ប្រទេសចិនប្រហារជីវិតមនុស្ស៨នាក់ពីបទភេរវកម្ម
ប្រព័ន្ធផ្សព្វផ្សាយចិន បានរាយការណ៍ឲ្យដឹងនៅថ្ងៃសៅរ៍ទី២៣ សីហាថា រដ្ឋកុំម្មុយនីស្ត បានកាត់ទោសប្រហារជីវិតមនុស្ស៨នាក់ ពីបទថាបានប្រព្រឹត្តអំពើភេរវកម្មនៅក្នុងតំបន់ស្វយ័តស៊ីនជាំង ភាគខាងលិចប្រទេសចិន។ ក្នុងចំណោមអ្នកទាំង៨នោះ ក៏មានផងដែរ ជនជាប់ចោទនៅក្នុងសំណុំរឿងបំផ្ទុះរថយន្តនៅទីលានធានអានមេន កាលពីខែតុលាឆ្នាំទៅមិញផងដែរ។
ចុះផ្សាយនៅថ្ងៃ៖
ស្តាប់ - ០២:០៧
ទីភ្នាក់ងារព័ត៌មានស៊ីនហួរ របស់ចិន បានឲ្យដឹងនៅថ្ងៃសៅរ៍ ទី២៤សីហាថា មនុស្សចំនួន៨នាក់ត្រូវបានរដ្ឋអំណាចចិនប្រហារជីវិតកាលពីពេលថ្មីៗនេះ ពីបទថាបានប្រព្រឹត្តអំពើភេរវកម្មនៅក្នុងសំណុំរឿងចំនួនផ្សេងៗគ្នា។ សំណុំរឿងមួយក្នុងចំណោមនោះ គឺជាអំពើភេរវកម្មបំផ្ទុះរថយន្តនៅទីលានធានអានមេន កាលពីខែតុលា ឆ្នាំ២០១។ ចំណែកសំណុំរឿងផ្សេងទៀត រួមមាន ការបង្កើតអង្គការភេរវជន ការវាយប្រហារលើប៉ូលីសនិងមន្ដ្រីរាជការ និងការផលិតសារធាតុផ្ទុះជាដើម ដែលបានកើតឡើងនៅតំបន់ស្វយ័តស៊ីនជាំង។
តំបន់ស៊ីនជាំងភាគខាងលិចប្រទេសចិន ជាតំបន់ស្វយ័ត ដែលប្រជាជនភាគច្រើននៅទីនោះ ជាជនជាតិអ៊ុយហ្គួរ អ្នកកាន់សាសនាអ៊ីស្លាម។ អំពើហិង្សា និងភាពចលាចល តែងតែកើតឡើងជារឿយៗនៅតំបន់ស៊ីនជាំងនេះ រវាងចលនាអ៊ុយហ្គួរផ្ដាច់ទឹកដីនិយម និងពួកជនជាតិចិនហាន ដែលជានិមិត្តរូបនៃអំណាចផ្ដាច់ការរបស់ទីក្រុងប៉េកាំង។
ក្នុងខែមីនាកន្លងទៅ ស្ថានីយរថភ្លើងមួយកន្លែងនៅគុនមីង បានរងការវាយប្រហារដោយក្រុមប្រដាប់អាវុធ ដែលបានចូលទៅចាក់សម្លាប់អ្នកដំណើរ ធ្វើអោយមានមនុស្សស្លាប់២៩នាក់ និងរបួស១៤០នាក់។ ពីរខែក្រោយមក គឺនៅខែឧសភា មានការបំផ្ទុះគ្រាប់បែកមួយនៅស្ថានីយរថភ្លើង ក្រុងUrumqi ស្ថិតក្នុងតំបន់ស្វ័យតស៊ីនជាំង ភាគខាងលិច បណ្តាលឲ្យមនុស្ស៣៩នាក់ស្លាប់ និង៩០នាក់ផ្សេងទៀតរងរបួស។
រដ្ឋអំណាចចិន បានចោទប្រកាន់ក្រុមឧទ្ទាមបំបែកខ្លួននៅតំបន់ស៊ីនជាំង ថាជាអ្នកនៅពីក្រោយអំពើភេរវកម្មទាំងនេះ។ ប៉ុន្តែអង្គការសិទ្ធិមនុស្សនានាអះអាងថា ភាពចលាចលក្នុងតំបន់ ភាគច្រើនគឺបង្កឡើងដោយសារតែរដ្ឋាភិបាលបានដាក់នយោបាយតឹងរ៉ឹងប្រឆាំងជនជាតិអ៊ុយហ្គួ។ ជនជាតិអ៊ុយហ្គួវិញ តែងចោទរដ្ឋាភិបាលចិនថា បានគាបសង្កត់វប្បធម៌ ប្រពៃណី និងសាសនារបស់ពួកគេ។
គួរជម្រាបជូនថា ក្រោយពីកើតមានអំពើភេរវកម្មជាបន្តបន្ទាប់ ទីក្រុងប៉េកាំងបានប្រកាសបើកយុទ្ធនាការកណ្តាប់ដៃដែក រយៈពេលមួយឆ្នាំ ដើម្បីបង្ក្រាបក្រុមភេរវជន និងក្រុមជ្រុលនិយមសាសនា នៅស៊ីនជាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ