អំពើពុករលួយនៅក្នុងស្ថាប័នអង្គការនឹងត្រូវទម្លាយអោយដឹង
ភាពមិនប្រក្រតីនៅក្នុងអង្គការសង្គមស៊ីវិលនៅក្នុងប្រទេសកម្ពុជានឹងត្រូវទម្លាយអោយដឹងនៅក្នុងរយៈពេលពីរខែទៀតតាមរយៈការសិក្សាស្រាវជ្រាវរបស់លោក កែម ឡី អ្នកជំនាញសង្គមសេដ្ឋកិច្ចឯករាជ្យ។ ប្រទេសកម្ពុជាមានអង្គការសង្គមស៊ីវិលជាង៣ពាន់ស្ថាប័ន។ ប៉ុន្តែមានអង្គការតែពាក់កណ្តាលប៉ុណ្ណោះកំពុងបំពេញសកម្មភាព។
ចុះផ្សាយនៅថ្ងៃ៖
ស្តាប់ - ០២:៣៥
លោក កែម ឡី អ្នកស្រាវជ្រាវសង្គមសេដ្ឋកិច្ចឯករាជ្យនៅក្នុងប្រទេសកម្ពុជាបានថ្លែងប្រាប់នៅថ្ងៃអាទិត្យនេះថា លោកកំពុងធ្វើការសិក្សាស្រាវជ្រាវស៊ីជម្រៅមួយស្តីអំពីភាពមិនប្រក្រតីកើតឡើងនៅក្នុងស្ថាប័នអង្គការសង្គមស៊ីវិល។
ប្រទេសកម្ពុជាមានអង្គការសង្គមស៊ីវិលជាង៣០០០ស្ថាប័នប៉ុន្តែមានអង្គការប្រមាណជាពាក់កណ្តាលប៉ុណ្ណោះដែលនៅមានសកម្មភាពធម្មតា។ ការសិក្សាស្រាវជ្រាវរកអំពើពុករលួយនៅក្នុងស្ថាប័នអង្គការសង្គមស៊ីវិលបានចាប់ផ្តើមហើយ ហើយនឹងត្រូវបញ្ចប់នៅក្នុងរយៈពេល២ខែទៀត។
លោក កែម ឡី អ្នកស្រាវជ្រាវសង្គមសេដ្ឋកិច្ចដែលជាអ្នកធ្វើកិច្ចការនេះផ្ទាល់បានបញ្ជាក់ប្រាប់នៅថ្ងៃអាទិត្យនេះថា គ្រួសារនិយមនៅក្នុងអង្គការ ការជ្រើសរើសបុគ្គលិកមិនមានតម្លាភាព ការប្រើប្រាស់ធនធានអង្គការខុសទិសដៅ ដូចជា រថយន្ត ម៉ូតូ និងសម្ភារៈផ្សេងៗដើម្បីផលប្រយោជន៍ផ្ទាល់ខ្លួន សុទ្ធសឹងជាប្រធានបទសំខាន់ៗនៅក្នុងការសិក្សាអង្កេត។ លោក កែម ឡី បានបញ្ជាក់ទៀតថា នៅក្នុងអង្គការខ្លះ ទាំងប្តី ទាំងប្រពន្ធ ទាំងកូន សុទ្ធតែកាន់កាប់តំណែងសំខាន់ៗ។ តើការធ្វើយ៉ាងដូច្នេះ មានតម្លាភាព និងគណនេយ្យភាពដែរឬទេ?
ទាក់ទងទៅនឹងការប្រើប្រាស់ទ្រព្យសម្បត្តិអង្គការវិញ លោក កែម ឡី បានបង្ហើបអោយដឹងថា មានប្រធានអង្គការមួយចំនួនបានប្រើប្រាស់រថយន្តអង្គការដើម្បីបម្រើកិច្ចការផ្ទាល់ខ្លួន ដូចជា យកទៅប្រើប្រាស់សម្រាប់ពិធីបុណ្យកថិន បុណ្យសព ឬដើរកម្សាន្តជាដើម។
ការសិក្សារបស់លោក កែម ឡី មិនគ្របដណ្តប់ស្ថាប័នរដ្ឋទេនៅពេលនេះប៉ុន្តែស្ថានភាពទូទៅនៅក្នុងអង្គការក៏មិនសូវខុសគ្នាពីស្ថាប័នរដ្ឋប៉ុន្មាននោះទេ។
នៅក្នុងស្ថាប័នក្រសួងនីមួយៗ គេសង្កេតឃើញមានខ្សែស្រឡាយអ្នកធំជាច្រើនធ្វើការនៅក្នុងក្រសួងនោះ។ ក្រសួងមួយចំនួនត្រូវបានគេរិះគន់ថា ជាក្រសួងគ្រួសារនិយមពីព្រោះសាច់សារលោហិតរបស់អ្នកមានអំណាចត្រូវបានគេដំឡើងអោយមានបុណ្យសក្តិ។
ក្រៅពីបញ្ហាបក្សពួកនិយម ការប្រើប្រាស់ធនធានរបស់រដ្ឋសម្រាប់ប្រយោជន៍របស់បុគ្គលក៏នៅតែកើតមានច្រើនដែរ។ រថយន្តរបស់រដ្ឋមួយចំនួនត្រូវបានគេសង្កេតឃើញថា មានការប្រើប្រាស់ខុសទិសដៅទាំងស្រុង។
ខុសទិសដៅ ពីព្រោះថា មន្ត្រីមានអំណាចប្រើប្រាស់រថយន្តទាំងនោះសម្រាប់ដើរកម្សាន្តជាលក្ខណៈគ្រួសារនៅថ្ងៃឈប់សម្រាក ឬប្រើប្រាស់រថយន្តរបស់រដ្ឋសម្រាប់ជំនួញផ្ទាល់ខ្លួនទៅវិញ។
លោក កែម ឡី អ្នកស្រាវជ្រាវសង្គមសេដ្ឋកិច្ចឯករាជ្យបាននិយាយទៀតថា លោកមិនទាន់មានគម្រោងស្រាវជ្រាវទៅលើស្ថាប័នរដ្ឋនៅឡើយទេ។ សម្រាប់ពេលនេះ លោកផ្តោតការស្រាវជ្រាវរបស់លោកទៅលើអំពើពុករលួយដែលកើតមានឡើងនៅក្នុងស្ថាប័នអង្គការជាមុនសិន។ ប្រសិនបើមានអំពើពុករលួយច្រើននៅក្នុងអង្គការ ពេលនោះ ម្ចាស់ជំនួយអាចកាត់ផ្តាច់ជំនួយ។ ម្ចាស់ជំនួយកាត់ជំនួយ ប្រជាពលរដ្ឋគឺជាអ្នករងគ្រោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ