តុលាការចិនកាត់ទោសប្រហារជីវិតមនុស្ស១២នាក់ ក្នុងសំណុំរឿងវាយប្រហារដោយកាំបិត កាលពីខែកក្កដា
នៅថ្ងៃចន្ទទី១៣តុលានេះ តុលាការនៃតំបន់ស៊ីនជាំង ភាគខាងលិចប្រទេសចិន បានកាត់ទោសប្រហារជីវិតមនុស្សចំនួន១២នាក់ និងដាក់ទោសទណ្ឌកម្រិតធ្ងន់ទៅលើមនុស្សជាច្រើននាក់ផ្សេងទៀត ដែលជាប់ពាក់ព័ន្ធក្នុងសំណុំរឿងវាយប្រហារដោយកាំបិត កាលពីខែកក្កដាកន្លងទៅ។ អ្នកជាប់ពាក់ព័ន្ធក្នុងសំណុំរឿងនេះទាំងអស់ ត្រូវបានអង្គការឃ្លាំមើលអះអាងថា ជាជនជាតិភាគតិចអ៊ុយហ្គួរ កាន់សាសនាអ៊ីស្លាម។ ជនជាតិអ៊ុយហ្គួរ ដែលជាចលនាផ្ដាច់ទឹកដីនិយម និងដែលជាសត្រូវនឹងពួកជនជាតិហាន នៅតំបន់ស៊ីនជាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ពាក់ព័ន្ធនឹងសំណុំរឿងវាយប្រហារដោយកាំបិត នៅតំបន់ស៊ីនជាំង កាលពីខែកក្កដា តុលាការនៃតំបន់ស៊ីនជាំង បានកាត់ទោសមនុស្សចំនួន៥៦នាក់ ដោយក្នុងនោះ ១២នាក់ ត្រូវបានកាត់ទោសប្រហារជីវិត ១៥នាក់ត្រូវបានព្យួរទោសប្រហារជីវិត ៩នាក់ត្រូវជាប់គុកអស់មួយជីវិត និង២០នាក់ផ្សេងទៀត ត្រូវជាប់ទោសពី៤ទៅ២០ឆ្នាំ។ បើផ្អែកតាមឈ្មោះ ជនជាប់ចោទទាំងអស់នៅក្នុងសំណុំរឿងនេះ ត្រូវគេជឿថា ជាចលនាអ៊ុយហ្គួរផ្ដាច់ទឹកដីនិយម កាន់សាសនាអ៊ីស្លាម ដែលរស់នៅតំបន់ស៊ីនជាំង។
នៅក្នុងតំបន់ស៊ីនជាំង ភាគខាងលិចប្រទេសចិន មានប្រជាជនរស់នៅភាគច្រើនជាជនជាតិអ៊ុយហ្គួរ ដើមកំណើតតួកគី។ ពួកនេះច្រើនជាអ្នកជ្រុលនិយម ហើយត្រូវបានអាជ្ញាធរក្រុងប៉េកាំងចោទថា ជាអ្នកនៅពីក្រោយអំពើភេរវកម្មទាំងឡាយដែលកើតមាននៅក្នុងតំបន់ និងនៅក្នុងផ្ទៃប្រទេសដទៃទៀត។ ពីរឆ្នាំចុងក្រោយនេះ មានមនុស្សជាច្រើនរយនាក់បានស្លាប់នៅក្នុងតំបន់ស៊ីនជាំង ដែលភាគច្រើនគឺស្លាប់នៅក្នុងអំពើហិង្សា ដែលបង្កឡើងដោយជម្លោះរវាងចលនាអ៊ុយហ្គួរផ្ដាច់ទឹកដីនិយម និងពួកជនជាតិចិនហាន ដែលជានិមិត្តរូបនៃអំណាចផ្ដាច់ការទីក្រុងប៉េកាំង។
កាលពីចុងខែកក្កដាកន្លងទៅ មានការវាយប្រហារចូលទីស្នាក់ការប៉ូលីស និងអគាររដ្ឋ ពីសំណាក់ក្រុមមនុស្សកាន់កាំបិត សំដៅចាក់ជនស៊ីវិល និងបំផ្លាញយានយន្ត។ ព្រឹត្តិការណ៍អំពើហិង្សាពេលនោះ បានសម្លាប់មនុស្សអស់ជិត១០០នាក់ មានទាំងជនបង្កហេតុ និងជនស៊ីវិល។ គួរជម្រាបជូនថា អាជ្ញាធរក្រុងប៉េកាំង បានចាត់វិធានការតឹងរ៉ឹងខ្លាំងណាស់នៅតំបន់បះបោរស៊ីនជាំង ដោយមិនឲ្យអ្នកកាសែតបរទេសណាម្នាក់ ចូលទៅកាន់តំបន់នោះឡើយ។ ការរឹតត្បឹតលើអ្នកកាសែតដូច្នេះ បានធ្វើឲ្យការទទួលបានព័ត៌មានពីព្រឹត្តិការណ៍វាយប្រហារដោយកាំបិត កាលពីខែកក្កដានោះ មិនបានល្អិតល្អន់គ្រប់ជ្រុងជ្រោយនោះទេ។
ក្រោយពីបានរងភេរវកម្មធំៗជាបន្តបន្ទាប់ អាជ្ញាធរប៉េកាំងបានបើកយុទ្ធនាការទ្រង់ទ្រាយធំ ប្រយុទ្ធប្រឆាំងនឹងអំពើភេរវនិយម។ ជាយុទ្ធនាការដែលមានដូចជាការបង្ក្រាប ការចាប់ខ្លួន និងការកាត់ទោសជាដើម ដោយផ្ដោតសំខាន់ទៅលើសកម្មភាពទាំងឡាយណា ដែលនាំដល់ភាពជ្រុលនិយមផ្នែកសាសនា។ ប៉ុន្តែអ្នកការពារសិទ្ធិមនុស្សអ៊ុយហ្គួរបានព្រមានថា យុទ្ធនាការរបស់អាជ្ញារក្រុងប៉េកាំង អាចនឹងធ្វើឲ្យចលនាអ៊ុយហ្គួរកាន់តែចង់សងសឹកខ្លាំងឡើងថែមមួយកម្រិតទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ