ព្រឹត្តិការណ៍បាញ់ប្រហារនៅអូតាវ៉ា "នឹងមិនធ្វើឲ្យកាណាដាចុះញ៉ម"
ខ្មាន់កាំភ្លើងបានសម្លាប់យោធាម្នាក់មុខរដ្ឋសភាកាណាដា នៅថ្ងៃពុធ ម្សិលមិញ ប៉ុន្តែភ្លាមៗ បុរសនោះក៏ត្រូវបាននគរបាលផ្តាច់ជីវិតទៅ។ ការបាញ់ប្រហារដោយបុរសនោះ បានបំភ័យអ្នកក្រុងអូតាវ៉ាឱ្យស្លន់ស្លោឡើង ខណៈដែលប៉ូលីសបារម្ភក្រែងមានអ្នកឆ្មក់ផ្សេងទៀត ក្នុងអាគាររដ្ឋសភា។ ល្ងាចមិញ គេកំណត់អត្តសញ្ញាណរបស់ខ្មាន់កាំភ្លើងនោះបានហើយ។ ថ្លែងតាមទូរទស្សន៍ នាយករដ្ឋមន្ត្រីកាណាដា ហៅទង្វើបុរសនោះថា «ការវាយប្រហារភេរវកម្ម»។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
ខ្មាន់កាំភ្លើងដែលត្រូវនគរបាលបាញ់សម្លាប់នោះ ទំនងជាត្រូវគេស្គាល់ឈ្មោះថា មីកាអ៊ែល ហ្សើអាហ្វ ប៊ីបូ ( Michael Zehaf-Bibeau) សញ្ជាតិកាណាដា អាយុ៣២ឆ្នាំ ដែលភ្នាក់ងារសម្ងាត់ចាត់ទុកថាជា«អ្នកដំណើរដ៏គ្រោះថ្នាក់ខ្លាំង»។ សមត្ថកិច្ចទើបបានដកហូតលិខិតឆ្លងដែនបុរសនេះទុក កាលពីពេលថ្មី។នៅឆ្នាំ២០០៣ មីកាអ៊ែល ហ្សើអាហ្វ ប៊ីបូ ប្រហែលជាធ្លាប់ត្រូវបានកាត់ទោសឱ្យជាប់គុកពីរឆ្នាំ ពីបទចោរកម្ម និងមានអាវុធ។
គាត់បានបើកការវាយប្រហារមុនម៉ោង១០ព្រឹក ម៉ោងនៅកាណាដា កាលពីម្សិលមិញ។ ពេលនោះ គាត់បានបាញ់យោធាម្នាក់ ក្នុងចំណោមពីរនាក់ ដែលឈរមុខវិមានអនុស្សាវរីយ៍យុទ្ធជនពលី។ ដោយរបួសធ្ងន់ពេក យោធានោះក៏ស្លាប់នៅមន្ទីរពេទ្យបាត់ទៅ។ នៅឯអាគាររដ្ឋសភាឯណោះវិញ គេឮស្នូរកាំភ្លើងប្រមាណជាដប់គ្រាប់ និងសំឡេងផ្ទុះដ៏ខ្លាំងមួយ។ នគរបាលមិនអាចដឹងបានទេថា ខ្មាន់កាំភ្លើងដែលវាយឆ្មក់នោះមានប៉ុន្មាន ប៉ុន្តែអាចមានពីម្នាក់ទៅបីនាក់។
រយៈពេលមួយម៉ោងកន្លះ ក្រោយពីការវាយប្រហារលើកទី១ ខ្មាន់កាំភ្លើងម្នាក់ត្រូវបានគេបញ្ជាក់ជាផ្លូវការថាស្លាប់ ប៉ុន្តែការស្រាវជ្រាវរកជនផ្សេងទៀត ដែលអាចផ្សំគំនិត នៅតែបន្ត។ ប៉ូលីសបានស្នើឱ្យប្រជាពលរដ្ឋចៀសវាងពីទីប្រជុំជន និងកុំនៅមាត់បង្អួច។
ចំពោះមុខការវាយប្រហារមិនធ្លាប់មាននេះ កងទ័ពអាកាសចម្រុះអាមេរិក កាណាដា ត្រូវបានគេបញ្ជាឱ្យស្ថិតក្នុងស្ថានភាពប្រកាសអាសន្ន ដើម្បី«ត្រៀមឆ្លើយតបឱ្យបានលឿន» ចំពោះឧបទ្ទវហេតុផ្លូវអាកាសណាមួយ ដែលអាចពាក់ព័ន្ធនឹងការបាញ់ប្រហារនៅរដ្ឋធានីអូតាវ៉ា។ ការត្រួតពិនិត្យតាមអាគារសាធារណៈ ក្នុងទីក្រុងធំៗរបស់កាណាដា ក៏ត្រូវបានបង្កើនផងដែរ។
ពេលល្ងាច នាយករដ្ឋមន្ត្រីកាណាដា បានថ្លែងសារតាមទូរទស្សន៍។ «យើងនឹងមិនខ្លបខ្លាចទេ ។ ប្រទេសកាណាដានឹងមិនខ្លបខ្លាចជាដាច់ខាត។ តាមពិត សកម្មភាពបែបនេះនឹងនាំយើងឱ្យប្តេជ្ញាកាន់តែមោះមុត និងប្រឹងប្រែងទ្វេឡើង»។ នេះជាសម្ដីផ្ទាល់របស់លោក ស្ទីហ្វិន ហាភើ (Stephen Harper)។
ប្រធានាធិបតីអាមេរិក បារ៉ាក់ អូបាម៉ា (Barack Obama) បានថ្កោលទោសទង្វើនោះថា «ការវាយប្រហារដ៏អាស្រូវ» សំដៅប្រទេសកាណាដា។ ចំណែកខាងបារាំងវិញ លោក ហ្វ្រង់ស្វ័រ ហូឡង់ (François Hollande) បានសម្ដែងនូវ«សាមគ្គីភាពទាំងស្រុងរបស់បារាំង»ជាមួយប្រទេសកាណាដា។
ការបាញ់ប្រហារម្សិលមិញនៅរដ្ឋសភាកាណាដា បានកើតឡើងមួយថ្ងៃ ក្រោយឧបទ្ទវហេតុមួយនៅតំបន់ កេបិក (Québec) ដែលជាខេត្តនិយាយភាសាបារាំងរបស់កាណាដា។ ពេលនោះ យុវជនម្នាក់ដែលស្និទ្ធនឹងមជ្ឈដ្ឋានអ៊ីស្លាមជ្រុលនិយម បានបង្កគ្រោះថ្នាក់ចរាចរណ៍ចំពោះយោធាពីរនាក់ ដោយចេតនា នៅក្នុងក្រុងតូចមួយ ក្បែរទីក្រុងម៉ុងរ៉េអាល់។ យុវជននោះក៏ត្រូវបាននគរបាលសម្លាប់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ