កម្ពុជា -

អត្ថបទចុះផ្សាយនៅថ្ងៃ សុក្រ 26 តុលា 2012 - ព័ត៌មានទើបកែប្រើលើកចុងក្រោយ ថ្ងៃ សុក្រ 26 តុលា 2012

រដ្ឋាភិបាលអនុម័តច្បាប់ថវិកាជាតិ ឆ្នាំ២០១៣ដែលមានទឹកប្រាក់ជាង ៣.១០០លានដុល្លារ

វិមានសន្តិភាព ឬទីស្តីការគណៈរដ្ឋមន្ត្រី

©ចាន់ណា

ដោយ លី ម៉េងហួរ

កិច្ចប្រជុំគណៈរដ្ឋមន្ត្រីរបស់រាជរដ្ឋាភិបាលកម្ពុជា នៅថ្ងៃសុក្រនេះ បានប្រជុំអនុម័តលើ សេចក្តីព្រាងច្បាប់ ស្តីពីហិរញ្ញវត្ថុសម្រាប់ការគ្រប់គ្រងឆ្នាំ ២០១៣ ឬហៅថា ច្បាប់ថវិកាជាតិ ឆ្នាំ២០១៣ ដែលមានទឹកប្រាក់ ១២.៥២៧.៨០០ លានរៀល ដែលស្មើប្រមាណជាង ៣.១០០ លានដុល្លារអាមេរិក។ ថវិកា សម្រាប់ចំណាយសរុប ប្រចាំឆ្នាំ២០១៣ នេះ បានកើនឡើង ១២,៩% បើធៀបនឹងច្បាប់ថវិកាជាតិ ឆ្នាំ២០១២ ដែលមានត្រឹមតែជាង ២.៦០០ លានដុល្លារ។

សេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រីបង្ហាញថា ការអនុម័តរបស់កិច្ចប្រជុំគណៈរដ្ឋមន្ត្រីលើច្បាប់ថវិកាជាតិ ឆ្នាំ២០១៣ ដែលមានទឹកប្រាក់ជាង ៣.១០០ លានដុល្លារ គឺរាជរដ្ឋាភិបាលនៅតែបន្តអនុវត្តគោលនយោបាយដំឡើងប្រាក់បៀវត្សមូលដ្ឋានជូនមន្ត្រីរាជការស៊ីវិល និងកងកម្លាំងប្រដាប់អាវុធ ២០% បន្ថែមទៀត នៅក្នុងឆ្នាំ២០១៣ ហើយក៏បាន និងកំពុងបន្តពង្រឹងការអនុវត្តន៍បេឡាសន្តិសុខសង្គម សម្រាប់មន្ត្រីរាជការស៊ីវិល និងបេឡាជាតិសន្តិសុខ អតីតយុទ្ធជន ដើម្បីបន្តកែលំអការអនុវត្តប្រាក់សោធននិវត្តន៍ និងប្រាក់ឧបត្ថម្ភផ្សេងៗឲ្យកាន់តែប្រសើរឡើង។

សេចក្តីប្រកាសដដែលបានលើកឡើងថា ច្បាប់ថវិកាជាតិឆ្នាំ២០១៣ ក៏សម្រាប់ឲ្យរាជរដ្ឋាភិបាល បន្តអនុវត្តនូវគោលនយោបាយកម្មវិធីយុទ្ធសាស្ត្រ និងបណ្តាសកម្មភាព ការងារអាទិភាពតាមវិស័យ ពិសេសបន្តជំរុញការអនុវត្តគោលនយោបាយជំរុញផលិតកម្មស្រូវ និងការនាំចេញអង្ករ បន្តផ្តល់អាទិភាពដល់ការបង្កើន និងលើកកម្ពស់គុណភាពសេវាកម្ម នៅក្នុងវិស័យសង្គមកិច្ច ជាពិសេស វិស័យអប់រំ សុខាភិបាល ការកសាងធនធានមនុស្ស និងសំណាញ់សុវត្ថិភាពសង្គម រួមទាំងការបន្តអនុវត្តគោលនយោបាយ ផ្តល់ដីសម្បទានសង្គមកិច្ច ដល់គ្រួសារអតីតកងកម្លាំងប្រដាប់អាវុធ និងការបន្តជំរុញការអនុវត្តសកម្មភាពថ្មី លើគោលនយោបាយចាស់ នៃកំណែទម្រង់ការគ្រប់គ្រងដីធ្លី។

ការបង្កើនថវិកាជាតិ នៅឆ្នាំ២០១៣ រហូតដល់ជាង ៣ពាន់លានដុល្លារ ក៏ត្រូវបានរដ្ឋាភិបាលអះអាងថា ដើម្បីធានាដល់ការរៀបចំការបោះឆ្នោតតំណាងរាស្ត្រ អាណត្តិទី៥ នាខែកក្កដា ព្រមទាំងដើម្បីបន្តពង្រឹង និងពង្រីកការអនុវត្តលទ្ធិប្រជាធិបតេយ្យ និងនីតិរដ្ឋនៅកម្ពុជា ជាដើម។ល។ និង។ល៕