បក្សប្រឆាំង ជួបជុំបង្សុកូល ឧទ្ទិសកុសលដល់វិញ្ញាណក្ខន្ធអ្នកស្លាប់ នៅកោះពេជ្រ
នៅរសៀលម៉ោង ២ ថ្ងៃសុក្រ ទី២១វិច្ឆិកានេះ គណបក្សសង្គ្រោះជាតិ នឹងជួបជុំប្រារព្ធពិធីបង្សុកូល ឧទ្ទិសកុសលដល់វិញ្ញាណក្ខន្ធអ្នកស្លាប់ នៅស្ពានកោះពេជ្រ។ គណបក្សសង្គ្រោះជាតិ ស្នើសុំអាជ្ញាធររាជធានីភ្នំពេញ សង់រោង ៣ ប្រឡោះ ជាប់ទីតាំងស្តូប នៅខាងមុខអតីតគល់ស្ពានកោះពេជ្រ ដើម្បីប្រារព្ធពិធី ប៉ុន្តែអាជ្ញាធររាជធានីភ្នំពេញ បានបដិសេធ មិនអនុញ្ញាតឲ្យគណបក្សប្រឆាំង សាងសង់រោងនោះទេ ដោយហេតុថា អាជ្ញាធរ ត្រៀមរៀបចំប្រារព្ធពិធីបង្សុកូល ឧទ្ទិសកុសលជូនដល់វិញ្ញាណក្ខន្ធជនរងគ្រោះ នៅព្រឹកថ្ងៃ២២វិច្ឆិកា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៣
គណបក្សសង្គ្រោះជាតិ តាមរយៈលោកម៉នផល្លា ប្រធានគណៈកម្មាធិការប្រតិបត្តិ រាជធានីភ្នំពេញ បានដាក់លិខិតមួយច្បាប់ជូនលោកអភិបាលរាជធានីភ្នំពេញ ដើម្បីស្នើសុំសង់រោង ៣ ប្រឡោះ ជាប់ទីតាំងស្តូប នៅខាងមុខ អតីតគល់ស្ពានកោះពេជ្រ ដើម្បីធ្វើពិធីបង្សុកូល ឧទ្ទិសកុសល ជូនដល់វិញ្ញាណក្ខន្ធអ្នកដែលបានស្លាប់ កាលពីថ្ងៃទី២២វិច្ឆិកា ឆ្នាំ២០១0។ គណបក្សសង្គ្រោះជាតិ នឹងប្រារព្ធពិធីជួបជុំនោះ នៅម៉ោង ២ រសៀល ថ្ងៃទី២១វិច្ឆិកា។
តាមលិខិតចុះថ្ងៃទី១៨វិច្ឆិកា ពិធីជួបជុំនោះ នឹងប្រព្រឹត្តទៅក្រោមអធិបតីភាពលោកសមរង្ស៊ី ប្រធាន និងលោកកឹមសុខា អនុប្រធានគណបក្សសង្គ្រោះជាតិ ហើយមានអ្នកចូលរួមប្រមាណ ១០០ នាក់។
ប៉ុន្តែលោក ឃួង ស្រេង អភិបាលរង រាជធានីភ្នំពេញ បានចេញលិខិត ចុះថ្ងៃទី២០វិច្ឆិកា មិនអនុញ្ញាតឲ្យគណបក្សសង្គ្រោះជាតិ សាងសង់រោងនោះទេ ដោយហេតុថា នៅជាប់ទីតាំងស្តូបមុខអតីតគល់ស្ពានកោះពេជ្រនោះ ត្រូវបានសាលារាជធានីភ្នំពេញ ត្រៀមរៀបចំប្រារព្ធពិធីបង្សុកូល ឧទ្ទិសកុសលដល់វិញ្ញាណក្ខន្ធជនរងគ្រោះ ស្លាប់ ៣៥៣ នាក់ និងរបួស ៣៩៦ នាក់ ដោយឧបទ្ទវហេតុលើស្ពានកោះពេជ្រ ថ្ងៃ២២វិច្ឆិកា ឆ្នាំ២០១១។ អាជ្ញាធររាជធានីភ្នំពេញ នឹងរៀបចំពិធីតាមទំនៀមទំលាប់ ប្រពៃណី សាសនា ដោយមានការរាប់បាត្រ និងប្រគេនទេយ្យវត្ថុដល់ព្រះសង្ឃ ១០៨ អង្គ នៅព្រឹកថ្ងៃ២២វិច្ឆិកា។
លិខិតរបស់អាជ្ញាធរ បញ្ជាក់ថា ក្នុងករណីគណបក្សសង្គ្រោះជាតិ មានបំណងរៀបចំពិធីបង្សុកូល ដើម្បីឧទ្ទិសកុសល ជូនដួងវិញ្ញាណក្ខន្ធជនរងគ្រោះនោះ ថ្នាក់ដឹកនាំ និងសមាជិកគណបក្សសង្គ្រោះជាតិ អាចចូលរួមក្នុងកម្មវិធី ដែលរៀបចំដោយសាលារាជធានីភ្នំពេញ។
ប៉ុន្តែលោក ម៉ន ផល្លា ប្រធានគណបក្សសង្គ្រោះជាតិ ប្រចាំរាជធានីភ្នំពេញ បានបញ្ជាក់ថា គណបក្សប្រឆាំង នឹងជួបជុំប្រារព្ធពិធីរយៈពេលខ្លី ដោយមិនធ្វើរោង នៅរសៀលថ្ងៃទី២១វិច្ឆិកានេះ ដោយនិមន្តព្រះសង្ឃបង្សុកូល ដាក់កម្រងផ្កា និងគោរពវិញ្ញាណក្ខន្ធអ្នកស្លាប់ នៅស្តូបកោះពេជ្រ។
ក្រៅពីគោរព និងឧទ្ទិសកុសលដល់អ្នកស្លាប់ ក្នុងព្រឹត្តិការណ៍ជាន់គ្នាស្លាប់ នៅស្ពានកោះពេជ្រ គណបក្សសង្គ្រោះជាតិ ទាមទារឲ្យមានអ្នកទទួលខុសត្រូវលើហេតុការណ៍ ស្លាប់មនុស្សជាង ៣០០ នាក់ ដើម្បីបញ្ចប់វប្បធម៌និរទណ្ឌភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ