ចិន-ទីបេ -

អត្ថបទចុះផ្សាយនៅថ្ងៃ ចន្ទ 30 មករា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 30 មករា 2012

កាសែតចិនចោទថា”លោកខាងលិចនិយាយបំផ្លើសការពិតស្តីពីបញ្ហាទីបេ

ពួកជនជាតិទីបេនិរទេសនៅឥណ្ឌាឈរពីក្រោយក្តារមឈូសលើកបង្ហាញផ្ទាំងរូបថតរបស់បាតុករទីបេដែលស្លាប់នៅឱកាសបាតុកម្មនៅSichuan

Parivartan Sharma

ដោយ នុយ ប៊ែរណាដែត

បន្ទាប់ពីរដ្ឋាភិបាលចិនកាលពីសប្តាហ៍មុន ឥឡូវនេះគឺកាសែតផ្លូវការចិនវិញម្តង បានចោទប្រកាន់ទៅលើ រដ្ឋាភិបាលនិរទេសទីបេនិងលោកខាងលិចថា បានពួតដៃគ្នាដើម្បីនិយាយបង្ខូចឈ្មោះរដា្ឋភិបាលចិនដោយបានបំផ្លើសការពិតថា ប៉ូលិសចិនបានបាញ់សម្លាប់ពួកបាតុករទីបេនៅឱកាសបង្ក្រាបបាតុកម្ម។

សេចក្តីរាយការណ៍របស់ នុយ ប៊ែរណាដែត

ស្តាប់ (02:11)

30/01/2012 by នុយ ប៊ែរណាដែត

បាតុកម្មរបស់ជនជាតិទីបេ ដែលចោទ ”ទីក្រុងប៉េកាំង ថាបានបិទខ្ទប់ដង្ហើមវប្បធម៌ និងសិទ្ធិសេរីភាពសាសនា របស់ទីបេ” បានប្រព្រឹត្តទៅកាន់តែខ្លាំងឡើងចាប់តាំងពីថ្ងៃចន្ទសប្តាហ៍មុនមកនៅក្នុងតំបន់ជើងភ្នំ នៅខេត្តស៊ីឈ័ន(Sichuan)ដែលជាប់ព្រំដែនទីបេ។

ក្រុមអង្គការការពារសិទ្ធិមនុស្សនៅទីបេ បានអះអាងថា” បាតុករទីបេ៧នាក់ បានបាត់បង់ជីវិត និង៦០នាក់ទៀត បានត្រូវរបួសនៅឱកាសប៉ូលិសចិនបង្ក្រាបបាតុកម្មកាលពីថ្ងៃចន្ទសប្តាហ៍មុន។

ឆ្លើយតបនឹងការចោទប្រកាន់ខាងលើនេះ ទីភ្នាក់ងារព័ត៌មានផ្លូវការ”ចិនថ្មី” វិញ បាននិយាយរៀបរាប់ថា”ប៉ូលិសចិន បានធ្វើអន្តរាគមស្របច្បាប់ដើម្បីការពារខ្លួននៅក្នុងការប្រឈមមុខទល់នឹងពួកបះបោរដែលបាននាំគ្នា វាយសម្រុកចូលទៅក្នុងស្នងការដ្ឋានប៉ូលិស។

រីឯទិនានុប្បវត្តិជាភាសាអង់គ្លេស China Daily វិញ បានសរសេរថា “សម្តេចសង្ឃដាឡៃឡាម៉ា ដែលទីក្រុងប៉េកាំងចាត់ទុកជាអ្នកទាមទារបំបែកទឹកដីទីបេម្នាក់ដែរនោះ បានខិតខំរិះរកមធ្យោបាយ ញុះញង់បង្ក ឲ្យមានភាពវឹកវរនៅក្នុងតំបន់ដើម្បី ឲ្យពួកលោកខាងលិចជួយគាំទ្រខ្លួន។ China Daily បានបន្តទៀតថា “ ក្នុងបច្ចុប្បន្ននេះ ពួកជនជ្រុលនិយមមួយក្តាប់តូច មានសមត្ថភាពបង្កការច្របូកច្របល់នៅក្នុងតំបន់ រហូតដល់នៅក្នុងប្រទេសទៀតផង”ដោយកាសែតនេះ បានចោទថា” សម្តេចសង្ឃដាឡៃឡាម៉ា បានទទួលហិរញ្ញប្បទាននិងការគាំទ្រពីលោកខាងលិច ក៏ព្រមទាំងមធ្យោបាយឃោសនាមហាជន ដើម្បីរៀបចំផែនការប្រឆាំងប្រទេសចិន"។

នៅឆ្នាំទៅនេះ ជនជាតិទីបេយ៉ាងតិចចំនួន ១៦នាក់ បានដុតសម្លាប់ខ្លួនឯងដើម្បីប្រឆាំងនឹងការជិះជាន់សង្កត់សង្កិនរបស់អាជ្ញាធរចិននៅក្នុងតំបន់ទីបេដែលកាន់កាប់ដោយទីក្រុងប៉េកាំងចាប់តាំងពីឆ្នាំ១៩៥០មកម៉្លេះ។

ដោយឡែក រដ្ឋាភិបាលនិរទេសទីបេ ដែលមានទីតាំងនៅ Dharamsala ក្នុងប្រទេសឥណ្ឌា បានបដិសេធថា ខ្លួនគ្មានបំណងទាមទារចង់បំបែកទឹកដីទីបេទេ ក៏ប៉ុន្តែគ្រាន់តែចង់បានស្វ័យភាពឲ្យបានច្រើនជាងសព្វថ្ងៃនៅក្នុងព្រំដែនចិនប៉ុណ្ណោះ”៕