ទស្សនកិច្ចរបស់លោកស៊ីជីនពីងនៅបារាំង៖ចិនចុះកិច្ចព្រមព្រៀង ចំនួន៥០ ជាមួយបារាំង
នៅក្នុងប្រទេសបារាំង លោកប្រធានាធិបតីចិន ស៊ី ជីនពីងបានបញ្ចប់ទស្សនកិច្ច របស់ខ្លួន កាលពីយប់ថ្ងៃព្រហស្បតិ៍ទី ២៧ មីនា។ ក្នុងអំឡុងទស្សនកិច្ច ផ្លូវរដ្ឋរយៈពេល បីថ្ងៃ របស់លោកប្រធានាធិបតីស៊ី ជីនពីង ប្រទេសចិន និងបារាំងបានចុះហត្ថលេខាលើកិច្ចព្រមព្រៀង ចំនួន ៥០ ដែលមានតម្លៃ ១៨ពាន់លានអឺរ៉ូ។
ចុះផ្សាយនៅថ្ងៃ៖
ស្តាប់ - ០២:២២
នៅក្នុងទឹកដីបារាំង លោកប្រធានាធិបតីចិនស៊ី ជីនពីងត្រូវបានលោកប្រធានាធិបតីបារាំង ហ្រ្វង់ស័រ ហូឡង់ ទទួលស្វាគម យ៉ាងខ្ពស់មុខ ខ្ពស់មាត់។ ជាមួយនឹងមោទនភាព លោកប្រធានាធិបតីបារាំងបានថ្លែងថា បារាំងជាប្រទេសទីមួយ នៅអឺរ៉ុបដែលលោកប្រធានាធិបតីចិនបានជ្រើសរើស ដើម្បីធ្វើទស្សនកិច្ចផ្លូវរដ្ឋ ចាប់តាំងពីលោកស៊ី ជីនពីងបានចូលកាន់តំណែងជាប្រធានាធិបតីចិន កាលពីមួយឆ្នាំមុន។ ទស្សនកិច្ចលើកនេះ ធ្វើចំពេលខួប៥០ឆ្នាំ នៃការទទួលស្គាល់ចិនរបស់ម៉ៅ សេទុង ពីសំណាក់លោកឧត្តមសេនីយ៍ Charles De Gaull។
ការធ្វើឲ្យប្រសើរឡើង ទំនាក់ទំនង ចិន បារាំង គឺជានយោបាយការបរទេសអាទិភាពរបស់ ប្រទេសបារាំង។ បារាំង ដែលកំពុងមានសេដ្ឋកិច្ចមិនសូវល្អ បានព្យាយាមចែចង់ចិន ជាយូរណាស់មកហើយ។ នៅក្នុងជំនួបជាមួយប្រមុខដឹកនាំរបស់ចិន លោកប្រធានាធិបតីបារាំង បានចាត់ទុកចិន ជាមិត្ត និងលើកសរសើរប្រទេសចិន ថា ជាប្រទេសមហាអំណាចសេដ្ឋកិច្ចទីពីរ នៅក្នុងពិភពលោក។ លោកប្រធានាធិបតីចិនវិញ បានបញ្ជាក់បន្ថែមថា គឺភាពជាដៃគូ ឈ្នះ ឈ្នះ ដែលធ្វើឲ្យបារាំង និងចិនរួមគ្នា។
ភាពជាដៃគូបានធ្វើឲ្យបារាំង និងចិនចុះហត្ថលេខារួមគ្នា លើកិច្ចព្រមព្រៀងចំនួន ៥០ ដែលមានតាំងពីវិស័យថាមពល ឧស្សាហកម្ម រហូតដល់កសិកម្ម។ នៅក្នុងកាលៈទេសៈដែលឧស្សាហកម្មបារាំងកំពុងថប់ដង្ហើម កិច្ចព្រមព្រៀងមួយចំនួន ជាមួយចិន បានធ្វើឲ្យបារាំងហាក់ទទួលបានប្រយោជន៍ច្រើន។ ចិនបន្តកិច្ចសន្យាសហប្រតិបត្តិការជាមួយបារាំង ក្នុងការផលិតយន្តហោះAirbus របស់បារាំង រហូតដល់ឆ្នាំ ២០២៦។ ចិនបញ្ជាទិញ ឧទ្ធម្ភាគចក្ររបស់បារាំង និងបានសម្រេចដាក់ទុនវិនិយោគ ធ្វើជាម្ចាស់ភាគហ៊ុន១៤ភាគរយ នៅក្នុងក្រុមហ៊ុនផលិតរថយន្តបារាំង PSA Peugot Citroen។ នៅរាល់កិច្ចព្រមព្រៀង ចិនបានផ្តល់ទុនវិនិយោគ ប៉ុន្តែ ចិនក៏បានទាមទារឲ្យផលិតកម្មរបស់ក្រុមហ៊ុនបារាំង ធ្វើឡើង ដោយមួយផ្នែក នៅក្នុងទឹកដី ចិន។ ក្នុងឧទាហរណ៍ កន្លងមក យន្តហោះAirbus មួយផ្នែកត្រូវបានដំឡើង ដោយក្រុមហ៊ុនចិន នៅរោងចក្រចានជីន ក្នុងទឹកដីចិន។
►សូមអាន៖ ចិន អាចធ្វើព្យុះធ្វើភ្លៀងពាណិជ្ជកម្ម នៅអឺរ៉ុប ឬ ?
តាមអ្នកវិភាគខ្លះ នៅក្នុងបរិបទដែលសេដ្ឋកិច្ចរបស់បារាំងកំពុងដើរអូសជើង កិច្ចព្រមព្រៀងជាមួយមហាអំណាចចិនមានសារៈសំខាន់សម្រាប់បារាំង រហូតធ្វើឲ្យលោកប្រធានាធិបតីបារាំងមិនសូវលើកនិយាយពីបញ្ហាសិទ្ធិមនុស្សនៅប្រទេសចិន។ នៅក្នុងសន្និសីទរួមជាមួយលោកប្រធានាធិបតីចិន លោកហ្វ្រង់ស័រ ហូឡង់បានត្រឹមនិយាយដោយបង្ហើរ ថា បារាំងនៅតែផ្តល់តម្លៃទៅលើសេរីភាពបញ្ចេញមតិ ប៉ុន្តែ លោកប្រធានាធិបតីបារាំងមិនបានលើកឡើងពីការរំលោភសិទ្ធិមនុស្សពីសំណាក់អាជ្ញាធរទៅលើសកម្មជនសិទ្ធិមនុស្សនៅចិនទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ