យុវជនត្រូវបានផ្តល់ឳកាសមួយផ្នែក ក្នុងការស្វែងរកដំណោះស្រាយលើបញ្ហាដីធ្លីនិងលំនៅស្ថាន
អង្គការសង្គមស៊ីវិលប្រមាណជា១៤ស្ថាប័ន សហការជាមួយក្រសួងរៀបចំដែនដី និងនគរូបនីយកម្មនិងសំណង់ បានរៀបចំវេទិកាថ្នាក់ជាតិមួយ នៅថ្ងៃទី២៧តុលានេះ ស្តីពី ដីធ្លី និងលំនៅស្ថាន។ វេទិកានេះ ក៍បានផ្តល់តួនាទីមួយផ្នែកអោយយុវជន ចូលរួមស្វែងរកដំណោះស្រាយលើបញ្ហាជម្លោះដីធ្លី និងលំនៅស្ថាននៅកម្ពុជា។ បញ្ហាដីធ្លី និងលំនៅស្ថានរបស់ប្រជាពលរដ្ឋកម្ពុជា នៅតែជាបញ្ហាស្មុគស្មាញនៅក្នុងសង្គមខ្មែរបច្ចុប្បន្ន។
ចុះផ្សាយនៅថ្ងៃ៖
ស្តាប់ - ០២:១៨
វេទិកាថ្នាក់ជាតិនេះ បានរៀបចំធ្វើឡើងនៅឯសណ្ឋាគាអ៊ីមភើរៀលក្នុងទីក្រុងភ្នំពេញ នាថ្ងៃចន្ទទី២៧តុលា ដោយមានយុវជនមកពីខេត្តក្រុងនានាចូលរួម ក្នុងនោះរួមមានយុវជននៅតាមសហគមន៍រងគ្រោះដីធ្លី យុវជនមកពីសកលវិទ្យាល័យនានា និងយុវជនស្ម័គ្រចិត្តរបស់រដ្ឋាភិបាល ដែលបានចុះវាស់វែងដីធ្លីជូនដល់ប្រជាពលរដ្ឋនៅមុនការបោះឆ្នោតជាតិឆ្នាំ២០១៣កន្លងទៅនេះ។ គោលបំណងសំខាន់នៃវេទិកានេះ គឺទី១. ដើម្បីបង្កើនការយល់ដឹងរបស់យុវជនលើបញ្ហាដីធ្លី លំនៅស្ថាន និងយន្តការដោះស្រាយ ទី២. បណ្តុះមនសិការ សីលធម៌ និងបង្កើនឳកាសចូលរួមរបស់យុវជន ពិភាក្សាលើបញ្ហាដីធ្លី និងលំនៅស្ថាន ជាមួយអាជ្ញាធរពាក់ព័ន្ធ និងទី៣. គឺដើម្បីបង្កើនទំនាក់ទំនងរវាងយុវជន និងអាជ្ញាធរពាក់ព័ន្ធលើបញ្ហាដីធ្លី។
លោក ប៉ែន សុមុនី នាយកប្រតិបត្តិ អង្គការស្ម័គ្រចិត្តដើម្បីសង្គម (CVS) រំពឹងថា វេទិការនេះ បានបញ្ជាក់ថា បច្ចុប្បន្ន និងអនាគត យុវជនត្រូវការសុវត្ថិភាពដីធ្លី និងលំនៅស្ថាន។ ដូច្នេះយុវជនត្រូវតែចូលរួមដោះស្រាយបញ្ហាដីធ្លី។
ពាក់ព័ន្ធនឹងបញ្ហាដីធ្លីនិងលំនៅស្ថាននេះ លោក សរ សុវណ្ណ រដ្ឋលេខាធិការក្រសួងដែនដី នគរូបនីយកម្មនិងសំណង់បានថ្លែងនៅក្នុងវេទិកានេះថា រដ្ឋាភិបាលកម្ពុជាបានដាក់ចេញនូវគោលនយោបាយមួយចំនួនដើម្បីកាត់បន្ថយជម្លោះដីធ្លីនៅកម្ពុជា។ នៅខែកក្កដាឆ្នាំ២០០៩ រដ្ឋាភិបាលបានអនុម័តសេចក្តីថ្លែងការណ៍ស្តីពី គោលនយោបាយដីធ្លី ហើយនៅខែឧសភាឆ្នាំ២០១៤ រដ្ឋាភិបាលក៍បានអនុម័តគោលនយោបាយជាតិស្តីពីលំនៅស្ថាន រួមទាំងដាក់ចេញនូវបទបញ្ជារលេខ០១ ដើម្បីបញ្ជូននិស្សិតទៅវាស់វែងដីធ្លីនៅទូទាំងប្រទេសថែមទៀត។ លោករដ្ឋលេខាធិការបញ្ជាក់ថា គិតត្រឹមដំណាច់ខែកញ្ញាឆ្នាំ២០១៤នេះ ការចុះបញ្ជីដីធ្លីសម្រេចបានជាង៣លាន៦សែនប័ណ្ណ។
ប៉ុន្តែយ៉ាងណាក៍ដោយ ការតវ៉ាពីបញ្ហាជម្លោះដីធ្លីនៅតែបន្តកើតមាន។ កាលពីពេលថ្មីៗនេះ ប្រជាពលរដ្ឋមកពីខេត្តកំពង់ស្ពឺ កោះកុង កំពង់ឆ្នាំង ក្រចេះជាដើម បានឡើងមកតវ៉ានៅក្នុងទីក្រុងភ្នំពេញជាបន្តបន្ទាប់ ហើយឥឡូវនេះ ប្រជាពលរដ្ឋមកពីខេត្តបាត់ដំបង និងខេត្តព្រះវិហារកំពុងនាំគ្នាតវ៉ានៅរាជធានីភ្នំពេញនៅឡើយទេ។
យោងតាមរបាយការណ៍កាលពីឆ្នាំ២០១២ រដ្ឋាភិបាលកម្ពុជាបានផ្តល់ដីសម្បទានសេដ្ឋកិច្ចជាង២លាន៦សែនហិចតា (២៦៥៧៤៧០) ដែលបានធ្វើអោយប៉ះពាល់ដល់ប្រជាពលរដ្ឋប្រមាណជា៧៧ម៉ឺននាក់។ ប៉ុន្តែតាមរយៈបទបញ្ជាលេខ០១ រាជរដ្ឋាភិបាលបានកាត់ផ្ទៃដីសរុបទំហំ១លានហិចតាពីក្រុមហ៊ុនដីសម្បទានសេដ្ឋកិច្ច និងក្រុមហ៊ុនព្រៃសម្បទាន ដើម្បីផ្តល់កម្មសិទ្ធិជូនប្រជាពលរដ្ឋវិញ។ បើតាមលោក ចាន់ សុវ៉េត អនុប្រធានអង្កេតដីធ្លី និងធនធានធម្មជាតិនៃសមាគមសិទ្ធិមនុស្សអាដហុក មានមូលហេតុបីសំខាន់ ដែលនាំអោយមានជម្លោះដីធ្លីនៅកម្ពុជាសព្វថ្ងៃនេះនិងមិនអាចស្វែងរកដំណោះស្រាយបាន ទី១.មកពីកំណើនប្រជាជន ទី២.ការធ្វើវិច្ឆេទកម្មដីរបស់ឈ្មួញ ទី៣.ការផ្តល់ដីសម្បទានសេដ្ឋកិច្ចដែលខ្វះការអនុវត្តន៍ច្បាប់ និងទី៤. កង្វះការត្រួតពិនិត្យ និងទទួលខុសត្រូវរបស់រដ្ឋាភិបាលកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ