ព្រះមហាក្សត្រខ្មែរអំពាវនាវឲ្យរក្សាភាពស្ងប់ស្ងៀមក្រោយការបោះឆ្នោត
នៅក្នុងពេលដែលកម្ពុជាកំពុងប្រឈមមុខនឹងភាពរំជើបរំជួលក្រោយការបោះឆ្នោត ព្រះមហាក្សត្រខ្មែរបានចេញព្រះរាជសារមួយ នៅថ្ងៃពុធ ទី៧ សីហានេះ ដោយបានអំពាវនាវឲ្យប្រជាពលរដ្ឋទាំងអស់ “រក្សាភាពស្ងប់ស្ងាត់ និងភាពថ្លៃថ្នូររបស់ជាតិ”។
ចុះផ្សាយនៅថ្ងៃ៖ កែប្រែថ្ងៃទី៖
នៅក្នុងព្រះរាជសារនេះ ព្រះបាទព្រះបរមនាថ នរោត្តម សីហមុនី ក៏បានអំពាវនាវផងដែរ ដល់គណបក្សនយោបាយទាំងពីរ ដែលប្រជាពលរដ្ឋបានបោះឆ្នោតគាំទ្រឲ្យមានអាសនៈក្នុងរដ្ឋសភា អាណត្តិថ្មី “ឲ្យបន្តពិភាក្សាគ្នារកដំណោះស្រាយដោយសន្តិវិធី ចំពោះវិវាទ ឬបញ្ហាទាំងឡាយ ដែលនៅសេសសល់”។
ព្រះមហាក្សត្របានអំពាវនាវដល់ប្រជាពលរដ្ឋទាំងអស់ឲ្យបន្តប្រកបរបរចិញ្ចឹមជីវិតដោយភាពសុខសាន្ត ព្រមទាំងរក្សាឯកភាព និងសាមគ្គីជាតិ ដែលព្រះអង្គចាត់ទុកថាជាកម្លាំងរបស់ជាតិ ក្នុងការជំនះរាល់ការលំបាកធំៗទាំងឡាយកន្លងទៅ។
ការអំពាវនាវនេះត្រូវបានធ្វើឡើង នៅក្នុងពេលដែលកម្ពុជាកំពុងប្រឈមមុខនឹងវិវាទនយោបាយ ដែលកើតចេញពីការខ្វែងគំនិតគ្នា ជុំវិញដំណើរការ និងលទ្ធផលបោះឆ្នោតតំណាងរាស្រ្ត កាលពីថ្ងៃអាទិត្យ ២៨កក្កដា កន្លងទៅ។ ទាំងគណបក្សប្រជាជន និងទាំងគណបក្សសង្រ្គោះជាតិសុទ្ធតែបាននាំគ្នាអះអាងរៀងៗខ្លួនថាបានទទួលជ័យជម្នះក្នុងការបោះឆ្នោតនេះ ដោយទទួលបានអាសនៈភាគច្រើនដាច់ខាត។ ចំណែកឯគណៈកម្មាធិការជាតិរៀបចំការបោះឆ្នោត នៅមិនទាន់បានប្រកាសលទ្ធផលបោះឆ្នោតផ្លូវការ និងស្ថាពរនៅឡើយ។
គណបក្សសង្រ្គោះជាតិ ដែលបានបដិសេធលទ្ធផលបោះឆ្នោត ដោយអះអាងថាមានភាពមិនប្រក្រតីច្រើន បានទាមទារឲ្យបង្កើតគណៈកម្មការពិសេសមួយ ដោយមានអ.ស.បជាអាជ្ញាកណ្តាល ដើម្បីស៊ើបអង្កេតលើភាពមិនប្រក្រតីអស់ទាំងនេះ។ សំណើដែលត្រូវបានច្រានចោលដោយគ.ជ.ប។ ក៏ប៉ុន្តែ មេដឹកនាំគណបក្សប្រឆាំងបានគំរាមថា នឹងរៀបចំមហាបាតុកម្មប្រឆាំងនឹងលទ្ធផលបោះឆ្នោត ប្រសិនបើគ្មានដំណោះស្រាយសមស្រប ទៅតាមការទាមទាររបស់ខ្លួនទេនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ