Delicious
Digg
Facebook
Twitter
Yahoo!
Technorati
ចិន -
អត្ថបទចុះផ្សាយនៅថ្ងៃ ព្រហស្បតិ៍ 25 តុលា 2012 -
ព័ត៌មានទើបកែប្រើលើកចុងក្រោយ ថ្ងៃ ព្រហស្បតិ៍ 25 តុលា 2012
ចិនផ្តើមគិតគូរពីការសាងសង់មជ្ឈមណ្ឌលនុយក្លេអ៊ែរឡើងវិញ
លោក Wen Jiabao នាយករដ្ឋមន្រ្តីចិន
Reuters路透社
ជិត ២ឆ្នំា ក្រោយពីមានគ្រោះមហន្តរាយនុយក្លេអ៊ែរនៅ Fukushima ក្នុងប្រទេសជប៉ុនមក ប្រទេសចិនបានអនុញ្ញាតជាថ្មីឲ្យមានការសាងសង់មជ្ឈមណ្ឌលនុយក្លេអ៊ែរមួយភាគតូច។ ប៉ុន្តែការសាងសង់នេះនឹងធ្វើឡើងនៅតាមបណ្តោយឆ្នេរ គឺមិនមែននៅក្រោមដី ដូចដែលបានគ្រោងទុកនោះទេ។
គឺនៅថ្ងៃពុធ ទី២៤ តុលាម្សិលមិញ ដែលរដ្ឋាភិបាលទីក្រុងប៉េកំាងបានសម្រេចចិត្តឲ្យគិតគូរឡើងវិញពីការបន្តសាងសង់មជ្ឈមណ្ឌលនុយក្លេអ៊ែរថ្មីៗមួយចំនួនទៀត។ សេចក្តីជូនដំណឹងមួយបង្ហោះតាមគេហទំព័រឲ្យដឹងបន្ថែមថា ទីស្តីការគណៈរដ្ឋមន្ត្រីបានយល់ព្រមឲ្យមានការសាងសង់មជ្ឈមណ្ឌលនុយក្លេអ៊ែរថ្មីៗតែមួយចំនួនតូចប៉ុណ្ណោះនៅក្នុងរយៈពេល ៥ឆ្នំា គឺពីឆ្នំា ២០១១ ដល់ឆ្នំា ២០១៥។ ម្យ៉ាងទៀត គម្រោងអនុញ្ញាតឲ្យសាងសង់បន្ថែមនេះ គឺសាងសង់តែនៅតាមបណ្តោយឆ្នេរ ពោលមិនមែនសាងសង់នៅក្រោមដីដូចដែលបានព្រាងទុកពីពេលមុននោះទេ។
ដោយឡែក និងបើយោងតាមកាសែតចិន គម្រោងសាងសង់មជ្ឈមណ្ឌលនុយក្លេអ៊ែរចំនួន ៣ នៅក្នុងខេត្ត Hunan ខេត្ត Jiangxi និងខេត្ត Hubei ដែលរដ្ឋាភិបាលបានអនុញ្ញាតកាលពីឆ្នំា ២០០៨ និងដែលដំណើរការសាងសង់បានចាប់ផ្តើមមកហើយនោះ នឹងអាចព្យួរចោលក្នុងរយៈពេលយ៉ាងតិច ៣ឆ្នំា។
ម្យ៉ាងទៀត រដ្ឋាភិបាលចិនក៏បានបញ្ជាក់ផងដែរថា គ្រប់ម៉ាស៊ីនប្រតិកម្មថ្មីៗទំាងអស់នឹងត្រូវអនុលោមតាមបទដ្ឋានសន្តិសុខនៃជំនាន់ទី៣ ដូចយ៉ាងម៉ាស៊ីនប្រតិកម្ម EPR របស់បារំាង ឬមួយក៏ AP១០០០ របស់អាមេរិក។ កាលពីសប្តាហ៍មុន ក្រសួងបរិស្ថានចិនបានចេញផ្សាយរបាយការណ៍មួយដែលអះអាងថា ស្ថានការណ៍នៃសន្តិសុខនុយក្លេអ៊ែរនៅក្នុងប្រទេសចិនមិនអាចធានាឲ្យបាន ១០០% ទេ។ របាយការណ៍បានលើកឡើងពីការលំបាកក្នុងការប្រើប្រាស់ដោយសារតែភាពខុសគ្នារវាងម៉ាស៊ីនប្រតិកម្ម និងបច្ចេកវិទ្យា។
គួរជម្រាបជូនថា នៅមុនគ្រោះមហន្តរាយនុយក្លេអ៊ែរក្នុងប្រទេសជប៉ុនកាលពីខែមីនា ឆ្នំា ២០១១ រដ្ឋាភិបាលចិនមានគម្រោងផលិតអគ្គិសនីដើរដោយនុយក្លែអ៊ែរឲ្យបាន ៨៦ ០០០មេហ្កាវ៉ាត់ នៅឆ្នំា ២០២០ ទល់នឹង ១២ ០០០មេហ្កាវ៉ាត់ក្នុងឆ្នំា ២០១១កន្លងមក។ តែឥឡូវនេះ គម្រោងផលិតឲ្យបាន ៨៦ ០០០មេហ្កាវ៉ាត់ នៅឆ្នំា ២០២០ នឹងត្រូវកាត់បន្ថយមកនៅត្រឹមតែ ៤០ ០០០មេហ្កាវ៉ាត់វិញ។
យ៉ាងណាក៏ដោយ ទោះបីចិន ជាប្រទេសដែលបានសាងសង់មជ្ឈមណ្ឌលនុយក្លេអ៊ែរច្រើនជាងគេក៏ដោយ ក៏ថាមពលផ្តល់ដោយនុយក្លេអ៊ែរនៅតែមានបរិមាណតិចជាងថាមពលផ្តល់ដោយធ្យូងថ្មដែលមានរហូតដល់ទៅ ៧០% និងថាមពលផ្តល់ដោយវារីអគ្គិសនីមានចំនួន ១៥%។ បច្ចុប្បន្ននេះ ចិនមានម៉ាស៊ីនប្រតិកម្មចំនួន ១៥ កំពុងដំណើរការផលិតភ្លើងអគ្គិសនី និងមានម៉ាស៊ីនប្រតិកម្មចំនួន ២៧ ទៀតកំពុងដំណើរការសាងសង់៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ