យន្តហោះចម្បាំងចិនឆាបវិះបុកយន្តហោះល្បាតអាមេរិក
យន្តហោះចម្បាំងចិន បានហោះឆាប ប្រកបដោយគ្រោះថ្នាក់ យន្តហោះរបស់យោធាអាមេរិកដល់ទៅបីដង កាលពីថ្ងៃអង្គារកន្លងទៅ នៅក្នុងដែនអាកាសអន្តរជាតិ ភាគខាងកើតប្រទេសចិន។ នេះបើតាមក្រសួងការពារជាតិអាមេរិក ដែលទើបចេញសេចក្តីថ្លែងការណ៍នៅថ្ងៃចុងសប្តាហ៍។ ហេតុការណ៍យន្តហោះចិន-អាមេរិកវិះបុកគ្នាលើមេឃ បញ្ជាក់យ៉ាងច្បាស់អំពីភាពតានតឹង គ្មានថ្ងៃធូរស្បើយរវាងមហាអំណាចកំពូលទាំងពីរលើលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
យន្តហោះចម្បាំងចិន បំពាក់អាវុធរួចស្រេចផង បានហោះឆ្វែវនៅចម្ងាយតែប្រមាណ១០ម៉ែត្រពីយន្តហោះអាមេរិក ប្រភេទ P-8 Poseidon ដែលកំពុងល្បាត តាមទម្លាប់ ត្រួតពិនិត្យមើលដែនទឹកពីលើអាកាស។ នេះបើតាមការប្រកាសរបស់អ្នកនាំពាក្យក្រសួងការពារជាតិអាមេរិក។
អ្នកបើកយន្តហោះចិន បានហោះឆាបព័ទ្ធយន្តហោះផង និងមានម្តងនោះហោះកាត់មុខយន្តហោះអាមេរិក ដោយសម្ញែងអាវុធទៀត។ សម្រាប់អាមេរិកនេះជាទង្វើដ៏ប្រថុយប្រថាន និងគ្មានការទទួលខុសផ្នែកវិជ្ជាជីវៈសោះ ដែលអាចបង្កគ្រោះថ្នាក់ដល់ក្រុមទាហានអាមេរិកផង និងដែលរំលោភច្បាប់ដែនអាកាសអន្តរជាតិផង។ អាមេរិកបានបញ្ជូនសារបង្ហាញពីការព្រួយបារម្ភបំផុតភ្លាមទៅឱ្យអាជ្ញាធរក្រុងប៉េកាំង។
ទង្វើដ៏គ្រោះថ្នាក់លើកនេះ ដែលបានកើតឡើង ចំពេលចិននិងប្រទេសជិតខាងមានជម្លោះតានតឹងគ្នានេះ ប្រព្រឹត្តទៅចំងាយប្រមាណតែ២២០គីឡូម៉ែត្រ ពីកោះហៃណាំរបស់ចិន។
កាលពីខែមេសាឆ្នាំ២០០១ នៅក្នុងតំបន់ដដែលនេះ យន្តហោះអាមេរិកមួយគ្រឿង បានបុកគ្នានឹងយន្តហោះស៊ើបការណ៍ចាំចាប់សត្រូវរបស់ចិន បង្កឱ្យស្លាប់អ្នកបើកយន្តហោះចិនម្នាក់ និងបង្ខំយន្តហោះអាមេរិកឱ្យចុះចតជាបន្ទាន់លើកោះហៃណាំ។ ក្រុមទាហានអាមេរិកត្រូវឃាត់ខ្លួន និងចាប់ឃុំឃាំងសួរចម្លើយដោយភ្នាក់ងារចិន។ ឧប្បត្តិវហេតុនោះ បានបង្កឱ្យមានវិបត្តិការទូតយ៉ាងធ្ងន់ធ្ងររវាងចិននិងអាមេរិក។ កាលពីខែកក្កដាកន្លងទៅ ដើម្បីបន្ធូរបន្ថយសម្ពាធ ប្រទេសទាំងពីរបានធ្វើសមយុទ្ធរួមគ្នាក្នុងទ្រង់ទ្រាយធំមិនធ្លាប់មាននៅលើលោក ដោយមានប្រទេសចំនួន២៣ចូលក្នុងមហាសមុទ្ទប៉ាស៊ីហ្វិក។
ប៉ុន្តែភាពតានតឹងចិននិងអាមេរិក នៅតែមានជាប់ជានិច្ច ! ព្រោះប្រទេសជាសម្ព័ន្ធអាមេរិកមួយចំនួន មានជម្លោះដណ្តើមទឹកដីជាមួយចិន។ កាលពីខែមេសា២០១៤ ប៉េកាំងបានខឹងសម្បារខ្លាំងមិនចិត្តនឹងសេចក្តីថ្លែងការណ៍របស់លោកអូបាម៉ា ដែលថាកោះជប៉ុនជាប់ជម្លោះជាមួយចិនស្ថិតក្រោមការពាររបស់សន្ធិសញ្ញាអាមេរិកជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ