Delicious
Digg
Facebook
Twitter
Yahoo!
Technorati
សុក្រ 24 កុម្ភៈ 2012
មានមែនឬ ការដណ្តើមអំណាចគ្នាខ្លាំង នៅក្នុងជួរបក្សកុម្មុយនិស្តចិនសព្វថ្ងៃ ?
លោក Xi Jinping និងលោក Bo Xilai
គណបក្សកុម្មុយនិស្តចិនរៀបចំអន្តរកាលនយោបាយ ដប់ឆ្នាំម្តង។ នៅក្នុងអំឡុងសម័យអន្តរកាលនេះម្តងៗ គណបក្សផ្លាស់ប្តូរអ្នកដឹកនាំកំពូលៗនៃប្រទេស ផ្លាស់ប្តូរសមាជិកអចិន្ត្រៃយ៍នៃគណៈមជ្ឈិមរបស់ការិយាល័យនយោបាយ និងផ្លាស់ប្តូរសមាជិកនៃគណកម្មាធិការមជ្ឈិម។ សម្រាប់ក្រុមអ្នកសង្កេតការណ៍ នៅក្នុងសម័យអន្តរកាលនយោបាយនេះ តែងតែមានការប្រទាញប្រទង់គ្នា និងការដណ្តើមអំណាចគ្នា។
ជាផ្លូវការ ការផ្លាស់ប្តូរថ្នាក់ដឹកនាំកំពូលនៃប្រទេសចិននឹងផ្តើមប្រព្រឹត្តទៅ នៅខែតុលាខាងមុខនេះ។ ជាផ្លូវការ លោកXi Jinping គឺជាអនាគតបុរសខ្លាំងនៃមហាយក្សចិន។ ជាផ្លូវការ គ្មានឡើយការប្រទាញប្រទង់គ្នានៅក្នុងជួរគណបក្សកុម្មុយនិស្ត។ ក៏ប៉ុន្តែនៅពីក្រោយវាំងនននៃឆាកនយោបាយចិន ការដណ្តើមអំណាចគ្នាយ៉ាងកាចសាហាវ បាននិងកំពុងបន្តប្រព្រឹត្តទៅ។ ការដណ្តើមអំណាចគ្នានេះ មិនមែនជារឿងមួយចៃដន្យទេ ពីព្រោះដប់ឆ្នាំម្តង គណបក្សកុម្មុយនិស្តចិនមិនត្រឹមតែប្តូរប្រធានាធិបតីនិងនាយករដ្ឋមន្ត្រីប៉ុណ្ណោះទេ តែក៏ត្រូវផ្លាស់ប្តូរថ្មីដែរសមាជិក៧នាក់ក្នុងចំណោមសមាជិកទាំងអស់៩នាក់នៃគណៈអចិន្ត្រៃយ៍របស់ការិយាល័យនយោបាយ និង៦០%នៃសមាជិកទាំង៣៧០នាក់របស់គណកម្មាធិការមជ្ឈិមបក្ស។
តាំងពីឆ្នាំ២០០៧ម្ល៉េះ គេបានស្គាល់រួចជាស្រេចឈ្មោះរបស់អនាគតប្រធានាធិបតីនិងអនាគតនាយករដ្ឋមន្ត្រីដែលនឹងត្រូវឡើងមកដឹកនាំប្រទេសចិនពីឆ្នាំ២០១៣ដល់ឆ្នាំ២០២១ នោះគឺលោកXi Jinping និងលោក Li Keqiang។ ក៏ប៉ុន្តែ ដរាបណាអន្តរកាលនយោបាយមិនទាន់ចប់ជាស្ថាពរទេ ដរាបនោះការផ្លាស់ប្តូរមុខតំណែងកំពូលៗក៏មិនទាន់ក្លាយទៅជាផ្លូវការដែរ។ អ៊ីចឹងហើយបានជាមានការប្រទាញប្រទង់គ្នាខ្លាំង រវាងចរន្តធំៗនៅក្នុងជួរបក្សកុម្មុយនិស្តចិន។ សម្រាប់ពួកអ្នកឯកទេសលោកខាងលិច មានចរន្តបីធំៗនៅក្នុងជួរបក្សកុម្មុយនិស្តចិនសព្វថ្ងៃ។ ចរន្តទីមួយ គឺពួកដែលគេហៅថា «ក្រុមសៀងហៃ» មានន័យថាជាបក្សពួករបស់លោកJiang Zemin អតីតអភិបាលក្រុងសៀងហៃនិងជាអតីតប្រធានាធិបតី។ ចរន្តទីពីរគឺជាបក្សពួករបស់បច្ចុប្បន្នប្រធានាធិបតីHu Jintao គឺជាពួក«ក្រុមសម្ព័ន្ធ» គេហៅថា ពួកក្រុមសម្ព័ន្ធ ពីព្រោះលោកHu Jintao គឺជាអតីតមេដឹកនាំសម្ព័ន្ធនៃយុវវ័យកុម្មុយនិស្តចិន។ រីឯចរន្តទីបីវិញ ដែលកំពុងមានឥទ្ធិពលខ្លាំងនៅក្នុងជួរបក្សសព្វថ្ងៃ គឺកូនចៅរបស់ពួកមេបដិវត្តន៍ធំៗ ពួកមេបដិវត្តន៍ជាប្រវត្តិសាស្រ្ត។ អ៊ីចឹងហើយបានជាគេហៅចរន្តទីបីនេះថាជា«ក្រុមពួកកូនស្តេច»។ លោកXi Xinping ដែលនឹងក្លាយជាមនុស្សខ្លាំងនៃប្រទេសនៅឆ្នាំ២០១៣ ចេញមកពីជួរក្រុម ពួក កូន ស្តេច ដ្បិតលោកឱពុករបស់គាត់ Xi Zhongxun គឺជាអតីតឧបនាយករដ្ឋមន្ត្រីសម័យMao Tsé-Tung និង Zhou Enlai។
ក៏ប៉ុន្តែ បើយោងទៅតាមមតិរបស់ក្រុមអ្នកសង្កេតការណ៍ ការដណ្តើមអំណាចគ្នាបានកើតឡើងខ្លាំង កាលពីដើមខែកុម្ភៈកន្លងទៅនេះ នៅក្នុងជួរក្រុមពួកកូនស្តេច។ ពីព្រោះ គូប្រជែងរបស់លោកXi Xinping គឺលោកBo Xilai ដែលជារដ្ឋមន្ត្រីក្រសួងពាណិជ្ជកម្ម ជាអភិបាលក្រុងChongqing និងជាកូនប្រុសរបស់មេបដិវត្តន៍ចិនម្នាក់ដ៏ល្បី ក៏ចង់បានដែរតំណែងប្រធានាធិបតី។ ពាក្យចចាមអារ៉ាមលាយឡំទៅនឹងព័ត៌មានក្រៅផ្លូវការកំពុងបន្តលេចឮឲ្យដឹងថា លោកBo Xilai បានសាកល្បងជំរុញឲ្យគណៈអចិន្រ្តៃយ៍នៃការិយាល័យនយោបាយរបស់បក្សរារាំងកុំឲ្យលោកXi Xinping ក្លាយទៅជាអនាគតប្រធានាធិបតីបាននៅឆ្នាំក្រោយ២០១៣។
ដើម្បីសំអាងថា ពិតជាមានមែនបំណងអាក្រក់ពីសំណាក់លោកBo Xilai ក្រុមអ្នកសង្កេតការណ៍បានលើកឡើងពីព្រឹត្តិការណ៍ដ៏ចម្លែកមួយកាលពីជាងដប់ថ្ងៃមុននេះ។ កាលណោះ
លោកWang Lijun ដែលជាដៃស្តាំរបស់លោកBo Xilai បានបាត់ខ្លួន និងក្រោយមកបានភៀសខ្លួនទៅជ្រកនៅក្នុងស្ថានកុងស៊ុលអាមេរិកាំងនៅទីក្រុងChengdu។ តាមនិយាយ លោកWang Lijung ដែលដឹងរឿងសម្ងាត់ ប្រហែលជាបានទៅជ្រកនៅស្ថានកុងស៊ុលអាមេរិកាំង ដើម្បីគេចខ្លួនកុំឲ្យលោកBo Xilai ចាប់បាន។ នៅទីបំផុត ពួកសន្តិសុខពិសេសមួយក្រុមមកពីទីក្រុងប៉េកាំង បានមកយកលោកWang Lijung ចេញពីស្ថានកុងស៊ុលអាមេរិកាំង និងនាំខ្លួនលោកទៅកាន់រដ្ឋធានី។
យ៉ាងក៏ដោយ ក្រុមអ្នកសង្កេតការណ៍លោកខាងលិចខ្លះអះអាងថា អនាគតនយោបាយរបស់លោកBo Xilai នឹងប្រហែលជាត្រូវចប់ត្រឹមនេះ៕
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ
ប្រតិកម្មជុំវិញអត្ថបទនេះ