កូរ៉េខាងជើង - 
អត្ថបទចុះ​ផ្សាយ​នៅ​ថ្ងៃ ព្រហស្បតិ៍ 31 ឧសភា 2012 - ព័ត៌មានទើប​កែប្រើ​លើកចុងក្រោយ​ ថ្ងៃ ព្រហស្បតិ៍ 31 ឧសភា 2012

រដ្ឋធម្មនុញ្ញ​ថ្មី​អនុញ្ញាត​ឲ្យ​កូរ៉េខាងជើង​បំពាក់​អាវុធ​នុយក្លេអ៊ែរ​ជា​ផ្លូវការ

លោក អគ្គមគ្គុទ្ទេសក៍កូរ៉េខាងជើង គីម ជុងអ៊ុន
លោក អគ្គមគ្គុទ្ទេសក៍កូរ៉េខាងជើង គីម ជុងអ៊ុន
©KCNA/AFP

ដោយ គួច គន្ធារ៉ា

កូរ៉េខាងជើង​ទើប​បាន​ប្រកាស​ឲ្យ​ដឹង​អំពី​ច្បាប់​រដ្ឋធម្មនុញ្ញ​ថ្មី​ដែល​បាន​អនុញ្ញាត​ឲ្យ​ប្រទេស​បំពាក់​អាវុធ​នុយក្លេអ៊ែរ​ជា​ផ្លូវការ។ នេះ​ជា​លើក​ទីមួយ​បង្អស់​ដែល​រដ្ឋធម្មនុញ្ញ​បាន​ចែង​យ៉ាង​ច្បាស់​ពី​មហិច្ឆតា​មហាអំណាច​នុយក្លេអ៊ែរ​របស់​ទីក្រុង​ព្យុងយ៉ាង។ រដ្ឋធម្មនុញ្ញ​ថ្មី​នេះ​នឹង​បង្ក​ការ​លំបាក​មួយ​កម្រិត​បន្ថែម​ទៀត​សម្រាប់​សហគមន៍​អន្តរជាតិ​ក្នុង​ការ​ជម្នះ​កូរ៉េខាងជើង​ឲ្យ​បោះបង់​ចោល​អាវុធ​បរមាណូ។

សេចក្តីរាយការណ៍​របស់ គួច គន្ធារ៉ា
 

31/05/2012 by គួច គន្ធារ៉ា

 

ច្បាប់​រដ្ឋធម្មនុញ្ញ​ថ្មី​របស់​កូរ៉េខាងជើង​ទើប​ត្រូវ​បាន​ដាក់​ផ្សាយ​តាម​គេហទំព័រ​ផ្លូវការ​របស់​រដ្ឋ ក្រោយ​ពី​បាន​ពិនិត្យមើល​ឡើង​វិញ​នា​សម័យប្រជុំ​សភា​កាល​ពី​ថ្ងៃទី ១៣ មេសា ឆ្នំា ២០១២។ គួរ​ជម្រាប​ជូន​ថា រៀងរាល់ ២ឆ្នំា​ម្តង រដ្ឋាភិបាល​ទីក្រុង​ព្យុងយ៉ាង​តែងតែ​ធ្វើ​ការសើរើ-ពិនិត្យ​មើល​ច្បាប់​រដ្ឋធម្មនុញ្ញ​របស់​ខ្លួន តែ​កាល​ណោះ មិន​បាន​ចែង​ពី​រដ្ឋ​បំពាក់​អាវុធ​នុយក្លេអ៊ែរ​ទេ។
 
អត្ថបទ​ថ្មី​នៃ​ច្បាប់រដ្ឋធម្មនុញ្ញ​ដែល​ទើប​បាន​កែប្រែ​ក្នុង​ឆ្នំា ២០១២ នេះ​បាន​ចែង​ថា៖ « អគ្គមគ្គុទ្ទេសក៍ គីម ជុងអ៊ីល ប្រធាន​គណៈកម្មការ​ការពារជាតិ​បាន​ធ្វើ​ឲ្យ​​ប្រទេស​របស់​យើង​ក្លាយ​ជា​រដ្ឋ​មួយ​ដែល​គ្មាន​នរណា​អាច​ឈ្លានពាន​បាន​ខាង​ឧត្តមគតិ​នយោបាយ ជា​រដ្ឋ​មួយ​បំពាក់​អាវុធ​នុយក្លេអ៊ែរ និង​ជា​មហា​អំណាច​យោធា​ដែល​គ្មាន​គូប្រៀប។ តាម​រយៈ​មហិច្ឆតា​នេះ នឹង​បើក​ផ្លូវ​ឲ្យ​មាន​ការ​កសាង​រដ្ឋ​មួយ​ខ្លំាង និង​សម្បូរ​រុងរឿង »។
 
សូម​បញ្ជាក់​ថា គណៈកម្មការ​ការពារជាតិ គឺ​ជា​ស្ថាប័ន​ជាន់ខ្ពស់​មួយ​នៅ​ក្នុង​របប​កុម្មុយនិស្ត​កូរ៉េខាងជើង​ដែល​ដឹក​នំា​ដោយ​អគ្គមគ្គុទ្ទេសក៍ គីម ជុងអ៊ីល រហូត​ដល់​ថ្ងៃ​មរណភាព​របស់​លោក​ក្នុង​ខែ​ធ្នូ ឆ្នំា ២០១១។ បច្ចុប្បន្ន ប្រធាន​គណៈកម្មការ​នេះ​កំពុង​ដឹក​នំា​ដោយ​លោក អគ្គមគ្គុទ្ទេសក៍​ថ្មី គីម ជុងអ៊ុន។
 
ច្បាប់​រដ្ឋធម្មនុញ្ញ​ថ្មី​បាន​គូស​បញ្ជាក់​យ៉ាង​ច្បាស់​ក្រឡែត​ថា ទីក្រុង​ព្យុងយ៉ាង​គ្មាន​បំណង​នឹង​បោះបង់​ចោល​នូវ​កម្មវិធី​នុយក្លេអ៊ែរ​របស់​ខ្លួន​ទេ ទោះបី​ជា​នៅ​ក្នុង​កាលៈទេសៈ​ណា​ក៏​ដោយ នេះ​ជា​ការ​អះអាង​របស់​លោក Cheon Sung-Whun នៃ​វិទ្យាស្ថាន​កូរ៉េ​ដើម្បី​បង្រួបបង្រួមជាតិ​នៅ​ក្នុង​ទីក្រុង​សេអ៊ូល កូរ៉េខាងត្បូង។ លោក Whun បាន​បន្ថែម​ថា បើ​មាន​ការ​អំពាវនាវ​ឲ្យ​កូរ៉េខាងជើង​បោះបង់​ចោល​អាវុធ​នុយក្លេអ៊ែរ​នៅ​ក្នុង​កិច្ចចរចា​ណា​មួយ​នោះ ទីក្រុង​ព្យុងយ៉ាង​នឹង​ឆ្លើយ​ថា ជា​ការ​រំលោភ​ច្បាប់​រដ្ឋធម្មនុញ្ញ​របស់​ប្រទេស​ខ្លួន។
 
ដូច្នេះ​ឃើញ​ថា ការ​ដែល​ទីក្រុង​ព្យុងយ៉ាង​ទើប​មាន​ច្បាប់​រដ្ឋធម្មនុញ​ថ្មី​នេះ ពិត​ជា​ដំណឹង​អាក្រក់​មួយ​ចំពោះ​ភាគី​ពាក់ព័ន្ធ​នៅ​ក្នុង​កិច្ចចរចា ៦ភាគី​ស្តីពី​សំណុំរឿង​នុយក្លេអ៊ែរ​កូរ៉េ​ខាង​ជើង។ កិច្ចចរចា ៦ ភាគី​ដែល​ជាប់​គំាង​តំាង​ពី​ខែ​ធ្នូ ឆ្នំា ២០០៨ មក​ម្ល៉េះ៕

 

tags: កូរ៉េ​ខាង​ជើង
ទាក់ទងនឹងប្រធានបទនេះ​ដែរ :
អត្ថាធិប្បាយ
ប្រតិកម្ម​ជុំវិញ​អត្ថបទនេះ
The content of this field is kept private and will not be shown publicly.
To prevent automated spam submissions leave this field empty.
CAPTCHA
This question is for testing whether you are a human visitor and to prevent automated spam submissions.
Close