ចិន -

អត្ថបទចុះផ្សាយនៅថ្ងៃ សៅរ៍ 30 មិថុនា 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 30 មិថុនា 2012

រឿងអាស្រូវថ្មីមួយទៀតដែលគំរាមកំហែងមុខមាត់បក្សកុម្មុយនិស្តចិន

លោកXi Jinping (កណ្តាល) ច្រៀងភ្លេងជាតិនៅក្នុងសម័យប្រជុំបក្សកុម្មុយនិស្ត (បណ្តាសារ)

ដោយ ឈាង បុប្ផា

រដ្ឋអំណាចចិននៅថ្ងៃសៅរ៍ ទី ៣០មិថុនាបានបិទ រាំងខ្ទប់មិនឲ្យគេរកឃើញព័ត៌មានទាក់ទងនឹងលោកអនុប្រធានាធិបតីចិន Xi Jinping នៅក្នុងអ៊ិនធ័រណេត។ វិធានការថ្មីរបស់ចិន ធ្វើឡើង នៅមួយថ្ងៃបន្ទាប់ពីវិបសៃត៍ព័ត៌មានសេដ្ឋកិច្ច អាមេរិក Bloomberg ចុះផ្សាយពីទ្រព្យសម្បតិ និងភាពមានបានរបស់ក្រុមគ្រួសាររបស់លោកXi Jinping។ លោកXi Jinpingដែលនឹងឡើងធ្វើជាប្រធានាធិបតីចិន នៅឆ្នាំក្រោយនេះ។

សេចក្តីរាយការណ៍របស់ឈាង បុប្ផា

ស្តាប់ (02:46)

30/06/2012 by ឈាង បុប្ផា

ចាប់តាំងពីថ្ងៃម្សិលមិញ អាជ្ញាធរចិនបានបិទខ្ទប់មិនឲ្យអ្នកប្រើប្រាស់អ៊ិនធ័រណេតអាចចូលអានអត្ថបទ នៅក្នុងវិបសៃត៍ Bloomberg។ នៅថ្ងៃនេះ កុំថា ឈ្មោះលោកអនុប្រធានាធិបតី Xi Jinping សូម្បីពាក្យថា Xi ក៏គេមិនអាចរកឃើញនៅក្នុងអ៊ិនធ័រណេត ក្នុងប្រទេសចិនដែរ។

នៅក្នុងប្រទេសចិន រដ្ឋអំណាចបិទខ្ទប់រាល់ព័ត៌មានទាក់ទងនឹងលោកXi Jinping គឺបន្ទាប់ វិបសៃត៍អាមេរិក Bloomberg បានចុះផ្សាយ កាលពីថ្ងៃម្សិលមិញ ពីទ្រព្យសម្បត្តិរបស់ក្រុមគ្រួសារលោកXi Jinping ដែលមានជាសរុប ៣៧៦លានដុល្លារអាមេរិក។ វិបសៃត៍ Bloomberg ដែលប្រើឯកសាររដ្ឋចិន ជាប្រភព បានបង្ហាញថា ក្រុមគ្រួសាររបស់លោក Xi Jinpingមានកាន់កាប់ក្រុមហ៊ុនអចលនទ្រព្យ និងមានភាគហ៊ុន នៅក្នុងក្រុមហ៊ុនអាជីវកម្មរ៉ែកម្រ និងក្រុមហ៊ុនផលិតទូរស័ព្ទដៃ។ បើតាមកាសែត ក្រុមគ្រួសាររបស់ កំពុងកេងយកប្រយោជន៍ពីឥទ្ធិពលអំណាច និងការឡើងកូដខ្លាំងរបស់ លោក Xi Jinping ដើម្បីពង្រីកមុខជំនួញរបស់ពួកគេ។

ទោះជា ឯកសារដែលBloomberg បានដកស្រង់ នោះមិនបានបង្ហាញពីការជាប់ពាក់ព័ន្ធរបស់ លោក Xi Jinping ប្រពន្ធ និងកូនស្រីរបស់លោកទៅនឹងជំនួញមហាសាលខាងលើក្តី ប៉ុន្តែ រាល់ព័ត៌មានទាក់ទងនឹងលោក Xi Jinping និងវិបសៃត៍របស់Bloomberg ត្រូវអាជ្ញាធរបិទទាំងស្រុងមិនឲ្យគេចូលមើលបាន។ បើតាមអ្នកវិភាគនយោបាយចិន ទីក្រុងប៉េកាំងបិទព័ត៌មាននេះ ដើម្បីទប់ស្កាត់កុំឲ្យមានមតិរិះគន់ ដែលអាចក្លាយទៅជាចលនាប្រឆាំងនឹងថ្នាក់ដឹកនាំចិន។ នៅក្នុងប្រទេសចិន ជាទីដែលមានគម្លាត រវាងអ្នកមាន និងអ្នកក្រ និងរឿងពុករលួយ ភាពមានបានកាន់តែខ្លាំងរបស់មន្រ្តី និងក្រុមគ្រួសារ គឺជារឿងមួយដែលគេព្យាយាមលាក់បាំង មិនលើកយកមកនិយាយ ជាចំហរ។

ម្យ៉ាងទៀត អាជ្ញាធរបារម្ភថា ព័ត៌មានទាក់ទងនឹងទ្រព្យសម្បត្តិរបស់ក្រុមគ្រួសារលោកXi Jinping អាចនឹងបង្កឲ្យមានរឿងអាស្រូវថ្មីមួយទៀត ដែលអាចបំផ្លាញមុខមាត់របស់បក្សកុម្មុយនិស្តចិន។ បក្សកម្មុយនិស្តចិនដែលទើបរងគ្រោះដោយរឿងអាស្រូវ របស់ចៅហ្វាយក្រុងចុងឈីង គឺលោកBo Xilai។ លោកBo Xilai ដែលត្រូវគេវាយតម្លៃថា ជាគូប្រជែងតំណែងប្រធានាធិបតីជាមួយលោក Xi Jinping ត្រូវបក្សដកចេញពីមុខតំណែង ដោយសារតែមិនគោរពវិន័យបក្ស ចំណែកភរិយារបស់គាត់ត្រូវតុលាការបញ្ជាឲ្យគេចាប់ដាក់ឃុំពីបទប្រព្រឹត្តអំពើពុករលួយ និងសម្លាប់ជនជាតិអង់គ្លេសម្នាក់។ លើកនេះ បក្សកុម្មុយនិស្តចិនប្រញាប់ចាត់វិធានការបន្ទាន់ ដើម្បីកុំឲ្យឈ្មោះរបស់លោក Xi Jinping ដែលជាអនាគតរបស់ប្រធានាធិបតីចិន ត្រូវប្រលាក់ប្រឡូសនឹងរឿងអាស្រូវ។ គោលដៅតែមួយ គឺរបបកុម្មុយនិស្តចិន ចង់បង្ហាញ ទៅប្រជាជន និងអន្តរជាតិថា អនាគតមេដឹកនាំរបស់ចិន គឺជាមនុស្សស្អាតស្អំ៕