លោក ស៊ូប៊ែរឌីអំពាវនាវឲ្យរដ្ឋាភិបាលកម្ពុជាបន្តពង្រឹងច្បាប់ ដើម្បីការពារសិទ្ធិមនុស្ស
លោក សូរិយា ប្រាសាទ ស៊ូបែរឌី អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធមនុស្សនៅកម្ពុជា នៅក្នុងរបាយការណ៍ចុងក្រោយរបស់ខ្លួនបានអំពាវនាវឲ្យរដ្ឋាភិបាលកម្ពុជា បន្តពង្រឹងច្បាប់បន្ថែមទៀត ដើម្បីការការសិទ្ធិមនុស្សនៅកម្ពុជា។ របាយការណ៍ចុងក្រោយស្តីពីស្ថានភាពសិទ្ធិមនុស្សនៅកម្ពុជានេះ ត្រូវបានលោក ស៊ូបែរឌីដាក់ជូនក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃទី ១៥ សីហា និង ទើបបានចេញផ្សាយជាសាធារណៈកាលពីថ្ងៃសុក្រ ម្សិលមិញ។
ចុះផ្សាយនៅថ្ងៃ៖
ស្តាប់ - ០១:៥២
នៅក្នុងរបាយការណ៍ជាភាសាអង់គ្លេសដែលមានកម្រាស់ ២០ ទំព័រនោះ លោក សូរិយា ប្រាសាទ ស៊ូប៊ែរឌី បានរៀបរាប់ពីការបាតុកម្មនានានាពេលកន្លងមកដែលដឹកនាំដោយគណបក្សសង្គ្រោះជាតិប្រឆាំងនឹងលទ្ធផលបោះឆ្នោតកាលពីឆ្នាំ ២០១៣ ការបង្ក្រាបដោយហិង្សាលើបាតុកម្មកម្មករ និង ការបោសសម្អាតអ្នកតវ៉ារបស់បក្សប្រឆាំងនៅលើទីលានប្រជាធិបតេយ្យកាលពីដើមខែមករាកន្លងទៅ។ ការមិនអនុញាតឲ្យមានការប្រមូលផ្តុំហែរក្បួន ឫ ជួបជុំនៅទីសាធារណៈ ដោយរដ្ឋាភិបាលនាពេលកន្លងមក ក៏ត្រូវបានសរសេរនៅក្នុងរបាយការណ៍នោះផងដែរ។
លោក ស៊ូប៊ែរឌី បានសម្តែងការសោកស្តាយចំពោះការមិនទាន់មានការស៊ើបអង្កេតដោយហ្មត់ចត់ ជឿជាក់ និង ឯករាជ្យនៅឡើយចំពោះឧប្បត្តិហេតុដែលបានកើតឡើងក្នុងពេលធ្វើបាតុកម្ម ដោយអ្នកបង្កអំពើហិង្សាមិនទាន់ត្រូវយកទៅកាត់ក្តី។ ប្រឈមនឹងបញ្ហានេះ លោក សង្កត់ធ្ងន់ថា បញ្ហានិទណ្ឌភាពនៅតែជាក្តីបារម្ភយ៉ាងខ្លាំងនៅក្នុងប្រទេសកម្ពុជា។
លោក ស៊ូប៊ែរឌី បានអំពាវនាវឲ្យរដ្ឋាភិបាលកម្ពុជាបន្តពង្រឹងច្បាប់ ដើម្បីការពារសិទ្ធិមនុស្សនៅកម្ពុជា ។ អ្នករាយណ៍ពិសេសស្តីពីបញ្ហាសិទ្ធិមនុស្សនៅកម្ពុជារូបនេះ បានផ្តល់អនុសាសន៍បន្ថែមថា រដ្ឋាភិបាលកម្ពុជាត្រូវនាំអ្នកដែលបានប្រព្រឹត្តអំពើហិង្សានៅក្នុងអំឡុងពេលបាតុកម្មយកទៅកាត់ទោស រួមទាំងសមាជិកនៃកងកម្លាំងសន្តិសុខដែលបានធ្វើឲ្យមានមនុស្សស្លាប់ និង រងរបួស ហើយធានាថា សំណងគ្រប់គ្រាន់ត្រូវបានផ្តល់ដល់ជនរងគ្រោះ ឫ សាច់ញាតិរបស់ពួកគេ។
លោក ម៉ក់ សម្បត្តិ ប្រធានគណៈកម្មាធិការសិទ្ធិមនុស្សរបស់រដ្ឋាភិបាលកម្ពុជា បានថ្លែងប្រាប់វិទ្យុបារាំងអន្តរជាតិនៅព្រឹកថ្ងៃ សៅរ៍ ទី ២៣ សីហា ថា លោកមិនទាន់អាចវាយតម្លៃរបាយការណ៍នេះបាននៅឡើយទេ ដោយសារលោកទើបតែបានទទួល និង កំពុងពិនិត្យមើល។ យ៉ាងណាក៏ដោយ លោក ម៉ក់ សម្បត្តិ បានអះអាងថា គណៈកម្មាធិការសិទ្ធិមនុស្សកម្ពុជាកំពុងខិតខំពង្រឹងច្បាប់ការពារសិទ្ធិមនុស្សនេះហើយ។ លោក លើកឡើងបន្ថែមថា ស្ថានភាពសិទ្ធិនៅកម្ពុជាកំពុងវិវឌ្ឈទៅរកភាពល្អប្រសើរ តែលោកក៏មិនបានបដិសេធពីចំណុចខ្វះខាតមួយចំនួនដែលនៅតែកើតមាននោះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ