បាតុកម្មថ្ងៃ១៥កក្កដា៖ ប៉ូលិសចាប់យុវជនគណបក្សសង្គ្រោះជាតិម្នាក់ទៀត និងកោះហៅ ៣ នាក់ ចូលបំភ្លឺ
ប៉ូលិស បានចាប់ខ្លួនយុវជនម្នាក់របស់គណបក្សសង្គ្រោះជាតិ ដែលជាសមាជិកក្រុមប្រឹក្សាខណ្ឌច្បារអំពៅ កាលពីព្រឹកថ្ងៃទី២៩កញ្ញានេះ ទាក់ទងនឹងការធ្វើបាតុកម្ម នៅក្បែរទីលានប្រជាធិបតេយ្យ កាលពីថ្ងៃទី១៥ ខែកក្កដា។ បាតុកម្មនោះ កើតមានអំពើហិង្សា រវាងបាតុករ និងក្រុមសន្តិសុខ។ ក្នុងសំណុំរឿងក្តី ដែលមានចរិកជារឿងនយោបាយនេះ ចៅក្រម ក៏បានចេញដីកា បង្គាប់ឲ្យយុវជន ៣ នាក់ផ្សេងទៀត របស់គណបក្សប្រឆាំង ចូលឆ្លើយបំភ្លឺ ជាបន្តបន្ទាប់ ចាប់ពីព្រឹកថ្ងៃទី៣០កញ្ញា ថ្ងៃ១តុលា និងថ្ងៃទី២តុលា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
យុវជនម្នាក់ទៀត ជាសកម្មជនគណបក្សសង្គ្រោះជាតិ និងជាសមាជិកក្រុមប្រឹក្សាខណ្ឌច្បារអំពៅ លោក ស៊ុំ វុទ្ធី ត្រូវបានប៉ូលិស ចាប់ខ្លួន កាលពីព្រឹកថ្ងៃទី២៩ ខែកញ្ញា។ រហូតដល់ល្ងាច ថ្ងៃចន្ទនេះ ចៅក្រមបានសម្រេចបញ្ជូនយុវជន ស៊ុំ វុទ្ធី ទៅឃុំឃាំងនៅពន្ធនាគារព្រៃស។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ បានបញ្ជាក់ពីការចាប់ខ្លួនយុវជននោះ។ លោក យឹម សុវណ្ណ បន្ថែមថា បើសិនជាករណីចាប់ខ្លួនយុវជនរបស់គណបក្សសង្គ្រោះជាតិ នៅព្រឹកថ្ងៃទី២៩កញ្ញានេះ ពាក់ព័ន្ធនឹងករណីបាតុកម្មថ្ងៃ១៥កក្កដា នោះវាជារឿងនយោបាយ ដែលគណបក្សកាន់អំណាច ប្រើប្រាស់ប្រព័ន្ធតុលាការ ដាក់គំនាបជាថ្មីលើគណបក្សប្រឆាំង។
សំណុំរឿងបាតុកម្មរំដោះទីលានប្រជាធិបតេយ្យកាលពីថ្ងៃ១៥កក្កដានោះ ត្រូវបានលោកមេធាវី សំសុគង់ ឲ្យដឹងថា ចៅក្រមស៊ើបសួរ បានចេញដីកាកោះហៅយុវជន ៣ នាក់ ដែលត្រូវបានដោះលែង កាលពីខែសីហា ឲ្យចូលឆ្លើយបំភ្លឺជាបន្តបន្ទាប់ ចាប់ពីព្រឹកថ្ងៃទី៣០កញ្ញា ថ្ងៃ១តុលា និងថ្ងៃទី២តុលា។
ជាការកត់សម្គាល់ ក្នុងសំណុំរឿងបាតុកម្មរបស់លោកស្រី មួរ សុខហួរ ដើម្បីរំដោះទីលានប្រជាធិបតេយ្យ កាលពីព្រឹកថ្ងៃទី១៥កក្កដា ឆ្នាំ២០១៤ បានកើតមានអំពើហិង្សា រវាងបាតុករ និងក្រុមសន្តិសុខ។ ក្រុមសន្តិសុខ បានដាក់ពាក្យប្តឹង ហើយភ្លាមៗ លោកស្រី មួរសុខហួរ និងបេក្ខជនជាប់ឆ្នោតតំណាងរាស្ត្រ ២ រូបទៀត ត្រូវបានចាប់ខ្លួន។
ក្នុងសំណុំរឿងដដែលនោះ អ្នកជាប់ឆ្នោតតំណាងរាស្ត្រ ៤ រូបផ្សេងទៀត រួមទាំងយុវជនគណបក្សសង្គ្រោះជាតិ យ៉ាងហោចណាស់ ៤ នាក់ទៀត ត្រូវបានចាប់ឃុំខ្លួន ជាបន្តបន្ទាប់។ បន្ទាប់ពីសម្របសម្រួលនយោបាយ ត្រូវរ៉ូវគ្នា រវាងមេដឹកនាំគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី២២កក្កដា ទើបបេក្ខជនជាប់ឆ្នោត និងមេដឹកនាំយុវជនសរុប ៨ រូប ត្រូវបានដោះលែងមកវិញ។
ប៉ុន្តែសំណុំរឿងក្តី ដែលមានចរិកជារឿងនយោបាយនោះ ត្រូវបានចៅក្រម បន្តបើកការស៊ើបអង្កេត ដោយកោះហៅមេដឹកនាំគណបក្សសង្គ្រោះជាតិ លោកកឹមសុខា និងថ្នាក់ដឹកនាំគណបក្សសង្គ្រោះជាតិជាច្រើនរូបផ្សេងទៀត ចូលបំភ្លឺជាបន្តបន្ទាប់។
លោកមេធាវី សំ សុគង់ បានលើកឡើងថា រឿងក្តីនោះ អាចនឹងធ្វើឲ្យជនជាប់ចោទ ជាប់ពន្ធនាគារចន្លោះពី ២០ ឆ្នាំ ទៅ ៣០ ឆ្នាំ ក្នុងបទចោទប្រកាន់ដឹកនាំ ចូលរួមកុប្បកម្ម ផ្តើមគំនិត ចូលញុះញង់ បង្កអំពើហិង្សា និងបទប្រឆាំងអ្នករាជការសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ