គណៈកម្មាធិការសហប្រតិបត្តិការដើម្បីកម្ពុជា រកឃើញបញ្ហាប្រឈម៧ ក្នុងការអភិវឌ្ឍន៍នៅកម្ពុជា
គណៈកម្មាធិការសហប្រតិបត្តិការដើម្បីកម្ពុជា ហៅកាត់ថា CCC ដែលជាក្រុមអង្គការសង្គមស៊ីវិល ជាង១៥០អង្គការ បានអះអាងថា មានបញ្ហាប្រឈមចំនួន៧ ដែលកំពុងជាឧបសគ្គសម្រាប់ការអភិវឌ្ឍន៍សង្គមកម្ពុជា។ បញ្ហាទាំង៧នោះរួមមានបញ្ហាអភិបាលកិច្ចទន់ខ្សោយ អំពើពុករលួយ ភាពអយុត្តិធម៌ និងបញ្ហាសិទ្ធិមនុស្សជាដើម។ ប៉ុន្តែយ៉ាងណាក៏ដោយ បញ្ហាជម្លោះនយោបាយដែលកំពុងអូសបន្លាយនាពេលបច្ចុប្បន្ន ក៏ត្រូវបានក្រុមអង្គការសង្គមស៊ីវិលអះអាងថាជាកត្តារាំងស្ទះគ្រប់វិស័យនៃដំណើរការអភិវឌ្ឍន៍កម្ពុជាទាំងមូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
មានបញ្ហាប្រឈមចំនួន៧កំពុងរាំងស្ទះដល់ដំណើរការអភវិឌ្ឍន៍សង្គមកម្ពុជា។ នេះជាការរកឃើញរបស់ក្រុមអង្គការសង្គមស៊ីវិលនៃគណៈកម្មាធិការសហប្រតិបត្តិការដើម្បីកម្ពុជា។បញ្ហាទាំង៧នោះមាន ទី១ គឺបញ្ហាអភិវឌ្ឍន៍សេដ្ឋកិច្ចសង្គម ដែលមិនទាន់មានភាពប្រសើរ ទី២គឺកំសោយនៃអភិបាលកិច្ចរបស់រដ្ឋាភិបាល និងអំពើពុករលួយ ទី៣គឺ បញ្ហាការគ្រប់គ្រងធនធានធម្មជាតិនិងការបំផ្លាញព្រៃឈើ ទី៤គឺ កំណែទម្រង់តុលាការ ទី៥គឺភាពមិនទាន់ឯករាជ្យនៃប្រព័ន្ធផ្សព្វផ្សាយ ទី៦ គឺបញ្ហាកំណែទម្រង់ប្រព័ន្ធបោះឆ្នោតនៅកម្ពុជា ទី៧ គឺការលើកកម្ពស់សិទ្ធិមនុស្ស និងប្រជាធិបតេយ្យនៅកម្ពុជាជាដើម។
ថ្លែងក្នុងកិច្ចប្រជុំបូកសរុបការងារប្រចាំឆ្នាំរបស់គណៈកម្មាធិការសហប្រតិបត្តិការដើម្បីកម្ពុជានៅថ្ងៃទី៥ មីនា ក្នុងសណ្ឋាគារកាំបូឌីយ៉ាណា លោក សឿង សារឿន នាយកប្រតិបត្តិ នៃគណៈកម្មាធិការសហប្រតិបត្តិការដើម្បីកម្ពុជា បានអះអាងថា ការរកឃើញបញ្ហាប្រឈមទាំងនេះគឺផ្អែកលើប្រភពជឿជាក់ជាច្រើនដើម្បីវាយតម្លៃ ហើយថាក្រោយការរកឃើញចំណុចប្រឈមទាំងនេះ ក្រុមអង្គការសង្គមស៊ីវិល ដែលមានបណ្តាញអង្គការជាតិ និងអន្តរជាតិ ប្រមាណជាង១៥០អង្គការ ដែលកំពុងប្រតិបត្តិការក្នុងសង្គមកម្ពុជា នឹងលើកទិសដៅ និងចំណុចអត្ថិភាពរបស់ខ្លួនដើម្បីរួមគ្នាដោះស្រាយបញ្ហាសង្គមទាំងនោះ។
ចំណែកឯបញ្ហាជម្លោះនយោបាយវាងបក្សកាន់អំណាច និងបក្សប្រឆាំងដែលមិនទាន់រកឃើញច្រកចេញនោះ លោក សឿង សារឿន បានបញ្ជាក់ថា ការអូសបន្លាយនៃវិបត្តិនេះ គឺជាឧបសគ្គរារាំងសម្រាប់ក្រុមអង្គការសង្គមស៊ីវិលដើម្បីប្រតិបត្តិលើផែនការរបស់ខ្លួន។
ក្នុងវេទិកាបូកសរុបការងារប្រចាំឆ្នាំរបស់ក្រុមអង្គការសង្គមស៊ីវិល ដែលធ្វើពេញមួយថ្ងៃទី៥ មីនានេះ ក៏មានការចូលរួមពីបណ្ឌិត ឡៅ ម៉ុងហៃ លោក តុង គឹមស៊ុន នៃវិទ្យាស្ថានស្រាវជ្រាវកម្ពុជាCDRI និងលោក សំ អ៊ីន នៃអង្គការជីវិតថ្លៃថ្នូរជាដើម។
តាមរយៈ លោក សឿង សារឿន នាយកប្រតិបត្តិ នៃគណៈកម្មាធិការសហប្រតិបត្តិការដើម្បីកម្ពុជា ដំណោះស្រាយដែលមានប្រសិទ្ធភាពចំពោះបញ្ហាប្រឈមដែលកំពុងកើតឡើងនៅកម្ពុជានាពេលបច្ចុប្បន្ននោះ គឺការសហការគ្នាជាដៃគូរវាងគ្រប់អ្នកពាក់ព័ន្ធ និងការគោរពសិទ្ធិមនុស្សជាមូលដ្ឋានដើម្បីការអភិវិឌ្ឍន៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ