កម្ពុជា -

អត្ថបទចុះផ្សាយនៅថ្ងៃ សុក្រ 10 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 11 កុម្ភៈ 2012

រដ្ឋាភិបាលអនុម័តឯកសារស្តីពីការគ្រប់គ្រងបំណុល

លោក ខៀវ កញារីទ្ធអ្នកនាំពាក្យរដ្ឋាភិបាលកម្ពុជា

RFI

ដោយ លាង ដឺលុច

រដ្ឋាភិបាល បានអនុម័តឯកសារសំខាន់មួយនៅក្នុងកិច្ចប្រជុំគណៈរដ្ឋមន្ត្រីនៅថ្ងៃសុក្រទី១០កុម្ភៈនេះ។ ជាឯកសារគ្រប់គ្រងបំណុលសាធារណៈពីឆ្នាំ២០១១ដល់ពី២០១៨។ ឯកសារត្រូវបានសរសេរឡើងដើម្បីគៀគរទុនហិរញ្ញវត្ថុនិងបំពេញតម្រូវការហិរញ្ញប្បទានលើចំណាយរបស់រដ្ឋាភិបាលជាដើម។ រហូតដល់ពេលនេះបំណុលសាធារណៈរបស់រដ្ឋមានប្រមាណ ៣៣០០លានដុល្លារ។

សេចក្តីរាយការណ៍របស់ លាង ដឺលុច ពីទីក្រុងភ្នំពេញ

ស្តាប់ (01:36)

10/02/2012 by លាង ដឺលុច

រដ្ឋាភិបាល បានអនុម័តឯកសារយុទ្ធសាស្ត្រស្តីពីការគ្រប់គ្រងបំណុលសាធារណៈឆ្នាំ២០១១-២០១៨ នៅក្នុងកិច្ចប្រជុំគណៈរដ្ឋមន្ត្រីនៅព្រឹកថ្ងៃសុក្រទី១០កុម្ភៈនេះ។ នេះគឺជាឯកសារសំខាន់មួយដែលលោកនាយករដ្ឋមន្ត្រីហ៊ុន សែនបានប្រកាសដាក់អោយអនុវត្តកាលពីខែមិថុនាឆ្នាំ២០១១។

យោងតាមសេចក្តីប្រកាសព័ត៌មានរបស់ទីស្តីការគណៈរដ្ឋមន្ត្រី ឯកសារដែលត្រូវបានចងក្រងដោយក្រសួងសេដ្ឋកិច្ចនេះ មានគោលដៅគៀរគរទុនហិរញ្ញវត្ថុ ដើម្បីបំពេញតម្រូវការលើចំណាយជាអាទិភាពរបស់រដ្ឋ ធានាស្ថិរភាពម៉ាក្រូសេដ្ឋកិច្ច និងការទ្រទ្រង់ចីរភាពកំណើនសេដ្ឋកិច្ច។

ឯកសារយុទ្ធសាស្ត្រស្តីពីការគ្រប់គ្រងបំណុលនេះ ត្រូវបានគេរំពឹងថា គឺជាឯកសារដែលកម្រិតការខ្ចីបុលបរទេស និងស្ថាប័នហិរញ្ញវត្ថុមិនអោយហួសសមត្ថភាពរបស់កម្ពុជា។

បំណុលរបស់កម្ពុជាចំពោះបរទេសបានក្លាយជាប្រធានបទនយោបាយដ៏រសើបមួយសម្រាប់គណបក្សនយោបាយនៅកម្ពុជា។ តំណាងរាស្ត្រគណបក្សប្រឆាំង ធ្លាប់ទាមទារអោយរដ្ឋាភិបាលបង្ហាញតួលេខបំណុលម្តងហើយកាលពីពេលថ្មីៗនេះ។ ចម្លើយរបស់រដ្ឋាភិបាលដែលត្រូវបានផ្សព្វផ្សាយជាសាធារណៈផងនោះ បង្ហាញថា បំណុលរបស់កម្ពុជានៅមិនទាន់ឈានដល់ចំនុចប្រកាសអាសន្ននៅឡើយទេ។ ហើយថាកម្ពុជានៅមានលទ្ធភាពខ្ចីបុលបន្ថែមទៀត។

អ្នកនាំពាក្យរដ្ឋាភិបាលកម្ពុជា លោកខៀវ កាញារីទ្ធ បានថ្លែងអោយដឹងថា រហូតដល់ពេលនេះ បំណុលសាធារណៈរបស់កម្ពុជាមានសរុបជិត៣៣០០លានដុល្លារ ដោយបូកបញ្ចូលទាំងបំណុលដែលកម្ពុជាបានជំពាក់អាមេរិកក្នុងសម័យលន់ នល់ជាង ៣០០លានដុល្លារទៀតផង។ ហើយថាភាគច្រើននៃបំណុលសាធារណៈទាំងនោះ គឺជាកំចីសម្បទានដែលមានការប្រាក់ទាបចន្លោះពី០ ទៅ២ភាគរយ៕