នាយករដ្ឋមន្ត្រីអង់គ្លេសទៅស្កុតលែនដ៍បញ្ចុះបញ្ចូលកុំឲ្យផ្តាច់ខ្លួនពីចក្រភពអង់គ្លេស
លោកដាវីដ ខាំម៉ឺរ៉ុន នាយករដ្ឋមន្ត្រីអង់គ្លេស បានអញ្ជើញទៅទីក្រុងគ្លាសហ្គូវ ទីក្រុងធំរបស់ដែនដីស្កុតលែនដ៍ នៅថ្ងៃព្រហស្បតិ៍ទី២៨ សីហា។ កម្មវត្ថុនៃដំណើរទស្សនកិច្ចនេះ គ្មានអ្វីក្រៅតែពីចង់បញ្ចុះបញ្ចូលឲ្យប្រជាជននៅតំបន់ស្កុតលែនដ៍ កុំបោះឆ្នោតព្រម ឲ្យផ្តាច់តំបន់ស្កុតលែនដ៍ចេញពីចក្រភពអង់គ្លេស។ ដោយសាមូលហេតុសេដ្ឋកិច្ច និងនយោបាយ ប្រជាជនស្កុតលែនដ៍នឹងធ្វើការសម្រេចចិត្តតាមរយៈការបោះឆ្នោតប្រជាមតិថា ព្រមរឺមិនព្រម ឲ្យស្កុតលេនដ៍ក្លាយជាប្រទេសឯករាជ្យ។
ចុះផ្សាយនៅថ្ងៃ៖
ស្តាប់ - ០២:១៣
ចក្រភពអង់គ្លេសដែលបច្ចុប្បន្នផ្សំឡើងដោយដែនដីចំនួន៤តំបន់ ដែលក្នុងនោះមានតំបន់ស្កុតលែនដ៍ដែលស្ថិតនៅភាគខាងជើង បានបង្កើតឡើងក្នុងឆ្នាំ១៧០៧។ វាជាកិច្ចសន្យាបង្រួបបង្រួមគ្នារវាងទឹកដីបួនតំបន់ ដោយលប់ចោលនូវព្រំដែន ចាយលុយតែមួយ ប្រព័ន្ធពន្ធដារតែមួយ បទដ្ឋានច្បាប់តែមួយ។ ប៉ុន្តែកិច្ចសន្យាសហភាពរួមនេះ កំពុងរង្គោះរង្គើរ ដោយសារ ស្កុតលែនដ៍កំពុងធ្វើការរើបំរះ ទាមទារចង់បានឯករាជ្យ។
ប្រជាជនស្កុតលេនដ៍នឹងធ្វើការសម្រេចចិត្តតាមរយៈការបោះឆ្នោតប្រជាមតិនៅថ្ងៃទី១៨ កញ្ញា ខាងមុខនេះ ថាព្រមរឺមិនព្រម ឲ្យស្កុតលែនដ៍ផ្តាច់ខ្លួនចេញពីចក្រភពអង់គ្លេស។ បើតាមការស្ទាបស្ទង់មតិ ភាគរយនៃប្រជាជនដែលព្រមឲ្យស្កុតលែនដ៍ ក្លាយជាប្រទេសឯករាជ្យមានលើសអ្នកដែលប្រឆាំងដល់ទៅ១២ពិន្ទុ។
អ្នកនយោបាយដែលទាមទារការផ្តាច់ខ្លួន បានយកអំណះអំណាងសេដ្ឋកិច្ចជាមូលដ្ឋាន។ ឯករាជ្យ និងអធិបតេយ្យភាពរបស់ស្កុតលែនដ៍ នឹងអនុញ្ញតិឲ្យប្រទេសថ្មីនេះ មានភាពម្ចាស់ការលើសេដ្ឋកិច្ច និងការអភិវឌ្ឍន៍ផ្ទៃក្នុងយ៉ាងមានប្រសិទ្ធិភាព ជាជាងរំពឹងតែទៅលើការសម្រេច របស់ទីក្រុងឡុងដ្រ៍ ដូចសព្វថ្ងៃ។ ប្រទេសស្កុតលែនដ៍ថ្មី អាចប្រហែលនឹងចូលជាសមាជិកសហគមន៍អឺរ៉ុបទៀតផង។ ជាការពិតណាស់ កន្លងមកមានមតិរិះគន់ ជាច្រើនថាអំណាចក្តោបក្តាប់ដោយទីក្រុងឡុងដ្រ៍ សហគ្រាសមួយភាគធំ តាំងទីនៅស្កុតលែនដ៍ ប្រៀបដូចមេគោ ដែលចាំតែគេច្របាច់យកទឹកដោះ។ ស្កុតលែនដ៍មានសម្បត្តិប្រេងកាតនៅក្នុងដែនសមុទ្រខ្លួនយ៉ាងសន្ធឹកសន្ធាប់ តែផលប្រយោជន៍បានតែទៅលើពួកអង់គ្លេស។
ទន្ទឹមគ្នាដែលមានថៅកែក្រុមហ៊ុនធំៗនៅស្កុតលែនដ៍ ប្រហែល ២០០នាក់ ធ្វើញត្តិគាំទ្រការផ្តាច់ខ្លួនរបស់ស្កុតលែនដ៍ ក៏មាន ថៅកែប្រមាណជា១៣០នាក់ បានធ្វើញត្តិ អំពាវនាវកុំឲ្យប្រជាជនបោះឆ្នោតយល់ព្រម ផងដែរ។ មតិបដិសេធ គឺយោងទៅលើប្រវត្តិសាស្រ្ត និងទំនាក់ទំនងជាមួយគ្នារាប់សតវត្សមកហើយ ដែលស្កុតលែនដ៍ស្ថិតក្នុងរង្វង់គ្រួសារចក្រភពអង់គ្លេស ហើយជាពិសេសនោះ សេដ្ឋកិច្ចរបស់ស្កុតលែនដ៍ ពឹងផ្អែកទាំងស្រុងទៅលើទីក្រុងឡុងដ្រ៍។
ទោះបីជាយ៉ាងណា បើតាមការមើលឃើញជាទូទៅ សង្គម ស្កុតលែនដ៍ មានការបែកបាក់គ្នាជាពីរ ដោយសាតែរឿងនេះ។ ទៅមុខ បើសិនជា ស្កុតលែនដ៍បានឯករាជ្យមែន តែ ស្កុតលែនដ៍ក៏ពិបាកក្នុងផ្សះផ្សាគ្នា ឲ្យបានជាធ្លុងមួយណាស់។ ក្នុងពេលនេះ ម្នាក់ៗអន្ទះសារ ចង់ដឹងលទ្ធផលនៃការធ្វើប្រជាមតិនៅខែកញ្ញាខាងមុខ ហើយបើតាមការស្មាន ប្រជាជាជន ស្កុតលែនដ៍ស្ទើរតែទាំងអស់ ជាង៤លាននាក់ នឹងទៅចូលរូមសម្តែងមតិរបស់ខ្លួនយ៉ាងកុះករ ព្រោះថាឈ្នះ រឺចាញ់ ព្រមរឺមិនព្រម វាអាស្រ័យនៅលើតែមួយសន្លឹកប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ