ចិន -

អត្ថបទចុះផ្សាយនៅថ្ងៃ ចន្ទ 22 តុលា 2012 - ព័ត៌មានទើបកែប្រើលើកចុងក្រោយ ថ្ងៃ ចន្ទ 22 តុលា 2012

ក្រុមអ្នកគាំទ្រសរសេរលិខិតចំហប្រឆាំងនឹងការបណ្តេញលោក Bo Xilai ពីសមាជិកសភា

លោក Bo Xilai អតីតលេខាបក្សកុម្មុយនិស្តប្រចាំក្រុង Chongqing ដែលត្រូវបក្សកុម្មុយនិស្តចិនដកតំណែង

Reuters

ដោយ សេង ឌីណា

ក្រុមអ្នកឆ្វេងនិយមចិន ដែលគាំទ្រលោក Bo Xilai បានចេញផ្សាយលិខិតចំហមួយទាមទារកុំឲ្យគណៈកម្មាធិការអចិន្រ្តៃយ៍សភាបណ្តេញលោក Bo Xilai ពីសមាជិកសភា ដោយអះអាងថា ការបណ្តេញលោក Bo Xilai នេះ គឺជារឿងមិនស្របច្បាប់ ហើយធ្វើឡើង ក្នុងហេតុផលនយោបាយ។ លិខិតចំហនេះ គឺជាសញ្ញាបង្ហាញកាន់តែច្បាស់ អំពីភាពប្រេះឆា ក្នុងរង្វង់បក្សកុម្មុយនិស្តចិន ដោយសារតែរឿងលោក Bo Xilai ។

សេចក្តីរាយការណ៍របស់ សេង ឌីណា

ស្តាប់ (02:11)

22/10/2012

លិខិតចំហ ដែលប្រឆាំងនឹងការបណ្តេញលោក Bo Xilai ពីសមាជិកសភាចិន ត្រូវបានចុះហត្ថលេខាដោយសាស្រ្តាចារ្យ អ្នកសិក្សាស្រាវជ្រាវ និងអតីតមន្រ្តីបក្សកុម្មុយនិស្តចិន ជាង ៣០០នាក់ ដែលគេស្គាល់ថាជាក្រុមអ្នកមាននិន្នាការឆ្វេងនិយម។ ក្រុមអ្នកឆ្វេងនិយមចិន ដែលគាំទ្រលោក Bo Xilai នេះ ប្រកាន់យកនូវគំនិតមួយថា ចិនត្រូវតែបន្តដើរតាមគន្លងបដិវត្តន៍របស់ម៉ៅ សេទុង ផ្ទុយពីក្រុមអ្នកកំណែទម្រង់និយម ដែលយល់ថា ចិនត្រូវតែពន្លឿនការធ្វើកំណែទម្រង់ ទាំងខាងផ្នែកនយោបាយ និងសេដ្ឋកិច្ច។

នៅក្នុងលិខិតចំហ ដែលចុះផ្សាយលើវិបសៃត៍កាសែតឆ្វេងនិយមឈ្មោះ « Red China » ក្រុមអ្នកគាំទ្រលោក Bo Xilai បានចោទជាសំណួរចំពោះគណៈកម្មាធិការអចិន្រ្តៃយ៍នៃសភាប្រជាជនចិនថា តើពួកគេសំអាងលើហេតុផលអ្វី ទើបហ៊ានបណ្តេញលោក Bo Xilai ពីសមាជិកសភា? ហើយបើសិនជាថា លោក Bo Xilai ប្រព្រឹត្តខុសគួរស័ក្តិសមនឹងបណ្តេញចេញពីសភាមែន សភាគួរតែបង្ហាញភស្តុតាងទាំងអស់នេះឲ្យប្រជាជនទូទៅបានដឹង ហើយអនុញ្ញាតឲ្យលោក Bo Xilai អាចឆ្លើយដោះសារការពារខ្លួន ទៅតាមវិធានច្បាប់។

គួរបញ្ជាក់ថា លោក Bo Xilai កំពុងប្រឈមមុខនឹងរឿងក្តីព្រហ្មទណ្ឌ ជុំវិញការធ្វើឃាតអ្នកជំនួញអង់គ្លេស ឈ្មោះ Neil Heywood កាលពីឆ្នាំទៅមិញ។ សំណុំរឿងឃាតកម្ម ដែលអតីតមេប៉ូលិសក្រុងម្នាក់ រួមជាមួយនឹងភរិយារបស់លោក Bo Xilai ទើបនឹងត្រូវបានតុលាការចិនកាត់ទោសឲ្យជាប់ពន្ធនាគារ នាពេលថ្មីៗនេះ។

នៅក្នុងកិច្ចប្រជុំរយៈពេល ៤ថ្ងៃ ដែលនឹងចាប់ផ្តើមបើកធ្វើ នៅថ្ងៃអង្គារស្អែកនេះ គណៈកម្មាធិការអចិន្រ្តៃយ៍នៃសភាប្រជាជនចិនគ្រោងនឹងសម្រេចបណ្តេញលោក Bo Xilai ពីសមាជិកសភា។ ប្រសិនបើលោក Bo Xilai ពិតជាត្រូវបាត់បង់សមាជិកភាពក្នុងសភាមែន អភ័យឯកសិទ្ធិសភារបស់លោកក៏ត្រូវបញ្ចប់ដែរ ដែលអាចជាការបើកផ្លូវឲ្យតុលាការនាំរូបលោកយកទៅកាត់ទោស ជុំវិញសំណុំរឿងឃាតកម្មលោក Neil Heywood បាន។

វិបសៃត៍របស់កាសែត « Red China » ដែលចុះផ្សាយលិខិតចំហគាំទ្រលោក Bo Xilai នេះ ត្រូវបានអាជ្ញាធរចិនបិទមិនឲ្យប្រជាជនទូទៅចូលមើលបានទេ ហើយលិខិតនេះក៏មិនត្រូវបានកាសែតផ្លូវការរបស់រដ្ឋយកទៅចុះផ្សាយបន្តដែរ។ ក៏ប៉ុន្តែ ទោះជាយ៉ាងណា ការសរសេរលិខិតគាំទ្រលោក Bo Xilai ជាសាធារណៈបែបនេះ គឺជាសញ្ញាបង្ហាញឲ្យឃើញកាន់តែច្បាស់ថា រឿងអាស្រូវរបស់លោក Bo Xilai កំពុងតែបង្កឲ្យមានភាពប្រេះឆា ក្នុងជួរបក្សកុម្មុយនិស្តចិន ជាពិសេស គឺការប្រឈមមុខដាក់គ្នារវាងក្រុមអ្នកឆ្វេងនិយម និងក្រុមអ្នកកំណែទម្រង់និយម។ ហើយភាពប្រេះឆានេះកើតមានឡើង នៅក្នុងពេលដែលបក្សកុម្មុយនិស្តចិនកំពុងតែរៀបចំផ្លាស់ប្តូរមេដឹកនាំថ្មី៕

tags: ចិន