ព្យុងយ៉ាងទៅលួងអង្គការសហប្រជាជាតិកុំឱ្យនាំកូរ៉េខាងជើងទៅតុលាការព្រហ្មទណ្ឌ
ចុះផ្សាយនៅថ្ងៃ៖
ស្តាប់ - ០៥:២៥
ឯកអគ្គរដ្ឋទូតកូរ៉េខាងជើង ប្រចាំអង្គការសហប្រជាជាតិ បានជួបពិភាក្សាជាមួយនឹងមន្ត្រីស៊ើបអង្កេតអង្គការសហប្រជាជាតិ នៅថ្ងៃចន្ទម្សិលមិញ ដើម្បីបង្ហាញអំពីចេតនារបស់ព្យុងយ៉ាងចង់អញ្ជើញមន្ត្រីទទួលបន្ទុកសិទ្ធិមនុស្សទៅបំពេញទស្សនកិច្ចនៅកូរ៉េខាងជើង។ ជំនួបនេះប្រព្រឹត្តទៅក្នុងខណៈដែលអង្គការសហប្រជាជាតិកំពុងត្រៀមរៀបចំបោះឆ្នោតជំរុញឱ្យតុលាការព្រហ្មទណ្ឌអន្តរជាតិបើកការស៊ើបអង្កេតលើករណីរំលោភសិទ្ធិមនុស្សនៅកូរ៉េខាងជើង។
ជំនួបរវាងឯកអគ្គរដ្ឋទូតកូរ៉េខាងជើងប្រចាំអ.ស.ប. និងអ្នករាយការណ៍ពិសេស លោក ម៉ាហ្សុគី ដារ៉ូស្មាន (Marzuki Darusman) ប្រព្រឹត្តទៅតែពីរថ្ងៃមុនការដាក់បង្ហាញរបាយការណ៍រំលោភសិទ្ធិមនុស្សនៅកូរ៉េខាងជើងទៅកាន់មហាសន្និបាតអង្គការសហប្រជាជាតិ។ របាយការណ៍នេះដឹកនាំសរសេរដោយលោក ម៉ាហ្សុគី ដារ៉ូស្មាន អំពាវនាវឱ្យក្រុមប្រឹក្សាសន្តិសុខអង្គការសហប្រជាជាតិចេញសេចក្តីសម្រេចមួយបញ្ជូនសំណុំរឿងកូរ៉េខាងជើងទៅតុលាការព្រហ្មទណ្ឌ ពីបទឧក្រិដ្ឋកម្មសង្គ្រាម។
របាយការណ៍រំលោភសិទ្ធិមនុស្ស
សូមបញ្ជាក់ថា កាលពីខែកុម្ភៈ គណៈកម្មការស៊ើបអង្កេតអង្គការសហប្រជាជាតិ បានចេញរបាយការណ៍មួយ ថាមានការរំលោភសិទ្ធមនុស្សយ៉ាងធ្ងន់ធ្ងរ និងជាលក្ខណៈប្រព័ន្ធ ពីសំណាក់មន្ត្រីនិងស្ថាប័នកូរ៉េខាងជើង ដែលគេអាចរាប់បញ្ចូលជាបទឧក្រិដ្ឋប្រឆាំងមនុស្សជាតិបាន។ របាយការណ៍ បានបញ្ជាក់ពីការធ្វើទារុណកម្ម ការបង្អត់អាហារ ឃាតកម្ម ការសម្លាប់ផ្តាច់ពូជ ទាសភាព ការធ្វើទុក្ខបុកម្នេញដោយហេតុផលនយោបាយ សាសនា ឬជាតិសាសន៍ និងទង្វើអនុស្សធម៌ជាច្រើនផ្សេងទៀត។
ប៉ុន្តែការស៊ើបអង្កេតរយៈពេលជិតមួយឆ្នាំនោះ ជាលទ្ធផលនៃការប្រមែរប្រមូលភស្តុតាង បានមកពីការសាកសួរជនភៀសខ្លួនកូរ៉េខាងជើង ដែលកំពុងរស់នៅក្នុងប្រទេសកូរ៉េខាងត្បូង និងជប៉ុន។ ពោលគឺក្រុមស៊ើបអង្កេតមិនបានចូលទៅក្នុងប្រទេសដោយផ្ទាល់ទេ ព្រោះគ្មានការអនុញ្ញតពីអាជ្ញាធរព្យុងយ៉ាង។ ទើបតែនៅពេលនេះ ស្រាប់តែកូរ៉េខាងជើង មកពិភាក្សាបង្ហើបអំពីលទ្ធភាព ចង់អញ្ជើញក្រុមភ្នាក់ងារស៊ើបអង្កេតសិទ្ធិមនុស្សអង្គការសហប្រជាជាតិទៅវិញ។
បើតាមអ្នកទទួលខុសត្រូវអង្គការសហប្រជាជាតិ កូរ៉េខាងជើង សុខចិត្ត សហការជាមួយ និង ចង់ឱ្យមន្ត្រី អ.ស.ប.ទៅតាមដានបញ្ហាសិទ្ធិមនុស្ស នៅក្នុងស្រុក ដោយចង់ឱ្យគណៈកម្មការស៊ើបអង្កេតអ.ស.ប. បោះបង់ចោលគំនិតចង់នាំព្យុងយ៉ាងទៅកាន់តុលាការព្រហ្មទណ្ឌ។ សំណើដែលតំណាងអង្គការសហប្រជាជាតិទំនងជាមិនអាចទទួលយកបានឡើយ ! សុខចិត្តមិនទៅទស្សនាកូរ៉េខាងជើង ជាជាងបោះបង់គំនិតនាំព្យុងយ៉ាងទៅតុលាការ។
សេចក្តីសម្រេចចិត្តរបស់ក្រុមប្រឹក្សាសន្តិសុខ
តាមរយៈរបាយការណ៍ដ៏គួរឱ្យតក់ស្លុតទាក់ទងនឹងការរំលោភសិទ្ធិមនុស្សដ៏ធ្ងន់ធ្ងរ នៅកូរ៉េខាងជើងនេះ ជប៉ុននិងសហភាពអឺរ៉ុប បានស្នើគម្រោងសេចក្តីសម្រេចចិត្តមួយ ដែលអំពាវនាវឱ្យក្រុមប្រឹក្សាសន្តិសុខ ត្រូវតែចាត់វិធានការសមស្រប ប្រឆាំងព្យុងយ៉ាង គឺបញ្ជូនទៅតុលាការព្រហ្មទណ្ឌអន្តរជាតិ នៅឡាអេ ក្នុងបទឧក្រិដ្ឋប្រឆាំងមនុស្សជាតិ នាឱកាសមហាសន្និបាតអង្គការសហប្រជាជាតិ។
លោក ម៉ាហ្សុគី ដារ៉ូស្មាន បានផ្តល់អនុសាសន៍ឱ្យប្រទេសជាសមាជិក ទាំង១៩៣ ក្នុងមហាសន្និបាតអង្គការសហប្រជាជាតិ បោះឆ្នោតស្នើសុំទៅក្រុមប្រឹក្សាសន្តិសុខ ឱ្យចេញសេចក្តីសម្រេចចិត្តមួយយកកូរ៉េខាងជើងទៅតុលាការព្រហ្មទណ្ឌ។ បោះឆ្នោតនឹងប្រព្រឹត្តនៅចុងខែវិច្ឆិកា។ ហើយក្រោយពីមានសេចក្តីសម្រេចរបស់ក្រុមប្រឹក្សា ការស៊ើបអង្កេតពីបទឧក្រិដ្ឋកម្មសង្គ្រាម ប្រឆាំងនឹងរបបព្យុងយ៉ាង ប្រឆាំងនឹងមេដឹកនាំកំពូលៗ អាចចាប់ផ្តើមបាន។
►សូមអាន ៖ តើបុគ្គលឯកជនអាចប្តឹងទៅតុលាការព្រហ្មទណ្ឌអន្តរជាតិឡាអេ បានឬទេ ?
សិទ្ធិវ៉េតូចិន
ប៉ុន្តែ គឺនៅពេលដល់ឡើងក្រុមប្រឹក្សាសន្តិសុខអង្គការសហប្រជាជាតិ ដែលអាចនឹងមានឧសបគ្គមួយមករាំងស្ទះ នោះគឺចិន។ ចិនអាចនឹងប្រើសិទ្ធិប្រឆាំងវ៉េតូ មិនឱ្យក្រុមប្រឹក្សាចេញសេចក្តីសម្រេច នាំកូរ៉េខាងជើងទៅកាន់តុលាការព្រហ្មទណ្ឌអន្តរជាតិ។ ប៉េកាំងបានធ្លាប់ប្រកាសប្រឆាំងនឹងគំនិតដោះស្រាយបញ្ហានៅតុលាការរួចមកហើយ។ យ៉ាងណាក៏ដោយ ក៏ចៅក្រមជាអ្នកដឹកនាំគណៈកម្មការស៊ើបអង្កេតសិទ្ធិមនុស្សនៅកូរ៉េខាងជើង យល់ថាគេមិនត្រូវខ្លាច ឬគិតថាចិនបោះឆ្នោតវ៉េតូរហូតឡើយ ! ចិនក៏ធ្លាប់ស្ទាក់ស្ទើរចិត្តមិនប្រើវ៉េតូដែរទេតើ ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ