កម្ពុជា-ជម្ឡោះដីធ្លី -

អត្ថបទចុះផ្សាយនៅថ្ងៃ សុក្រ 07 កញ្ញា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 07 កញ្ញា 2012

ប្រជាពលរដ្ឋជួបជុំតវ៉ារឿងដីធ្លី រីឯកម្មករហែក្បួនតវ៉ារឿងប្រាក់ខែ

ប្រជាពលរដ្ឋមកពីខេត្តព្រះវិហារ បានប្រមូលផ្តុំតវ៉ានៅមុខរដ្ឋសភាដើម្បីរកអន្តរាគមន៍ក្នុងជម្លោះដីធ្លី

RFI/Ly Meng Hour

ដោយ លី ម៉េងហួរ

នៅព្រឹកថ្ងៃសុក្រទី៧កញ្ញានេះ យ៉ាងហោចណាស់មានការប្រមូលផ្តុំតវ៉ា ៣ ក្រុមដាច់ដោយឡែកពីគ្នានៅទីក្រុងភ្នំពេញ។ ហេតុការណ៍ដំបូង គឺក្រុមពលរដ្ឋបឹងកក់និងសហគមន៍បុរីកីឡា ដែលដឹកនាំដោយកុមារតូចៗបានលើកបដានិងរូបថត ឈរស្រែកតវ៉ានៅមុខទីស្តីការគណៈរដ្ឋមន្ត្រី ឲ្យមានការដោះលែងស្ត្រីអ្នកភូមិបឹងកក់ម្នាក់និងអ្នកបុរីកីឡាម្នាក់ចេញពីពន្ធនាគារ។ ចំណែកនៅមុខរដ្ឋសភាឯណោះវិញប្រជាពលរដ្ឋមកពីខេត្តព្រះវិហារបានប្រមូលផ្តុំតវ៉ារកអន្តរាគមន៍ក្នុងជម្លោះដីធ្លីខណៈដែលក្រុមកម្មករកាត់ដេររាប់រយនាក់នៅ ស្ទឹងមានជ័យបានដើរហែក្បួនតវ៉ារឿងប្រាក់ខែ។

សេចក្តីរាយការណ៍របស់ លី ម៉េងហូរពីភ្នំពេញ

ស្តាប់ (02:42)

07/09/2012 by លី ម៉េងហួរ

ក្រុមអ្នកភូមិបឹងកក់និងអ្នករស់នៅសហគមន៍បុរីកីឡា ភាគច្រើនជាកុមារតូចៗ បានលើកបដានិងឈរតវ៉ានៅមុខទីស្តីការគណៈរដ្ឋមន្ត្រី នៅព្រឹកថ្ងៃសុក្រនេះ។ ប៉ូលិសជាច្រើននាក់ ត្រូវបានដាក់ពង្រាយ។ តែក្នុងព្រឹត្តិការណ៍តវ៉ានោះ មិនមានការប៉ះទង្គិចគ្នាដោយអំពើហិង្សាឡើយ។

អ្នកភូមិបានដាក់ញត្តិជូនលោក សុខ អាន រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ដើម្បីស្នើសុំអន្តរាគមន៍ដោះលែងស្ត្រីសកម្មជនដីធ្លី២នាក់ ជាតំណាងសហគមន៍បឹងកក់និងតំណាងសហគមន៍បុរីកីឡា។ នោះគឺអ្នកស្រី យ៉ោមបុប្ផានិងអ្នកស្រី ទឹម សាក់មុនី ដែលត្រូវបានតុលាការឃុំខ្លួនកាលពីថ្ងៃទី៤ និងថ្ងៃទី៥ ខែកញ្ញានេះ ក្រោមបទចោទប្រកាន់ដាច់ដោយឡែកពីគ្នា ក្នុងរឿងបង្ករបួសស្នាមនិងរឿងញុះញង់តាមរយៈការតវ៉ាដីធ្លី។

នៅក្នុងញត្តិ ក្រុមអ្នកភូមិបឹងកក់ និងអ្នកបុរីកីឡា បានលើកឡើងថា ការចាប់ឃុំខ្លួនអ្នកស្រី យ៉ោម បុប្ផា គឺជាប់ទាក់ទិននឹងជម្លោះដីធ្លី នៅតំបន់បឹងកក់យ៉ាងពិតប្រាកដ ពីព្រោះអ្នកស្រីនិងស្វាមី មិនបានវាយតប់ឬបង្ករបួសស្នាម ដល់នរណាម្នាក់ដូចការចោទប្រកាន់ឡើយ។
ក្រុមអ្នកតវ៉ានិងអង្គការសិទ្ធិមនុស្ស យល់ថា អាជ្ញាធរបានប្រើប្រាស់គ្រប់មធ្យោបាយជាពិសេសយកប្រព័ន្ធតុលាការមកគាបសង្កត់ ដើម្បីរារាំង គំរាមកំហែង កុំឲ្យប្រជាពលរដ្ឋតវ៉ាការពារដីធ្លីនិងលំនៅឋានរបស់ខ្លួន។ មន្ត្រីរដ្ឋាភិបាល បានទទួលយកញត្តិរបស់អ្នកភូមិបឹងកក់និងអ្នកភូមិបុរីកីឡា។

ក្នុងព្រឹត្តិការណ៍ជួបជុំនៅព្រឹកមិញ អ្នកស្រី ទេព វន្នី តំណាងអ្នកភូមិបឹងកក់ ក៏បានស្វែងរកអន្តរាគមន៍ពីអាជ្ញាធរជាតិដោះស្រាយទំនាស់ដីធ្លី ដើម្បីបញ្ជូនក្រុមយុវជនស្ម័គ្រចិត្ត ដែលដឹកនាំដោយកូនប្រុសលោកនាយករដ្ឋមន្ត្រីឲ្យចុះជួយវាស់វែងព្រំប្រទល់ដីនៅតំបន់បឹងកក់ ដែលលោកនាយករដ្ឋមន្ត្រី ហ៊ុន សែន បានសម្រេចកាត់ដីទំហំ ១២,៤៤ ហិកតា ចេញពីគម្រោងអភិវឌ្ឍន៍ សម្រាប់ទុកឲ្យអ្នកភូមិរស់នៅ។

ក៏ប៉ុន្តែចំពោះមុខអ្នកភូមិតវ៉ា លោក ផៃ ស៊ីផាន រដ្ឋលេខាធិការទីស្តីការគណៈរដ្ឋមន្ត្រី បានមានប្រសាសន៍ថា នេះជាសមត្ថកិច្ចរបស់សាលាក្រុង ដែលត្រូវដោះស្រាយ។

ដោយឡែកនៅមុខរដ្ឋសភា នៅព្រឹកថ្ងៃសុក្រនេះ ប្រជាពលរដ្ឋតំណាងឲ្យ ៣៦០ គ្រួសារ រស់នៅភូមិស្រយ៉ងខាងត្បូងនិងភូមិស្រយ៉ង់ខាងជើង ឃុំស្រយ៉ង់ ស្រុកគូលែន ខេត្តព្រះវិហារ ប្រមូលផ្តុំដាក់ញត្តិនៅរដ្ឋសភា ដើម្បីសុំឲ្យលោកនាយករដ្ឋមន្ត្រី ជួយដោះស្រាយករណី ដែលអាជ្ញាធរខេត្តព្រះវិហារ បណ្តេញពួកគាត់ ចេញពីលំនៅដ្ឋាន និងឈូសឆាយដីធ្លី ស្រែចំការ។

រីឯកម្មកររាប់រយនាក់ នៅរោងចក្រកាត់ដេរ Horus Industrial Corp. នៅស្ទឹងមានជ័យ បាននាំគ្នាដង្ហែក្បួនតវ៉ា តាមដងផ្លូវ សុំឲ្យរដ្ឋមន្ត្រីក្រសួងការងារនិងលោកនាយករដ្ឋមន្ត្រី ជួយដោះស្រាយករណីថៅកែរោងចក្រ មិនព្រមសំណងអតីតភាពការងារដល់កម្មករ៕