សហគមន៍អ៊ីស្លាមទទួលរងការវាយប្រហារកាន់តែខ្លាំងឡើងនៅជិតពេលបោះឆ្នោតប្រធានាធិបតីបារាំង
កិច្ចប្រជុំរវាងអ្នកកាន់សាសនាអ៊ីស្លាមក្នុងប្រទេសបារាំង ជាលើកទី២៩ បានបើកទ្វារហើយ នៅថ្ងៃសុក្រ ទី៦ មេសា នៅជាយទីក្រុងប៉ារីស។ មនុស្សជាង ១០ ម៉ឺននាក់ត្រូវបានគេរំពឹងថានឹងមកចូលរួមពិភាក្សានៅក្នុងកិច្ចប្រជុំប្រចាំឆ្នាំ រយៈពេល៤ថ្ងៃនេះ ដែលជាធម្មតាលើកឡើងរឿងរ៉ាវនយោបាយ និងសាសនា។ ក៏ប៉ុន្តែ ការជួបប្រជុំឆ្នាំនេះមានលក្ខណៈតានតឹងជាងពេលណាៗទាំងអស់ ដោយសារតែថ្មីៗនេះ មានករណីបាញ់សម្លាប់ប្រជាជនស្លូតត្រង់ជាបន្តបន្ទាប់ដោយពួកអ៊ីស្លាមនិយមជ្រុល និងយុទ្ធនាការបង្រ្កាបដែលដាក់ចេញជាបន្ទាន់ដោយរដ្ឋាភិបាលបារាំងបង្រ្កាបក្រុមខាងលើ។ បក្សស្តាំនិយម កំពុងលើកយកប្រធានបទនេះ មកកេងចំណេញនៅក្នុងនយោបាយឃោសនាបោះឆ្នោតរបស់ខ្លួន នៅពេលការបោះឆ្នោតប្រធានាធិបតីកាន់តែខិតជិតចូលមកដល់ ដែលនេះបានបណ្តាលអោយសហគមន៍អ៊ីស្លាមទទួលរងការវាយប្រហារកាន់តែខ្លាំងឡើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
“ អ្វីៗទាំងអស់ត្រូវធ្វើឡើងនៅក្នុងបរិយាកាសភាតរភាព និងដោយសន្តិភាព” ពាក្យស្លោកទាំងនេះដែលគេមើលឃើញនៅលើទំព័៍រវេបសាយរបស់សហភាពអង្គការអ៊ីស្លាមនៃប្រទេសបារាំងដែលគេហៅកាត់ថា UOIF កំពុងដើរបញ្រ្ចាសទិសទៅនឹងស្ថានភាពរបស់ប្រជាជនកាន់សាសនាអ៊ីស្លាមបច្ចុប្បន្ននៅក្នុងប្រទេសបារាំង។ ចាប់តាំងពីមានករណីបាញ់សម្លាប់ប្រជាជនស្លូតត្រង់ជាបន្តបន្ទាប់ ដោយជនអ៊ីស្លាមនិយមជ្រុលនៅក្នុងខេត្ត Toulouse និងសង្កាត់ Montauban ថ្មីៗនេះមក រដ្ឋាភិបាលរបស់លោក Nicolas Sarkozy បានចេញយុទ្ធនាការបង្រ្កាប និងតាមចាប់មិនស្រាកស្រាន្តមុខសញ្ញានានាដែលប្រកាន់សាសនាអ៊ីស្លាមនិយមជ្រុល។ យុទ្ធនាការដែលគេហៅថា ជាការប្រឆាំង នឹងក្រុមដែលមានគំនិតស្អប់ខ្ពើម។
ជាមួយនឹងស្ថានភាពកំពុងតែជ្រួលច្របល់សព្វថ្ងៃ ទោះចង់ឬមិនចង់ការជួបប្រជុំគ្នារវាងអ្នកកាន់សាសនាអ៊ីស្លាមក្នុងប្រទេសបារាំងដែលរៀបចំឡើង នៅចំពេលនេះ ដោយសហភាពអង្គការអ៊ីស្លាមនិយម នៃប្រទេសបារាំងហៅកាត់ថា UOIF កំពុងប្រព្រឹត្តទៅនៅក្រោមសម្ពាធនិង ស្ថានភាពដ៏តានតឹង ជាពិសេសនៅពេលដែល ការគំរាមកំហែងរបស់ពួកអ៊ីស្លាមនិយមជ្រុល កំពុងក្លាយជាប្រធានបទចម្បងរបស់គណបក្សស្តាំនិយមជ្រុលនៅក្នុងយុទ្ធនាការឃោសនាបោះឆ្នោតប្រធានាធិបតីបារាំងថ្មីដែលថ្ងៃបោះឆ្នោតនឹងប្រព្រឹត្តនៅតែពីរសប្តាហ៍ទៀតទេ។
លោកស្រី Marine Le Pen បេក្ខនារីប្រធានាធិបតីរបស់គណបក្សរណសិរ្សជាតិ បានថែមទាំងទាមទារអោយរំលាយចោល អង្គការ UOIF ដោយចោទថាស្ថាប័នខាងលើស្និទ្ធទៅនឹង ពួកអ៊ីស្លាមនិយមជ្រុល ឬពួកភេរវករ។
វាគ្មិន៦នាក់ត្រូវបានហាមឃាត់មិនអោយថ្លែងនៅក្នុងការជួបប្រជុំខាងលើដើម្បីជៀសវាងការបង្កភាពវឹកវរដល់សណ្តាប់ធ្នាប់ជាតិ៕ លោក Ahmed Jaballah ប្រធាន UOIF បានសំដែងការសោកស្តាយចំពោះការរារាំងរបស់រដ្ឋាភិបាលហើយ និយាយថាសហគមន៍អ៊ីស្លាមនៅបារាំងចាត់ទុក ការហាមឃាត់ខាងលើជាការជាន់ឈ្លីកិត្តិយសពូកគេ។
“ ពួកយើងទាំងអស់គ្នាមានអារម្មណ៍ថាទទួលរងការឈឺចាប់ចំពោះក្រសែភ្នែកទាំងឡាយដែលមើលមកយើងថាជាស្ថាប័ន និងសហគមន៍ប្រកបដោយគ្រោះថ្នាក់ ហើយស្និទ្ធនឹង ក្រុមភេរវកម្ម។ បើទោះបីជាការឃោសនានិងការបោះឆ្នោតនឹងបញ្ចប់ក្នុងពេលពីរសប្តាហ៍ទៀតក៏ដោយ ក៏ស្លាកស្នាមអាក្រក់ទាំងនេះនៅតែជាប់ជាមួយយើង ” នេះជាការថ្លែងបន្ថែមរបស់លោក Boubaker al-Haj Amor តំណាងម្នាក់ទៀតរបស់ UOIF
ប៉ុន្តែ លោក Claude Guéant រដ្ឋមន្រ្តីក្រសួងមហាផ្ទែបារាំងបានអះអាងថា អន្តរាគមន៍កន្លងមករបស់រដ្ឋាភិបាល គឺដើម្បីការពារសន្តិសុខជូនប្រជាជនទូទៅតែប៉ុណ្ណោះ ហើយថាលោកក៏បានជួបពិភាក្សាជាមួយតំណាងសហភាពអង្គការអ៊ីស្លាមនៅប្រទេសបារាំង UOIF រួចរាល់ហើយដែរ។ លោកសន្យាថានឹងធ្វើការងារដោយប្រុងប្រយ័ត្នបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ