រដ្ឋមន្ត្រីការពារជាតិចិនទស្សនកិច្ចនៅកម្ពុជា
រដ្ឋមន្ត្រីក្រសួងការពារជាតិចិនលោកលៀងគងលី (LIANG GUANGLIE) បានមកដល់ភ្នំពេញនារសៀលថ្ងៃអាទិត្យទី ២៧ ឧសភានេះក្នុងដំណើរទេស្សនកិច្ចររយៈពេល៤ថ្ងៃនៅកម្ពុជា។ដំណើរទស្សនកិច្ចនេះមានគោលដៅពង្រឹងកិច្ចសហប្រតិបត្តិការផ្នែកយោធារវាងប្រទេសទាំងពីរ។វត្តមានរបស់ប្រមុខយោធាចិននៅកម្ពុជាបានកើតឡើងចំពេលដែលរដ្ឋមន្ត្រីការពារជាតិអាស៊ានបើកកិច្ចប្រជុំ នៅទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:២២
ដំណើរទស្សនកិច្ចរបស់រដ្ឋមន្ត្រីការពារជាតិចិននៅកម្ពុជានាពេលនេះត្រូវបានគេពន្យល់ថា មានគោលដៅពង្រឹងទំនាក់ទំនងយោធារវាងប្រទេសទាំងពីរឲ្យរឹងមាំ និងកាន់តែស៊ីជម្រៅថែមទៀត។ រដ្ឋមន្ត្រីការពារជាតិចិន និងកម្ពុជាក៏គ្រោងចុះហត្ថលេខាលើកិច្ចសហប្រតិបត្តិការយោធារវាងប្រទេសទាំងពីរផងដែរ។ នេះបើយោងតាមប្រភពពីក្រសួងការពារជាតិ។ យោងតាមសេចក្តីប្រកាសព័ត៌មានរបស់ក្រសួងការពារជាតិកម្ពុជា លោក លៀង គ័ងលី និងលោក ទៀ បាញ់ រដ្ឋមន្ត្រីការពារជាតិកម្ពុជា គ្រោងនឹងជួបពិភាក្សាគ្នា និងចុះហត្ថលេខាលើឯកសារកិច្ចសហប្រតិបត្តិការយោធាប្រទេសទាំងពីរ នៅព្រឹកថ្ងៃចន្ទស្អែកនេះ។
គួរកត់សម្គាល់ថា ដំណើរទស្សនកិច្ចរបស់រដ្ឋមន្ត្រីការពារជាតិចិន នៅកម្ពុជា នាពេលនេះបានធ្វើឡើងចំពេលដែលកិច្ចប្រជុំរដ្ឋមន្ត្រីការពារជាតិអាស៊ានដែលនឹងបើកធ្វើ នៅថ្ងៃទី២៩ឧសភានេះ។ គ្មានប្រភពណាបង្ហើបឲ្យដឹងថា តើវត្តមានរបស់ប្រមុខយោធាចិន នៅកម្ពុជានាពេលនេះមានជាប់ពាក់ពន្ធ័នឹងកិច្ចប្រជុំរដ្ឋមន្ត្រីការពារជាតិអាស៊ានដែរ ឬក៏យ៉ាងណានោះទេ។ មន្ត្រីក្រសួងការពារជាតិកម្ពុជាបានបដិសេធមិនធ្វើអត្ថាធិប្បាយអំពីបញ្ហានេះឡើយ។ យ៉ាងណាក៏ដោយ រដ្ឋមន្ត្រីការពារជាតិអាស៊ានត្រូវគេរំពឹងថា នឹងពិភាក្សាអំពីបញ្ហាសមុទ្រចិនខាងត្បូង។
កាលពីថ្ងៃទី២៤ ខែឧសភា ឧត្តមមន្ត្រីអាស៊ាន បានបញ្ចប់ការពិភាក្សាអំពីចំណុចសំខាន់ៗដែលត្រូវដាក់បញ្ចូលក្នុងក្រមប្រតិបត្តិស្តីពីសមុទ្រចិនខាងត្បូងរួចរាល់ហើយ នៅក្នុងកិច្ចប្រជុំនៅទីក្រុងភ្នំពេញ។ ក្រមប្រតិបត្តិនេះនឹងត្រូវគេដាក់ជូនរដ្ឋមន្ត្រីការបរទេសអាស៊ានពិនិត្យ និងអនុម័តក្នុងកិច្ចប្រជុំនៅទីក្រុងភ្នំពេញ នាខែកក្កដាខាងមុខ។ ក្រមប្រតិបត្តិនេះនឹងក្លាយជាមូលដ្ឋានរបស់អាស៊ានក្នុងការចរចាជាមួយចិន ដើម្បីរកដំណោះស្រាយស្តីពីជម្លោះក្នុងដែនសមុទ្រចិនខាងត្បូង។ ជម្លោះដណ្តើមកាន់កាប់ដែនកោះរវាងចិន និងសមាជិកអាស៊ានចំនួន ៤គឺវៀតណាម ហ្វីលីពីន ព្រុយណេ និងម៉ាឡេស៊ី នៅក្នុងដែនសមុទ្រចិនខាងត្បូងនេះកំពុងក្លាយជាក្តីបារម្ភយ៉ាងខ្លាំងអំពីបញ្ហាអសន្តិសុខនៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ