យុវជនកម្ពុជាងូតទឹកកកដើម្បីស្វែងរកជំនួយមនុស្សធម៌
ពីរសប្ដាហ៍ចុងក្រោយនេះ យុវជនកម្ពុជា បាននាំគ្នាថតវីដេអូរូបខ្លួនឯងដែលកំពុងងូតទឹកកក រួចបង្ហោះតាមបណ្ដាញសង្គមហ្វេសប៊ុក ដើម្បីស្វែងរកជំនួយមនុស្សធម៌ដល់មន្ទីរពេទ្យគន្ធបុប្ផា និងមូលនិធិសប្បុរសធម៌នានានៅកម្ពុជា។ ការងូតទឹកកក ឬ Ice Bucket Challenge គឺជាយុទ្ធនាការសកល ដែលផ្ទុះឡើងនៅប្រទេសលោកខាងលិច តាំងពីពាក់កណ្ដាលឆ្នាំ២០១៤នេះ និងដែលធ្វើឡើងក្នុងគោលដៅពង្រីកការយល់ដឹងពីជំងឺប្រព័ន្ធប្រសាទ ALS។
ចុះផ្សាយនៅថ្ងៃ៖ កែប្រែថ្ងៃទី៖
យុវជនកម្ពុជាជាច្រើន បានបង្ហោះវីដេអូ ដែលមានរូបខ្លួនឯងយកទឹកកកត្រាំក្នុងទឹក រួចចាក់ពីលើក្បាល។ អ្នកដែលទើបតែងូតទឹកកកនោះ មានសិទ្ធិអញ្ជើញមនុស្សចំនួន៣នាក់ ឬលើសពីនេះ ឲ្យងូតទឹកកកដែរ។ ជាការងូតទឹកកក ដែលនៅកម្ពុជា គេធ្វើឡើងដើម្បីស្វែងរកជំនួយមនុស្សធម៌ ដល់មូលនិធិសប្បុរសធម៌ និងជាពិសេសគឺមន្ទីរពេទ្យគន្ធបុប្ផា។
លោកហ៊ុន ម៉ានី កូនប្រុសលោកនាយករដ្ឋមន្ដ្រីហ៊ុន សែន ក៏បានងូតទឹកកក និងបានអញ្ជើញលោកស សុខា កូនប្រុសលោកស ខេង និងលោកសាយ សំអាល់ កូនប្រុសលោកសាយ ឈុំ ឲ្យចូលរួមងូតទឹកកកដែរ។ លោកនាយករដ្ឋមន្ដ្រីហ៊ុន សែន ព្រមទាំងប្រមុខបក្សប្រឆាំងទាំងពីរ គឺលោកសម រង្ស៊ី និងលោកកឹម សុខា ក៏ត្រូវបានយុវជនខ្មែរមួយរូប អញ្ជើញឲ្យងូតទឹកកកដែរ ដោយថែមទាំងដាក់លក្ខខណ្ឌទៀតថា បើថ្នាក់ដឹកនាំនយោបាយទាំង៣រូបនេះមិនងូតទឹកកកទេ គឺត្រូវបរិច្ចាគថវិកាចំនួន១០ម៉ឺនដុល្លារក្នុងម្នាក់ ទៅកាន់មន្ទីរពេទ្យគន្ធបុប្ផា។
លោកអ៊ាង គារវៈ ប្រធានក្រុមអ្នកស្ម័គ្រចិត្តនៃមូលនិធិយើងរួមគ្នាដើម្បីគន្ធបុប្ផា ថ្លែងប្រាប់វិទ្យុបារាំងអន្ដរជាតិនៅថ្ងៃចន្ទនេះថា តាំងពីមានល្បែងងូតទឹកកក ឬ Ice Bucket Challenge នេះមក ការបរិច្ចាគដល់មន្ទីរពេទ្យគន្ធបុប្ផា តាមរយៈមូលនិធិរបស់លោក បានកើនឡើងច្រើនមិនធ្លាប់មាន។ យ៉ាងណាក៏ដោយ លោកយល់ថា សកម្មភាពនេះ អាចមិនស្ថិតស្ថេរយូរអង្វែងទេ។ វានឹងស្ងាត់ទៅវិញក្នុងពេលឆាប់ៗនេះ។ ប៉ុន្តែយ៉ាងហោចណាស់ វាអាចរួមចំណែកបង្កើតទម្លាប់ ឲ្យយុវជនកម្ពុជាចេះជួយគ្នាច្រើនជាងមុនផងដែរ។
គួរជម្រាបជូនថា ការងូតទឹកកក ឬ Ice Bucket Challenge គឺជាយុទ្ធនាការសកល ដែលផ្ទុះឡើងនៅប្រទេសលោកខាងលិច តាំងពីពាក់កណ្ដាលឆ្នាំ២០១៤នេះ និងដែលធ្វើឡើងក្នុងគោលដៅពង្រីកការយល់ដឹងពីជំងឺប្រព័ន្ធប្រសាទ ALS៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ