ឆ្នាំពន្លឺ ពីភពផែនដីយើង។ ជាភពកូនភ្លោះនឹងភពផែនដី ស្ថិតក្នុងប្រព័ន្ធសុរិយគតិមួយផ្សេង ដែលគេហៅថាជាភាសាបារាំង exoplanet។ ភពថ្មីនេះ មានទំហំធំជាងភពផែនដីតែប្រមាណ១០% និងទំនងជាមានស្រទាប់ដីគ្របពីលើផង។ ជាក្តីសង្ឃឹមថ្មីសម្រាប់ជីវិត និងសម្រាប់ក្រុមអ្នកស្រាវជ្រាវវិទ្យាសាស្ត្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:២២
មានឈ្មោះ Kepler 186F ភពនេះ អាចរស់នៅ និងបង្កជីវិតបាន បើគិតទៅលើរយៈចម្ងាយដ៏សមស្រប ពីផ្កាយទៅភព ក្នុងប្រព័ន្ធសុរិយគតិរបស់គេ។ នេះជាលើកទីមួយ ដែលអ្នកស្រាវជ្រាវអន្តរជាតិនិងបារាំង បានរកឃើញភពមួយក្នុងប្រព័ន្ធព្រះអាទិត្យផ្សេង ដែលមានលក្ខណៈស្រដៀងបេះបិទទៅនឹងភពផែនដីយើង។
“ជាភពដែលដូចខ្លាំងនឹងភពផែនដី ខាងផ្នែកទំហំ ដែលរកឃើញនៅក្នុងតំបន់អាចរស់នៅបាន ! នេះជាការពន្យល់របស់លោកស្រី Sophie Blomont នៃមន្ទីរពិសោធន៍តារារូបសាស្ត្រ ក្រុងBordeaux។ តំបន់អាចរស់នៅបាន គឺជាតំបន់ដែលមិនក្តៅពេក មិនត្រជាក់ពេក និងជាតំបន់ដែលមានទឹក រាវ នៅលើផ្ទៃដី។ ផ្កាយព្រះគ្រោះដែលរកឃើញកាលពីមុន នៅក្នុងប្រព័ន្ធព្រះអាទិត្យជាមួយនឹងភព កេផ្ល័រដែរនោះ មានទំហំធំជាងភពផែនដីច្រើនណាស់។”
ទំហំផ្ទៃដីសំខាន់ណាស់ ! និងដែលធ្វើឱ្យភពកេផ្ល័រ១៨៦ អាចមានដី មានទឹក។ បើភពមានទំហំតូចដូច្នេះ មានន័យថាសមាភាគផ្សំបង្កើតភពនោះគ្មានសារធាតុឧស្ម័នទេ។ នេះជាការពន្យល់បន្ថែមរបស់លោក សូហ្វ្រី ប្លូម៉ុង។ ហើយគេក៏អាចសន្និដ្ឋានបានកាន់តែប្រាកដថាភពនោះមានទឹកនៅលើផ្ទៃដី។
មានទឹករាវលើផ្ទៃដី គឺមានជីវិត ! នេះហើយជាប្រយោជន៍នៃការស្រាវជ្រាវរកភពភ្លោះនឹងផែនដីយើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ