ចិន -

អត្ថបទចុះផ្សាយនៅថ្ងៃ ព្រហស្បតិ៍ 01 វិច្ឆិកា 2012 - ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 01 វិច្ឆិកា 2012

ក្រុមអ្នកជំនាញចិនចង់ឲ្យរដ្ឋាភិបាលផ្អាកការកម្រិតឲ្យមានកូនតែម្នាក់ក្នុងមួយគ្រួសារ

រដ្ឋាភិបាលក្រុងប៉េកាំងដាក់កម្រិតឲ្យគ្រួសារមួយមានកូនតែម្នាក់ ដើម្បីទប់កុំឲ្យប្រជាជនចិនមានកំណើនលឿនពេក

Getty/ChinaFotoPress

ដោយ សេង ឌីណា

ក្រុមអ្នកជំនាញ នៃវិទ្យាស្ថានស្រាវជ្រាវឯករាជ្យមួយបានស្នើសុំឲ្យរដ្ឋាភិបាលចិន ផ្អាកជាបណ្តោះអាសន្ន នូវនយោបាយ ដែលកំណត់ឲ្យគ្រួសារមួយ មានកូនតែម្នាក់ ដោយលើកឡើងថា នយោបាយនេះអាចនឹងធ្វើឲ្យចិនជួបនឹងវិបត្តិប្រជាសាស្រ្ត ដែលអាចប៉ះពាល់ទាំងវិស័យសេដ្ឋកិច្ច និងវិស័យសង្គមកិច្ចចិន។

សេចក្តីរាយការណ៍របស់ សេង ឌីណា

ស្តាប់ (01:42)

01/11/2012

សំណើសុំផ្អាកនយោបាយ “គ្រួសារមួយ កូនម្នាក់” ត្រូវបានស្នើឡើងដោយ “មូលនិធិស្រាវជ្រាវខាងផ្នែកអភិវឌ្ឍ” (China Development Research Foundation ហៅកាត់ថា CDRF) ដែលជាវិទ្យាស្ថានស្រាវជ្រាវឯករាជ្យ ប៉ុន្តែ មានទំនាក់ទំនងជិតស្និទ្ធជាមួយនឹងរដ្ឋាភិបាលចិន។

ក្រុមអ្នកជំនាញនៃវិទ្យាស្ថានស្រាវជ្រាវនេះបានលើកហេតុផលថា ការកំណត់ឲ្យគ្រួសារមួយមានកូនតែម្នាក់ ដូចជាពេលបច្ចុប្បន្ននេះ នឹងធ្វើឲ្យចិនជួបនឹងបញ្ហាធំមួយ គឺប្រជាជនមានវ័យកាន់តែចំណាស់ ពោលគឺ មនុស្សចាស់ ដែលផុតអាយុធ្វើការនឹងមានចំនួនកាន់តែច្រើន បើធៀបនឹងកំណើននៃប្រជាជនក្មេងៗ ដែលពេញកម្លាំងធ្វើការ។ បញ្ហានេះអាចនឹងបង្កជាផលប៉ះពាល់ទៅដល់វិស័យសង្គមកិច្ច និងការអភិវឌ្ឍសេដ្ឋកិច្ចរបស់ចិន ទៅថ្ងៃអនាគត។

វិទ្យាស្ថាន CDRF បានស្នើឲ្យរដ្ឋាភិបាលចិនចាប់ផ្តើមបន្ធូរបន្ថយការកម្រិតចំនួនកូននេះ បន្តិចម្តង ទៅតាមដំណាក់កាល ដោយចាប់ផ្តើមពីដំបូង ពីប្រជាជន ដែលរស់នៅតាមទីក្រុង និងទីប្រជុំជន។ បន្ទាប់មក ចាប់ពីឆ្នាំ២០១៥ទៅ អនុញ្ញាតឲ្យគ្រប់ក្រុមគ្រួសារទាំងអស់ នៅទូទាំងប្រទេស អាចមានកូន ២នាក់ ក្នុងមួយគ្រួសារ។ ចុងបញ្ចប់ ចាប់ពីឆ្នាំ២០២០ទៅ រដ្ឋាភិបាលគួរត្រូវបញ្ឈប់ការកំណត់ចំនួនកូនទាំងស្រុង ដោយទុកឲ្យឪពុកម្តាយជាអ្នកសម្រេចចិត្តដោយខ្លួនឯងថា តើគួរមានកូនប៉ុន្មាននាក់ ជាការសមរម្យ សម្រាប់គ្រួសាររបស់ពួកគេរៀងៗខ្លួន។

គួរបញ្ជាក់ថា កន្លងមក មានមន្រ្តីបក្សកុម្មុយនិស្តចិន នៅតាមខេត្តខ្លះ ដូចជានៅ ក្វាងទុង ជាដើម ក៏ធ្លាប់បានស្នើឲ្យរដ្ឋាភិបាលបន្ធូរបន្ថយការកម្រិតចំនួនកូននេះដែរ។ ក៏ប៉ុន្តែ រដ្ឋាភិបាលក្រុងប៉េកាំងតែងតែបដិសេធ ដោយលើកឡើងថា បច្ចុប្បន្ននេះ ចិនមានប្រជាជនរហូតដល់ទៅ ១ពាន់ ៣រយលាននាក់ទៅហើយ។ ប្រសិនបើរដ្ឋមិនដាក់ចេញ នូវនយោបាយកំណត់ចំនួនកូន “គ្រួសារមួយ កូនម្នាក់” នេះទេ ចំនួនប្រជាជនចិននឹងកើនឡើងកាន់តែខ្លាំងជាងនេះថែមទៀត៕