កម្ពុជាទទួលកំណើនសេដ្ឋកិច្ចល្អ ប៉ុន្តែប្រឈមនឹងអតិផរណាខ្ពស់

ទស្សនៈព្រឹត្តិការណ៍សេដ្ឋកិច្ចខ្មែរ

ចន្ទ 08 សីហា 2011

កម្ពុជាទទួលកំណើនសេដ្ឋកិច្ចល្អ ប៉ុន្តែប្រឈមនឹងអតិផរណាខ្ពស់

ស្តាប់ (03:56)

បញ្ចូលទៅក្នុង Playlist របស់ខ្ញុំ

ចម្លងទុក

Embed

ផ្សារបន្លែមួយក្នុងខេត្តបាត់ដំបង

ដោយ គី សុខលីម

នៅក្នុងឆ្នាំ២០១១នេះ ប្រទេសកម្ពុជានឹងអាចទទួលបានកំណើនសេដ្ឋកិច្ចខ្ពស់ប៉ុន្តែព្រមពេលជាមួយគ្នា ប្រទេសក្រីក្រមួយនេះអាចប្រឈមនឹងអតិផរណាទំនិញដែរ។ អតិផរណាតម្លៃទំនិញនឹងរុញច្រានអោយអ្នកក្រីក្រកាន់តែលំបាក។

បន្ទាប់ពីទទួលរងសម្ពាធវិបត្តិសេដ្ឋកិច្ចពិភពលោកកាលពីឆ្នាំ២០០៨និង២០០៩រួចមក សេដ្ឋកិច្ចនៃប្រទេសកម្ពុជាចាប់ផ្ដើមងើបក្បាលឡើងវិញចាប់តាំងពីឆ្នាំ២០១០មក។

កាលពីឆ្នាំមុន ប្រទេសកម្ពុជាទទួលបានកំនើតសេដ្ឋកិច្ចជាង៦ភាគរយ។ នៅឆ្នាំ២០១១នេះ មន្ត្រីសេដ្ឋកិច្ចនិងពាណិជ្ជកម្មជាន់ខ្ពស់នៃរាជរដ្ឋាភិបាលកម្ពុជាមួយចំនួនបានទស្សន៍ទាយថា ប្រទេសក្រីក្រកម្ពុជានឹងអាចទទួលបានកំណើនសេដ្ឋកិច្ចរហូតដល់ទៅ៨ភាគរយ។ កំណើនសេដ្ឋកិច្ចនេះនឹងកើតចេញពីការងើបឡើងវិញនៃវិស័យទេសចរណ៍ វិស័យកាត់ដេរនិងវិស័យសំណង់។

អ្វីដែលជាការកត់សម្គាល់នៅពេលនេះគឺនៅត្រង់ថា នៅពេលដែលសេដ្ឋកិច្ចចាប់ផ្ដើមងើបឡើងវិញនោះ អត្រាអតិផរណាទំនិញនៅលើទីផ្សារហាក់បីដូចជាចាប់ផ្ដើមហក់ឡើងដែរ។ ការព្យាករណ៍មួយចំនួនធ្លាប់បានគិតគូរថា អត្រាអតិផរណានៅឆ្នាំ២០១១នេះនឹងអាចមានកម្រិតតែក្នុងរង្វង់៥,៥ភាគរយប៉ុណ្ណោះ។ ប៉ុន្តែឥឡូវនេះ អត្រាអតិផរណាបាន និងកំពុងហក់ស្ទុះឡើងជាបន្តបន្ទាប់។

ការព្យាករណ៍របស់ធនាគារជាតិនៃកម្ពុជាដែលបោះផ្សាយដោយកាសែតភ្នំពេញប៉ុស្តិ៍ កាលពីសប្ដាហ៍មុនបានបង្ហាញថា អត្រាអតិផរណានៅឆ្នាំ២០១១នេះអាចនឹងកើនឡើងក្នុងចន្លោះពី៨ទៅ៩ភាគរយ។ ជាលក្ខណៈទ្រឹស្ដី នៅពេលដែលប្រទេសមួយមានកំណើនសេដ្ឋកិច្ច អត្រាអតិផរណាអាចកើនឡើងបន្តិចពីព្រោះថា អ្នកប្រើប្រាស់ចាប់ផ្ដើមចំណាយច្រើនជាងមុន។ ការចំណាយច្រើនជាងមុននេះធ្វើអោយតម្លៃទំនិញកើនឡើង។

សម្រាប់ប្រទេសកម្ពុជា ការកើនឡើងអត្រាអតិផរណាតម្លៃទំនិញត្រូវបានលោក កង ចាន់ដារារ័ត្ន អ្នកវិភាគសេដ្ឋកិច្ចឯករាជនៅក្នុងប្រទេសកម្ពុជាពន្យល់ថាគឺដោយសារការធ្លាក់ចុះតម្លៃប្រាក់ដុល្លារធៀបទៅនឹងរូបិយវត្ថុផ្សេងៗ។

ប្រទេសកម្ពុជាគឺជាប្រទេសនាំចូលច្រើនជាងនាំចេញ។ ជាក់ស្តែង ក្នុងឆមាសទីមួយឆ្នាំ២០១១នេះ ប្រទេសក្រីក្រកម្ពុជានាំចូលក្នុងទឹកប្រាក់៣២៥០លានដុល្លារអាមេរិករីឯការនាំចេញវិញមានចំនួន២២៣០លានដុល្លារអាមេរិក។ ប្រសិនបើគេធ្វើការប្រៀបធៀបតួលេខនាំចូលនិងនាំចេញ គេសង្កេតឃើញថា ប្រទេសកម្ពុជាមានឧុនភាពសេដ្ឋកិច្ចជាង១ពាន់លានដុល្លារអាមេរិក។

អ្នកវិភាគសេដ្ឋកិច្ចឯករាជ លោក កង ចាន់ដារារ័ត្ន បានពន្យល់ថា ដោយសារប្រទេសកម្ពុជានាំចូលទំនិញច្រើន ហើយប្រើប្រាស់ប្រាក់ដុល្លារច្រើនក្នុងការទូទាត់ ដូច្នេះ នៅពេលដែលប្រាក់ដុល្លារចុះថោកប្រៀបនឹងរូបិយវត្ថុដទៃទៀត ពេលនោះ ទំនិញលក់នៅក្នុងប្រទេសកម្ពុជាត្រូវតែឡើងថ្លៃជាស្វ័យប្រវត្តិ។

តើគេគួរធ្វើយ៉ាងដូចម្តេចដើម្បីកាត់បន្ថយអត្រាអតិផរណា?
មធ្យោបាយមួយដែលអ្នកតវ៉ា កាលពីម្សិលមិញទាមទារអោយរដ្ឋាភិបាលកម្ពុជាអនុវត្តជាបន្ទាន់នោះ គឺការបញ្ចុះតម្លៃពន្ធនាំចូលប្រេងសាំង។ តម្លៃប្រេងសាំងខ្ពស់នៅកម្ពុជា គឺដោយសារតម្លៃពន្ធនាំចូលខ្ពស់។ អ្នកតវ៉ា កាលពីម្សិលមិញបានពន្យល់ថា តម្លៃប្រេងសាំងខ្ពស់ គឺជាមូលហេតុដែលទាញអោយទំនិញដទៃទៀតឡើងថ្លៃតាម។ សាំងមួយលីត្រនៅក្នុងប្រទេសកម្ពុជាមានតម្លៃជាង១ដុល្លារអាមេរិក។

លោកសេដ្ឋកិច្ចវិទូ កង ចាន់ដារារ័ត្ន បានពន្យល់បន្ថែមទៀតថា មធ្យោបាយផ្សេងទៀតដែលអាចទប់ទល់អត្រាអតិផរណាតម្លៃទំនិញដែរនោះ គឺជាការជំរុញការផលិតវិស័យកសិកម្ម។ ការផលិតអោយបានកាន់តែច្រើននៅក្នុងប្រទេស ពេលនោះ គេអាចរក្សាតម្លៃនៅលើទីផ្សារបានខ្លះ ហើយនេះគឺជាយុទ្ធសាស្ត្រដ៏ល្អសម្រាប់ធានាការផ្គត់ផ្គង់និងរក្សាតម្លៃអោយស្ថិតនៅថេរ។

អ្នកវិភាគសង្គមសេដ្ឋកិច្ចមួយចំនួនបាននិយាយថា អ្នកក្រីក្រគឺជាជនរងគ្រោះខ្លាំងជាងគេ ពីការឡើងចុះនៃសេដ្ឋកិច្ច។ មានន័យថា ពេលសេដ្ឋកិច្ចមានកំណើន អ្នកក្រីក្រទទួលបានផលតិចតួចប៉ុន្តែនៅពេលសេដ្ឋកិច្ចជួបវិបត្តិ អ្នកក្រីក្រ ប៉ះមុនគេ។

ប្រទេសកម្ពុជានៅមានប្រជាជន៣០ភាគរយទៀតកំពុងរស់នៅក្រោមបន្ទាត់ភាពក្រីក្ររកប្រាក់ចំណូលបានតិចជាង១ដុល្លារក្នុងមួយថ្ងៃសម្រាប់មនុស្សម្នាក់៕