អតីតមេដឹកនាំជាន់ខ្ពស់កាន់តែកំពូលៗឡើងជាប់ចោទក្នុងអំពើពុករលួយ
បន្ទាប់ពីប៉ូស៊ីឡៃ គូប្រជែងនយោបាយរបស់លោក ស៊ី ជីនពីង ម្នាក់ទៀត បានជាប់ជុច ធ្លាក់ក្នុងសំណាញ់ច្បាប់ ពីបទបានប្រព្រឹត្តបទល្មើសធ្ងន់ធ្ងរខុសវិន័យបក្ស។ គណបក្សកុម្មុយនិស្តចិន បានបើកអង្កេត ប្រឆាំងនឹងអតីតមេដឹកនាំភ្នាក់ងារសន្តិសុខផ្ទៃក្នុង លោក ស្ហ៊ូ យ៉ុងកង់ ( Zhou Yongkang) ពីបទប្រព្រឹត្តអំពើពុករលួយ។ មានអាយុ ៧១ ឆ្នាំ ជាមន្ត្រីចូលនិវត្តន៍មែន ប៉ុន្តែលោក Zhou គឺជាមនុស្សដ៏មានឥទ្ធិពលខ្លាំងម្នាក់ ក្នុងចំណោមថ្នាក់ដឹកនាំកំពូលចិនដ៏មានអំណាច នៅទសវត្សរ៍ឆ្នាំ ២០០០។នេះបើតាមសារព័ត៌មានផ្លូវការចិនថ្មី ចេញផ្សាយថ្ងៃទី ២៩ កក្កដា ២០១៤។
ចុះផ្សាយនៅថ្ងៃ៖
ស្តាប់ - ០១:៥៤
លោក Zhou គឺជាឥស្សរជននយោបាយ មានឋាន្តរសក្តិខ្ពស់បំផុត ដែលជាប់អង្កេតពុករលួយ គិតចាប់ពីរបបសាធារណរដ្ឋចិនប្រជាមានិតបង្កើតឡើងនៅឆ្នាំ១៩៤៩។ លោក Zhou ជាសមាជិកគណៈកម្មាធិការអចិន្ត្រៃយ៍នៃការិយាល័យនយោបាយបក្ស ដែលជាស្ថាប័នមានអំណាចកំពូលនៅ ចិន និងជាប្រមុខដឹកនាំសន្តិសុខជាតិ ដែលជាតួនាទីដ៏មានអំណាចបំផុត ក្នុងប្រទេស រហូតដល់ឆ្នាំ២០១២ ឆ្នាំចូលនិវត្តន៍។
ក្នុងរយៈពេលកាន់តួនាទីសន្តិសុខផ្ទៃក្នុង៥ឆ្នាំ លោក Zhou ដឹកនាំផ្នែកកម្លាំងប៉ូលិសផង ភ្នាក់ងារស៊ើបការណ៍សម្ងាត់ស៊ីវិលផង ប៉ូលិសប្រតិព័ទ្ធផង ព្រមទាំងចៅក្រមនិងរដ្ឋអាជ្ញា។ ចំណាយផ្នែកសន្តិសុខផ្ទៃក្នុងបានកើនលើសកញ្ចប់ថវិកាក្នុងវិស័យការពារជាតិទៀត។ លោក Zhou បានក្លាយជាមនុស្សដែលមានអំណាចជ្រុល ហើយតួនាទីដ៏សំខាន់មួយនេះ បានធ្លាក់ចុះខ្សោយនៅពេលមានការរុះរើក្បាលម៉ាស៊ីនដឹកនាំចិន នាឆ្នាំ២០១២។ លោកបានគាំទ្របេក្ខភាព លោក ប៉ូ ស៊ីឡៃ ដោយចង់ជួយជ្រោមឱ្យក្លាយជាសមាជិកអចិន្ត្រៃយ៍នៃការិយាល័យនយោបាយបក្ស។ ប៉ុន្តែលោក ប៉ូស៊ីឡៃ ជាគូប្រជែងរបស់លោកស៊ីជីនពីង និងត្រូវបានដកចេញពីតំណែង និងកាត់ទោសឱ្យជាប់ពន្ធនាគារអស់មួយជីវិត ពីបទប្រព្រឹត្តអំពើពុករលួយ។
ឥលូវបទចោទប្រកាន់នេះ បានធ្លាក់មកលើរូប លោក Zhou តែម្តង ! តាំងពីខែធ្នូ ឆ្នាំ២០១៣មក លោក Zhou ត្រូវជាប់ឃុំឃាំងក្នុងគេហដ្ឋាន។ គណៈកម្មការកណ្តាលផ្នែកត្រួតពិនិត្យវិន័យបក្សជាអ្នកទទួលបន្ទុកធ្វើអង្កេត ហើយបើតាមសារព័ត៌មានផ្លូវការចិន សេចក្តីសម្រេចចោទប្រកាន់លោក Zhou ឆ្លើយតបទាំងស្រុងទៅនឹងវិធានបក្ស និងបទដ្ឋានប្រយុទ្ធប្រឆាំងនឹងអំពើពុករលួយ។ ជាមួយនឹងការដាក់បញ្ជាឱ្យធ្វើអង្កេតប្រឆាំងនឹងលោក Zhou លោក ស៊ីជីនពីង ចង់បំបែកទម្លាប់និងព្រមានថា សមាជិកអចិន្ត្រៃយ៍នៃការិយាល័យនយោបាយបក្ស ក៏អាចជាប់អង្កេតពុករលួយដែរ សូម្បីដល់អាយុ និងកំពុងចូលនិវត្តន៍ក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ