ចិន -

អត្ថបទចុះផ្សាយនៅថ្ងៃ សៅរ៍ 08 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 08 កញ្ញា 2012

ប្រធានាធិបតីចិនអំពាវនាវឲ្យរក្សាសន្តិភាពនៅក្នុងតំបន់អាស៊ីប៉ាស៊ីហ្វិក

លោកប្រធានាធិបតីចិន ហ៊ូ ជិនតាវ

REUTERS/Sergei Karpukhin

ដោយ គួច គន្ធារ៉ា

នៅថ្ងៃសៅរ៍ ទី៨ កញ្ញានេះ ជំនួបកំពូលប្រចំាឆ្នំានៃអង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកហៅកាត់ថា Apec បានបើកធ្វើនៅក្នុងទីក្រុង Vladivostok ស្ថិតប៉ែកខាងកើតទីក្រុងម៉ូស្កូនៃប្រទេសរុស្ស៊ី។ ក្នុងឱកាសជំនួបកំពូលរបស់ Apec លោកប្រធានាធិបតីចិន ហ៊ូ ជិនតាវបានអំពាវនាវឲ្យគ្រប់ប្រទេសទំាងអស់នៅក្នុងតំបន់អាស៊ីប៉ាស៊ីហ្វិកចូលរួមរក្សាសន្តិភាពនៅក្នុងតំបន់។ សេចក្តីអំពាវនាវរបស់ប្រមុខរដ្ឋចិនពេលនេះបានធ្វើឡើង ចំពេលដែលជម្លោះនៅសមុទ្រចិនខាងត្បូងកំពុងឡើងតានតឹងដល់កំពូល។

សេចក្តីរាយការណ៍របស់ គួច គន្ធារ៉ា

ស្តាប់ (02:18)

08/09/2012 by គួច គន្ធារ៉ា

« គឺដើម្បីផលប្រយោជន៍គ្រប់ប្រទេសទំាងអស់នៅក្នុងតំបន់ គឺជាការទទួលខុសត្រូវរបស់ប្រទេសនីមួយៗដើម្បីរក្សាសន្តិភាព និងស្ថិរភាព ព្រមទំាងសក្តានុពលនៃកំណើនសេដ្ឋកិច្ចនៅអាស៊ីប៉ាស៊ីហ្វិក » នេះជាការថ្លែងរបស់លោកប្រធានាធិបតីចិន ហ៊ូ ជិនតាវនាឱកាសជំនួបកំពូលរបស់ Apec ក្នុងប្រទេសរុស្ស៊ី។ ជំនួបកំពូល Apec ដែលចូលរួមដោយ២១ប្រទេសជាសមាជិកឆ្នំានេះ ត្រូវបានគ្របដណ្តប់ដោយសំណុំរឿងជម្លោះដែនដីដ៏អូសបន្លាយនៅក្នុងតំបន់ ពិសេសជម្លោះនៅក្នុងសមុទ្រចិនខាងត្បូងរវាងចិន និងប្រទេសអាស៊ីមួយចំនួន។

នៅក្នុងជំនួបជាលក្ខណៈទ្វេភាគីជាមួយលោកប្រធានាធិបតីវៀតណាម និងមហាក្សត្រស៊ុលតង់នៃប្រទេសព្រុយណេកាលពីថ្ងៃព្រហស្បតិ៍កន្លងមក លោក ហ៊ូ ជិនតាវក៏បាននិយាយពីជម្លោះនៅសមុទ្រចិនខាងត្បូង។ ដែនដីនៅសមុទ្រចិនខាងត្បូងដែលចិនបានទាមទារជាអធិបតេយ្យផ្តាច់មុខរបស់ខ្លួន តែវៀតណាម និងហ្វីលីពីនមិនសុខចិត្ត ដោយបានចោទចិនថា ប៉ុនប៉ងសម្លុតគម្រាម។ យោងតាមកាសែតផ្លូវការចិនឈ្មោះ China Daily លោកប្រមុខរដ្ឋចិនបាននិយាយប្រាប់សមភាគីវៀតណាមថា ទីក្រុងប៉េកំាង និងហាណូយគួរតែកាត់បន្ថយភាពតានតឹង និងត្រូវព្យាយាមដោះស្រាយជម្លោះដោយសន្តិវិធី។

សម្រាប់លោក ហ៊ូ ជិនតាវ ពិតជាមានភាពតានតឹងខ្លះនៅក្នុងទំនាក់ទំនងរវាងវៀតណាម និងចិនពាក់ព័ន្ធនឹងជម្លោះនៅសមុទ្រចិនខាងកើត នេះជាអ្វីដែលយើងមិនចង់ឃើញទាល់តែសោះ។ លោក ហ៊ូបានបន្ថែមថា ទីក្រុងប៉េកំាង និងហាណូយត្រូវតែចេះអតធ្មត់ និងចៀសវាងការចាត់វិធានការដោយអត្តនោម័ត៌ដើម្បីចៀសវាងការប៉ះទង្គិចគ្នារហូតបង្កឲ្យមានផលវិបាក និងអស្ថិរភាពនៅក្នុងតំបន់អាស៊ីប៉ាស៊ីហ្វិកទំាងមូល។ ការយល់ឃើញរបៀបនេះ ក៏ត្រូវបានលោកប្រមុខរដ្ឋចិននិយាយប្រាប់មហាក្សត្រស៊ុលតង់នៃប្រទេសព្រុយណេដែរ។

ទាក់ទងនឹងជម្លោះនៅសមុទ្រចិននេះដដែល លោកស្រីប្រមុខការទូតអាមេរិក Hillary Clinton ដែលបានបំពេញបេសកកម្មក្នុងតំបន់កាលពីថ្ងៃពុធ ទី៥ កញ្ញា បានហៅភាគីចិនឲ្យបើកកិច្ចចរចាជាមួយប្រទេសពាក់ព័ន្ធក្នុងបំណងចៀសវាងការផ្ទុះសង្រ្គាមជាយថាហេតុប្រកបដោយគ្រោះថ្នាក់។

គួរជម្រាបជូនថា ក្រៅពីមានជម្លោះជាមួយប្រទេសអាស៊ានមួយចំនួននៅសមុទ្រចិនខាងត្បូង ចិនក៏មានជម្លោះជាមួយប្រទេសជប៉ុនដែរ ពាក់ព័ន្ធនឹងទីប្រជុំកោះនៅសមុទ្រចិនខាងកើត ដែលចិនឲ្យឈ្មោះថា Diaoyu និងជប៉ុនហៅថា Senkaku៕