យន្តហោះធ្លាក់បែកខ្ទេចពេក ពិបាកប្រមូលសាកសព
មួយថ្ងៃក្រោយការធ្លាក់យន្តហោះ នៅភាគខាងជើងប្រទេសម៉ាលី ស្លាប់អ្នកដំណើរនិងបុគ្គលិកសរុប ១១៨នាក់ ប្រធានាធិបតីបួរគីណាហ្វាសូ បានចុះទៅពិនិត្យដល់កន្លែងគ្រោះថ្នាក់។ តំណាងក្រុមគ្រួសាររងគ្រោះ ក៏បានទៅដល់ហើយកន្លែងយន្តហោះធ្លាក់។ ចំណែកនៅប៉ារីស ប្រធានាធិបតីបារាំងបានបើកជំនួបប្រជុំពិសេសនៅព្រឹកថ្ងៃសៅរ៍ជាលើកទីបី និងទទួលជួបក្រុមគ្រួសារជនរងគ្រោះបារាំង។ ការប្រមូលសាកសពជនរងគ្រោះដែលទំនងជាពិបាកខ្លាំងព្រោះយន្តហោះបែកខ្ចាត់ខ្ចាយ ជាបំណែកតូចៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣០
យន្តហោះបែកខ្ចាយ ខ្ទាតក្នុងរង្វង់កន្លះគីឡូម៉ែត្រ ! នេះបើតាមការរៀបរាប់របស់ឧត្តមសេនីយ៍បួរគីណាហ្វាសូ ដែលបានចុះទៅដល់កន្លែងកើតហេតុជាមួយប្រធានាធិបតី ម្សិលមិញ។ ចំណែកប្រធានាធិបតីម៉ាលី មិនបានត្រឹមតែចុះទៅក្រុងGao ក្រុងជិតជាងគេនៃកន្លែងយន្តហោះប៉ុណ្ណោះ មិនបានទៅដល់ផ្ទាល់កន្លែងកើតហេតុទេ។ រូបភាពថតដោយទាហានបួគីណាហ្វាសូ និងបារាំង បានបង្ហាញពីបំបែកយន្តហោះ ជាដុំដែក ដុំមេតាល់ តូចៗ ខ្ទាតខ្ចាត់ខ្ចាយ លើដី ក្នុងថ្លុកទឹក មើលមិនយល់ថាជាយន្តហោះទេ។
បំបែកយន្តហោះរាយពាសពេញដី ដែលអាចបញ្ជាក់កាន់តែច្បាស់ ថាយន្តហោះបានធ្លាក់មកប៉ះដី ឡើងខូង រួចផ្លោងហោះទៅមុខបន្តិច មុនបែកខ្ទេច ជាចំរៀក គ្មានសល់អ្វីជាទម្រង់ដើម។ ដូច្នេះការប្រមូល ស្វែងរកសាកសព ប្រមូលផ្គុំគ្នាពិតជាមានលក្ខណៈស្មុគស្មាញខ្លាំង និងគ្មានសោះឡើយ ក្តីសង្ឃឹមថារកឃើញមានអ្នកដំណើររួចពីស្លាប់។
ក្រុមគ្រួសារជនរងគ្រោះនៅបួគីណាហ្វាសូ អាចនឹងធ្វើដំណើរទៅក្បែរកន្លែងកើតហេតុ ចាប់ពីថ្ងៃសៅរ៍នេះទៅ។ ឯនៅប្រទេសបារាំងវិញ លោកប្រធានាធិបតី ហ្វ្រង់ស័រហូឡង់ បានទទួលក្រុមគ្រួសារ នៅរសៀលថ្ងៃសៅរ៍នេះ ខណៈដែលប្រទេសអាល់ហ្សេរី និងបួរគីណាហ្វាសូ កាន់ទុក្ខថ្នាក់ជាតិ។ បារាំងដែលមានជនរងគ្រោះច្រើនជាងគេ និងកំពុងមានទាហានបំពេញបេសកកម្មក្នុងតំបន់នោះស្រាប់ បានរួសរាន់បញ្ជូនប៉ូលិសឯកទេសជាងម្ភៃនាក់ ទៅភាគខាងជើងម៉ាលី ដើម្បីទទួលបន្ទុកស៊ើបអង្កេត និងរកអត្តសញ្ញាណសាកសព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ