លោកឈាង វុន៖ លោក ហេង សំរិន មិនបានសន្យាចាត់វិធានការចំពោះអ្នកដុតទង់ជាតិវៀតណាមទេ
លោកប្រធានរដ្ឋសភា ហេង សំរិន មិនបានសន្យាជាមួយរដ្ឋាភិបាលវៀតណាមថានឹងចាត់វិធានការ ចំពោះក្រុមអ្នកតវ៉ាដែលដុតទង់ជាតិវៀតណាម នៅកម្ពុជានោះទេ។ នេះជាការបដិសេធរបស់លោក ឈាង វុន មន្ត្រីជាន់ខ្ពស់រដ្ឋសភាបន្ទាប់ពីលោកបានអមដំណើរលោក ហេង សំរិន មកពីទស្សនកិច្ច នៅប្រទេសវៀតណាមវិញ នៅរសៀលថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ការបដិសេធនេះ បានធ្វើឡើង បន្ទាប់ពីសារព័ត៌មាន ក្នុងស្រុកមួយចំនួន បានស្រង់ប្រភពពីកាសែតវៀតណាមមកចុះផ្សាយថា ក្នុងដំណើរទស្សនកិច្ចទៅកាន់ប្រទេសវៀតណាម លោក ហេង សំរិន បានសន្យាជាមួយភាគីវៀតណាមថានឹងចាត់វិធានការចំពោះសកម្មជនខ្មែរកម្ពុជាក្រោម ដែលបានដុតទង់ជាតិប្រទេសវៀតណាម កាលពីសប្តាហ៍កន្លងទៅ។
លោក ឈាង វុន បានអះអាងថានោះព័ត៌មានមិនពិត។ លោកបញ្ជាក់ថា លោក ហេង សំរិន បានប្រាប់ភាគីវៀតណាមថា «ខ្មែរកម្ពុជាក្រោមធ្វើបាតុកម្មដោយសារអ្នកនាំពាក្យស្ថានទូតវៀតណាមនិយាយមិនត្រូវទាក់ទងនឹងរឿងប្រវត្តិសាស្ត្រ»។
បើតាមលោក ឈាង វុន សំណើររបស់រដ្ឋាភិបាលក្រុងហាណូយ ដែលទទូចឲ្យកម្ពុជាចាត់វិធានការចំពោះខ្មែរកម្ពុជាក្រោមនោះ ត្រូវបានលោក ហេង សំរិន ឆ្លើយតបទៅកាន់វៀតណាមថា កម្ពុជាជាប្រទេសប្រជាធិបតេយ្យ ដូច្នេះសកម្មភាពបាតុកម្ម ឬការដុតទង់ជាតិវៀតណាម គឺជាសិទ្ធិ និងសេរីភាពរបស់ពលរដ្ឋកម្ពុជា។
គួរបញ្ជាក់ថា ក្រុមអ្នកវ៉ាខ្មែរកម្ពុជាក្រោម បានផ្ទុះកំហឹងដោយសារអ្នកនាំពាក្យស្ថានទូតវៀតណាមអះអាងថា ទឹកដីកម្ពុជាក្រោមជារបស់ខ្លួនតាំងពីយូរមកហើយ។ បាតុកម្មជាបន្តបន្ទាប់ បានឈានដល់ការដុតទង់ជាតិវៀតណាម នៅមុខស្ថានទូតវៀតណាម ក្នុងទីក្រុងភ្នំពេញកាលពីថ្ងៃទី១២សីហា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ