Delicious
Digg
Facebook
Twitter
Yahoo!
Technorati
កម្ពុជា -
អត្ថបទចុះផ្សាយនៅថ្ងៃ សៅរ៍ 11 កុម្ភៈ 2012 -
ព័ត៌មានទើបកែប្រើលើកចុងក្រោយ ថ្ងៃ សៅរ៍ 11 កុម្ភៈ 2012
សកម្មជននយោបាយត្អូញត្អែរពីការរំខានរបស់អាជ្ញាធរមូលដ្ឋាន
លោកខឹមវាសនា ប្រធានបក្សសម្ព័ន្ធដើម្បីប្រជាធិបតេយ្យធ្វើការជួបជុំនយោបាយមួយនៅស្រុកត្រាំកក់ខេត្តតាកែវ
RFI/Pen Bona
ការជួបជុំនយោបាយមួយនៅក្នុងស្រុកត្រាំកក់ ខេត្តតាកែវ ត្រូវបានរំខានដោយអាជ្ញាធរមូលដ្ឋាននៅព្រឹកថ្ងៃសៅរ៍ ១១ កុម្ភៈនេះ។ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បាន ត តាំងយ៉ាងតឹងសរសៃ ក ជាមួយសមត្ថកិច្ចប៉ូលិសនៅពេលដែលសមត្ថកិច្ចទាំងនោះបានចុះទៅរារាំងពិធីជួបជុំរបស់ខ្លួន។ អ្នកតាមដានសកម្មភាពនយោបាយ និងសិទ្ធិមនុស្សនៅកម្ពុជាបានកត់សម្គាល់ឃើញមានការថយចុះនៃការរារាំងសកម្មភាពនយោបាយនៅតាមមូលដ្ឋានប៉ុន្តែ បញ្ហានៅតែកើតមានក្នុងតំបន់ជាច្រើននៅឡើយ។
ជម្លោះយ៉ាងតឹងសរសៃកមួយបានកើតឡើងនៅព្រឹកថ្ងៃសៅរ៍នេះនៅឯឃុំញ៉ែងញ៉ង ស្រុកត្រាំកក់ ខេត្តកាកែវ រវាងសកម្មជនគណបក្សនយោបាយមួយជាមួយនឹងអាជ្ញាធរមូលដ្ឋាន។
លោកខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ បានរិះគន់ខ្លាំងៗដល់អាជ្ញាធរមូលដ្ឋានដែលបានមករំខានសកម្មភាពនយោបាយរបស់ខ្លួន។ លោកអះអាងថា អាជ្ញាធរមានសមត្ថកិច្ចបានលើកគ្នាមករារាំងពិធីជួបជុំក្រោមហេតុផលថា មិនបានសុំច្បាប់អនុញ្ញាត។ ប៉ុន្តែ ប្រធានគណបក្សរូបនេះពន្យល់ថា ការជួបជុំសំណេះសំណាលនៅក្នុងផ្ទះរបស់សកម្មជនណាមួយមិនតម្រូវឲ្យមានការសុំច្បាប់ឡើយ គឺគ្រាន់តែជូនដំណឹងដល់អាជ្ញាធរជាការស្រេច។ យ៉ាងណាក៏ដោយ បញ្ហានេះត្រូវបានដោះស្រាយបន្ទាប់ពីមានអន្តរាគមន៍ពីថ្នាក់ខេត្ត។
នេះមិនមែនជាលើកទី១ទេដែលបញ្ហាបែបនេះបានកើតឡើង។ លោក ខឹម វាសនាអះអាងថា បញ្ហាកើតឡើងច្រើនជាងគេនៅក្នុងខេត្តតាកែវ។ យ៉ាងណាក៏ដោយ លោកបានកត់សម្គាល់ពីនិន្នាការថយចុះនៃអំពើរារាំងបែបនេះ។ លោក អ៊ូវីរៈ នាយកមជ្ឈមណ្ឌលសិទ្ធិមនុស្សកម្ពុជាក៏បានប្រាប់វិទ្យុបារាំងអន្តរជាតិនៅថ្ងៃនេះដែរថា ការរារាំងសកម្មភាពជួបជុំនយោបាយបានថយចុះគួរឲ្យកត់សម្គាល់រយៈពេលចុងក្រោយនេះ ប៉ុន្តែ បញ្ហានៅតែបន្តកើតមានជាហូរហែមិនទាន់អស់ឡើយ។
គណបក្សសម្ព័ន្ធប្រជាធិបតេយ្យគឺជាគណបក្សនយោបាយមួយដែលត្រូវបានបង្កើតឡើងកាលពីឆ្នាំ២០០៦ដោយលោក ខឹម វាសនា អតីតអ្នកតំណាងរាស្ត្រគណបក្សសម រង្ស៊ី។ គណបក្សនេះធ្លាប់បានចូលរួមការបោះឆ្នោតតំណាងរាស្ត្រម្តងកាលពីឆ្នាំ២០០៨ និងបោះឆ្នោតឃុំសង្កាត់កាលពីឆ្នាំ២០០៧ ប៉ុន្តែ មិនទទួលបានសំឡេងគ្រប់គ្រាន់ទេ។
យ៉ាងណាក៏ដោយ គណបក្សនេះ នៅតែបន្តសកម្មភាពរបស់ខ្លួនជានិច្ចតាមរយៈពិធីជួបជុំសំណេះសំណាលហើយយកទៅចាក់ផ្សាយតាមវិទ្យុសំបុកឃ្មុំ FM 105 MHz។ គណបក្សសម្ពន្ធ័ដើម្បីប្រជាធិបតេយ្យជាគណបក្សមួយក្នុងចំណោមគណបក្សតូចៗមួយចំនួនទៀតដែលមិនទាន់ទទួលបានកៅអីក្នុងសភា ប៉ុន្តែ នៅតែបន្តសកម្មភាពនយោបាយជានិច្ច។ គណបក្សនេះគ្រោងនឹងចូលរួមបោះឆ្នោតសភាម្តងទៀតនៅឆ្នាំ២០១៣ខាងមុខ។
លោក អ៊ូ វីរៈ នាយកមជ្ឈមណ្ឌលសិទ្ធិមនុស្សកម្ពុជាបានកត់សម្គាល់ថា គណបក្សនយោបាយជាច្រើនកំពុងធ្វើសកម្មភាពនិងការឃោសនានយោបាយតាមរយៈរលកធាតុអាកាសវិទ្យុ ដែលធ្វើឲ្យលំហសេរីភាពតាមវិទ្យុកើនឡើង។ ប៉ុន្តែ ការរំខានពីសំណាក់អាជ្ញាធរមូលដ្ឋាននៅតែជាបច្ចុប្បន្នភាពមួយដដែល៕
ទាក់ទងនឹងប្រធានបទនេះដែរ :
ស្តាប់ការផ្សាយមុនៗ
សេវា វិទ្យុបារាំងអន្តរជាតិ
អត្ថបទដែលពេញនិយមជាងគេ
អត្ថាធិប្បាយ (1)
តូចឬធំគឺឥតបញ្ហាសំរាប់LDP
គណបក្សសម្ព័ន្ធដើម្បីប្រជាធិបតេយ្យមិនមែនបង្កើតឡើងដើម្បីឈ្នះនោះទេ តែដើម្បីពន្យល់រាស្រ្តណាដែលល្ងង់ខ្លៅ។ ដូចនេះតូចឬធំគឺឥតបញ្ហា សំខាន់ថាតើចលនារបស់យើងនេះត្រូវឬអត់?
ប្រតិកម្មជុំវិញអត្ថបទនេះ