សវនាការសំណុំរឿង ០០២វគ្គទី២ បន្តជាប់គាំងដោយសារជនជាប់ចោទធ្វើពហិការ
ក្រុមមេធាវីការពារក្តីឲ្យលោក នួន ជា និងខៀវ សំផន នៅតែរក្សាជំហរមិនចូលរួមសវនាការសំណុំរឿង ០០២វគ្គទី២ទេ ប្រសិនបើសំណើកូនក្តី របស់ពួកគេ មិនត្រូវបានដោះស្រាយ។ ជនជាប់ចោទ នួន ជា ទាមទារផ្លាស់ប្តូរចៅក្រមកាត់ក្តីទាំង ៤រូប ខណៈដែលជនជាប់ចោទ ខៀវ សំផន ទាមទារពេលវេលា សម្រាប់ធ្វើសារណាបណ្តឹងសារទុក្ខសំណុំរឿង ០០២វគ្គទី១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
កិច្ចប្រជុំរៀបចំសវនាការរបស់សំណុំរឿង០០២ វគ្គទី២ រវាងសាលាក្តី ជាមួយសហមេធាវីការពារជនជាប់ចោទ កាលពីថ្ងៃទី ២៨តុលា មិនទទួលបានលទ្ធផលជាវិជ្ជមានទេ។ សហមេធាវីការពារក្តីជនជាប់ចោទ នួន ជា និង ខៀវ សំផន នៅតែរក្សាជំហរតាមសំណើរបស់កូនក្តីដដែលថា ពួកគេមិនអាចចូលរួមសវនាការសំណុំរឿង ០០២ វគ្គទី២បានទេ ប្រសិនបើការទាមទារ របស់ខ្លួនមិនត្រូវបានដោះស្រាយទេនោះ។
នួន ជា បងធំទី២ ក្នុងរបបខ្មែរក្រហម បានដាក់ពាក្យបណ្តឹង ដិតចិត្ត ដើម្បីសុំផ្លាស់ប្តូរចៅក្រមកាត់ក្តី ៤រូបគឺ លោក និល ណុន លោក យ៉ា សាខន លោក យូរ ឧត្តរា និងចៅក្រមជនជាតិបារាំងលោក Jean-Marc Lavergne។ លោក នួន ជា បានចោទចៅក្រមទាំង ៤រូបនេះថាលម្អៀង និងខ្វះឯករាជ្យភាព ក្នុងការកាត់ក្តី។
លោក សុន អរុន សហមេធាវីការពារក្តីលោក នួន ជាបានថ្លែងបញ្ជាក់ជំហរប្រាប់វិទ្យុបារាំងអន្តរជាតិថា ដរាបណាការទារមទារផ្លាស់ប្តូរចៅក្រម មិនទាន់បានដោះស្រាយទេ លោកមិនអាចចូលរួមសវនាការសំណុំរឿង ០០២វគ្គទី២បានទេ ពីព្រោះកូនក្តីរបស់លោកមិនអាចទទួលយកចៅក្រម ដែលបានកាត់ទោសគាត់ឲ្យជាប់ពន្ធនាគារអស់មួយជីវិតរួចហើយនោះមកបន្តកាន់សំណុំរឿងមួយនេះបានទៀតឡើយ។
លោក គង់ សំអុន សហមេធាវីការពារក្តីឲ្យលោក ខៀវ សំផន មិនអាចទាក់ទង បានទេនៅថ្ងៃនេះ ប៉ុន្តែ លោកធ្លាប់បានបញ្ជាក់ជំហរយ៉ាងច្បាស់លាស់ថា ដរាបណាសារណាបណ្តឹងសារទុក្ខ ក្នុងសំណុំរឿង ០០២វគ្គទី១ មិនទាន់ចប់ទេ កូនក្តីរបស់ខ្លួន គឺលោក ខៀវ សំផន គ្មានពេលសម្រាប់រៀបចំសវនាការសំណុំរឿង ០០២វគ្គទី២នោះឡើយ។
សូមបញ្ជាក់ថា សហមេធាវីការពារ នួន ជា និង ខៀវ សំផន បាននាំគ្នាដើរចេញពីសវនាការ កាលពីថ្ងៃទី១៧តុលា។ ពួកគេ ក៏បានពហិការ មិនចូលប្រជុំនៅថ្ងៃទី២១តុលាតាមការកោះអញ្ជើញ របស់សាលាក្តីដែរ។ យ៉ាងណាក៏ដោយ សហមេធាវីការពារជនជាប់ចោទ បានយល់ព្រមចូលប្រជុំ កាលពីថ្ងៃទី២៨តុលា បន្ទាប់ពីការព្រមានរបស់តុលាការ។
យ៉ាងណាក៏ដោយ កិច្ចប្រជុំចុងក្រោយនេះ ក៏មិនបានធ្វើឲ្យសហមេធាវីផ្លាស់ប្តូរជំហរដែរ។ ប្រឈមមុខនឹងបញ្ហានេះ សហព្រះរាជអាជ្ញា បានស្នើឲ្យតុលាការពិចារណារកមេធាវីបម្រុង។ ប៉ុន្តែ លោក នួន ជា បានបដិសេធរួចជាស្រេចថា នឹងមិនព្រមទទួលយកមេធាវីថ្មីណាម្នាក់ទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ