កម្ពុជា-ថៃ -

អត្ថបទចុះផ្សាយនៅថ្ងៃ សៅរ៍ 11 កុម្ភៈ 2012 - ព័ត៌មានទើបកែប្រើលើកចុងក្រោយ ថ្ងៃ សៅរ៍ 11 កុម្ភៈ 2012

អាជ្ញាធរជាតិព្រះវិហារបង្ហាញកង្វល់ចំពោះសកម្មភាពយោធាថៃ

ប្រាសាទព្រះវិហារ

©បូណា

ដោយ គី សុខលីម

អាជ្ញាធរជាតិព្រះវិហារនិងគណៈកម្មាធិការជាតិបេតិកភណ្ឌពិភពលោក បង្ហាញក្តីកង្វល់ចំពោះសកម្មភាពយោធារបស់ថៃដែលបានចូលក្នុងតំបន់គ្មានកងទ័ពបណ្តោះអាសន្នសម្រេចដោយតុលាការយុត្តិធម៌អន្តរជាតិ។ ស្ថាប័នជាតិទាំងពីរខាងលើនេះ ចាត់ទុកទង្វើរបស់ក្រុមយោធាថៃថា ផ្ទុយទៅនឹងដីកាសម្រេចរបស់តុលាការយុត្តិធម៌អន្តរជាតិ។

សេចក្តីរាយការណ៍របស់ គី សុខលីមពីភ្នំពេញ

ស្តាប់ (01:56)

11/02/2012 by គី សុខលីម

នៅថ្ងៃសៅរ៍នេះ ស្ថាប័នជាតិរបស់ប្រទេសកម្ពុជាចំនួនពីរបានចេញសេចក្តីថ្លែងការណ៍រួមគ្នាប្រឆាំងទៅនឹងទង្វើរបស់ក្រុមយោធាថៃដែលបានធ្វើសកម្មភាពចូលក្នុងតំបន់គ្មានកងទ័ពបណ្តោះអាសន្នដែលបានសម្រេចដោយតុលាការយុត្តិធម៌អន្តរជាតិ។

ប្រតិកម្មរបស់អាជ្ញាធរជាតិព្រះវិហារនិងគណៈកម្មាធិការជាតិបេតិកភណ្ឌពិភពលោកបានធ្វើឡើងបន្ទាប់ពីបានទទួលដំណឹងថា ក្រុមយោធាថៃកាលពីចុងខែមករាឆ្នាំ២០១២ កន្លងមកបានដឹកសម្ភារៈនិងផ្ទេរសម្ភារៈនៅក្នុងតំបន់គ្មានកងទ័ពបណ្តោះអាសន្ន។ ពួកគេបានធ្វើសកម្មភាពនៅលើភ្នំទ្រព្យនិងចូលយ៉ាងជ្រៅទៅក្នុងតំបន់គ្មានកងទ័ពបណ្តោះអាសន្ន។

សេក្តីថ្លែងការណ៍រួមដដែលបានចោទប្រកាន់ក្រុមយោធាថៃថា សកម្មភាពរបស់ពួកគេមិនត្រឹមតែផ្ទុយទៅនឹងដីកាសម្រេចរបស់តុលាការយុត្តិធម៌អន្តរជាតិប៉ុណ្ណោះទេ ប៉ុន្តែថែមទាំងផ្ទុយទៅនឹងស្មារតីលទ្ធផលវិជ្ជមាននៃកិច្ចប្រជុំគណៈកម្មាធិការព្រំដែនទូទៅនិងកិច្ចប្រជុំផ្សេងទៀតដែលភាគីទាំងពីរកម្ពុជាថៃចង់បាន ដូចជា៖ បរិយាកាសស្ងាត់ស្ងៀមនិងសន្តិភាពនៅតំបន់ជុំវិញប្រាសាទព្រះវិហារ។

កាលពីខែកក្កដាឆ្នាំ២០១១កន្លងមក តុលាការយុត្តិធម៌អន្តរជាតិបានចេញដីការសម្រេចមបង្កើតតំបន់គ្មានកងទ័ពបណ្តោះអាសន្ននិងតម្រូវអោយភាគីទាំងពីរកម្ពុជាថៃត្រូវទប់ស្កាត់នូវរាល់សកម្មភាពណាដែលអាចធ្វើអោយស្ថានភាពកាន់តែធ្ងន់ធ្ងរនិងពិបាកដោះស្រាយថែមទៀត។

បន្ទាប់មកទៀត គណៈកម្មាធិការព្រំដែនទូទៅរវាងរដ្ឋមន្រ្តីការពារជាតិកម្ពុជានិងថៃធ្លាប់បានសម្រេចរួមគ្នាថា ភាគីទាំងពីរបានព្រមព្រៀងគ្នាអនុវត្តតាមដីកាសម្រេចរបស់តុលាការយុត្តិធម៌អន្តរជាតិ។

ទាក់ទងទៅសេចក្តីថ្លែងការណ៍ខាងលើ គេពុំទាន់ឃើញមានប្រតិកម្មពីខាងភាគីថៃនៅឡើយទេ។ សូមបញ្ជាក់ផងដែរថា ប្រតិកម្មរបស់អាជ្ញាធរជាតិព្រះវិហារនិងគណៈកម្មាធិការជាតិបេតិកភណ្ឌពិភពលោកបានធ្វើឡើងស្របពេលដែលគណៈកម្មការព្រំដែនចម្រុះកម្ពុជាថៃគ្រោងនឹងជួបប្រជុំគ្នានៅក្នុងទីក្រុងបាងកកនៅដើមសប្តាហ៍ក្រោយនេះ៕